Author of the month: each month in 2015, we'll be blogging texts by a Jèrriais author. Our author for the month of July is Geraint Jennings; all of this month's poems have been written in 2015 and this is their first publication.
Souos l'êdrédon
Au liet souos l'êdrédon, j'sis plianté dans man clios;
les réchinnes au lîncheu, les j'tons à l'ouothilyi -
entèrré ou à fliot, êtrav'lé sus man dos
sus des louêmes en ouadinne, j'm'accliâsse en freunmant l'yi.
J'embraiche la tèrre caûffée par un solé d'mînniet
tchi lit néthement, cliaithement, au couochant du cagueva,
et les rêves craîssent acouo, enronchis au chèrvé -
eune sécouée d'sèrcl'yes sauvages et meutinnes sus l'mat'nas.
Quand j'rueûque, un raclia d'rêves veint tchaie sus l'êdrédon
pouor qu'tout l'dêm'nîn d'la lueu dêpense dans ma couochette
en russ'lant dans les draps, arrouôsant les rions...
et j'dormithai, assa, eune douzaine d'leunes dé siette.
No comments:
Post a Comment