Sonnet 98 dé Shakespeare

Né v'chîn la poésie d'aniet, tch'appathaît ichîn pouor la preunmié fais, d'not' auteu du mais, Geraint Jennings:

Here's today's previously unpublished poem by our author of the month, Geraint Jennings:

Sonnet 98 dé Shakespeare

J'ai 'té liain d'té, à banon au R'nouvé,
quand Avri, l'fyi et pielé, rajannit
atout l'esprit d'jannèche, tout attînfé,
et chu b'sant Saturne jopîntait auve li.
Tout coumme, ni l'chant d'l'ouaîth'lîn ni la bieauté
des flieurs tch'envitouent atout lus odeurs
n'pouvaient m'faithe êcrithe eune histouaithe d'Êté
ni les tchilyi dans lus prés ordgilleurs.
Et j'n'avais dgéthe èrmèrtchi l'blianc du lis
ni louangi dans la rose san sang d'rouogeu;
i' 'taient raîque doux - sans r'êmoûtchi lé d'si
qué té, tu'êmoûque - coumme l'èrfliet d'un mitheux.
Mais, acouo liain d'té, j'sis à hiv'nagi:
à jouarder atout ches ombres dé tan ji.