1981: L'appathence trompe tchiquefais! (3)

Quand j'vai l'nombre d'pliaintes au sujet des cartes d'visite qué les tchians laîssent, jour et niet, sus les trottouaithes et les rues d'la ville, i' m'sembl'ye tch'i' y'a pus d'urgence dé bâti des p'tites maîsons pour les tchians qué pour les humains. Et y'éthait l'avantage tch'i' né s'sait pon nécessaithe d'en bâti d'deux sortes, ieune pour "Miton" et l'aut' pour "Charlotte." Ché s'sait eune bein miyeu manniéthe dé garder les trottouaithes dé la ville propre qué d's'attendre qué les tchians s'en vont les netti atout lus coues! Et pis, étout, ché s'sait eune bouanne opporteunité pour tchique janne architecte dé montrer san talent en dessinnant eune Pétite Maîson à Tchians d'distînction!