À l'entou d'la plianète Tchoeu

Né v'chîn la poésie d'aniet, tch'appathaît ichîn pouor la preunmié fais, d'not' auteu du mais, Geraint Jennings:

Here's today's previously unpublished poem by our author of the month, Geraint Jennings:

À l'entou d'la plianète Tchoeu

J'lanch'chai eune fîsée à la plianète Tchoeu
tch'est en orbite d'amour à l'entou d'té;
tu viage toute l'année lé travèrs des cieux
et mé j'sis happé par ta gravité.

La plianète Tchoeu touônne douochement sus s'n êsseu;
un bord ensolilyi par tan souôri,
l'aut' bord est hors la vaie dans la nièrcheu,
ch'est pesta d'leune à l'ombre d'ta sgornéthie.

L'apprèche dé ma fîsée dêmuche sa fache,
picotée d'cratéthes, d'affaithes d'y'a tchiques ans;
la fîsée feunque et feunme en blianches triliaches
en vithant, un navithe du preunmié rang.

Et nou-s'obsèrve, nou hale ses plians, nou dgette
coumme tchi qu'lé solé s'lève pouor êcliaithi
la susfache rouie dé ch't' êtrange rouoge plianète;
et j'y'envyêthai mes astronautes du d'si.