Janvyi

Né v'chîn la poésie d'aniet, tch'appathaît ichîn pouor la preunmié fais, d'not' auteu du mais, Geraint Jennings:

Here's today's previously unpublished poem by our author of the month, Geraint Jennings:

Janvyi

Lé p'tchiot fait des p'tits pas dans la nièrcheu d'l'Hivé
à seule fîn d'pilvâtchi lé housse et l'êtînchelle.
L's êtailes sont pitchies bas; d's êqu'sîns d'la vielle année.
Ch'est Janvyi - l'nouvieau-né tch'amonte amont l'êtchelle.

La jannèche du mais juse la douocheu d'ches longues nyits,
bèrchie dans un liet d'plieunmes dé l'ange du haut du bouais,
souos l'êdrédon du d'so d'nos présents dêpatchis
et pitchis à la gliaine souos les dgibolles du mais.

Les p'tits pas du p'tchiot veinnent êtamper nos séthées
et chein qu'j'voudrêmes faithe, nous, dans l'êcaûffîn du sang
s'en va rajeuni l'ji du rêvillon mort-né
ès heuthes nièrchies d'nos nyits, ès preunmié jours dé l'an.

Chein qu'nou-s'a rêsolu, chein qu'nou nos a promîns,
èrsonne coumme les brais d'mousse dans un drapé mouoilli;
nou trînque ses vèrrées dg'ieau au run des cheinnes dé vîn
en arrouôsant d'achies les preunmié nyits d'Janvyi.