Changement d'habits, changement d'opinions

Changement d'habits, changement d'opinions

Dans ma qu'minsolle emmitouflè,
J'fu' dans l'gardin, dans l'mais d'Janvi,
Qu'si d'la caboche et du pouothèt
Et vaie si j'trov'thais du persi.
J'me r'souvenin bein que j'grenottais,
Les fielles 'taient couvertes d'gliaichon;
J'avais l'ongl'yie au bu des daigts -
Et d'mauvais halître au moton.
L'triste solei' n'parvenait pas
A fondre la glace sus l's'êpions;
Des rangies d'candelles, pointe en bas,
Pendaient du lièf, des nos, des pliombs.
J'groumachais raidde à man tout seu
Sus gliaichon, nè et mauvais temps,
Et j'aspithais pour la chaleu
En m'en rallant vite pardedans.....
Mais anniet, l'jour de St. Swithin,
A grapins suos l'lièf d'un soyi,
Je pilais l'fain du grand gardin,
Et, jusant man corset, mouoill'yi
D'la sueu' qui m'boulait d'par tout l'corps,
Je r'aspithais pour du gliaichon!
Ou m'dithez p't'être bein qu'j'avais tort,
Mais j'ai suè tant que j'ne l'crait pon!