Quand Ph'lip plieuthit

Quand Ph'lip plieuthit

à Portinfé, Saint Ou.
Jeudi au sé.

Moussieu l'Editeu,

Comme dé couôtume, je qu'menche agniet avec le temps. Ichin y'a bieau solé dans l'jour, et une fraid nèthe la niet. Les jours r'allouognent, mais la têrre est si g'lée que, sinon dans es p'tits côtils ichin et là, nou n'peut pas s'mettre à plianter et les patates restent dans les câsses. I' n'y a pas de tchestchion de plianter dans les clios. Dans ma bordeuse y'a tchiques signes de vie, car y'a des taupes, des vers et des limaches, sans pâsler des colinmachons! Quant ès patates, nou n'en vait rein, et nou n'peut que vivre en espéthance, sachant que l'temps fraid que j'avons yeu à ch'teu' dépis Noué n'peut pas nos pliaindre trop, car dans la maison j'pouvons nos garder caud, et la mangeaille ne manque pas. Touos les jours je m'attends que j'éthais tchiquechose de miyeu à vos raconter, mais jusqu'ichin ch'est tréjous la même histouaithe. Ch'n'est pas d'ma faute, car ch'n'est pas mé tchi gouverne le temps, et ch'est p't'être aussi bein, car j'mé trouv'thais bein vite en embarras. quand les tchultivateurs voudraient d'la mouolliétuthe, les visiteurs, les jeunes couplyes, tchi voudraient lûs prom'ner dans les ruettes, et bein d'autres, voudraient du temps sec. Vèthe, Moussieu, j'si content de n'aver rein à y faithe.

Les Etats ont à ch'teu' à décider si le jour dé la Libéthâtion s'en va être célébrer lé onze dé mai, comme a 'té suggéthée par lé Sénateur Rumfitt, ou lé neuf, tch'est la vraie date. J'me r'souveins de bein des choses tchi s'arrivîtent chu jour-là, et quand j'vivrais jusqu'à chent ans, jamais j'oubliethais le son d'la clioche à trais heuthes quand j'tais en train de dêfoui avec une frouque des tigots dé brécolis dans d'la terre tchi 'tait duthe comme un rotchi. Au preumié son d'la clioche, j'pliantis la fichue frouque dans la têrre, et j'me mînt à plieuther. J'n'ai jamais yeu honte de chonna, Moussieu.

Pour le "Marketing Board", Moussieu - tchèsqu'est votre opinion? Pour mé, il est fini pour ch't' année, et probablyement pour bein d's années à l'av'nîn, mais y'en a tchi craient tchi veindra pûs vite que chonna. Ch'est à saver, mais i' m'semblye que l'fermyi jêrriais d'à ch'teu' n'voudra pas accepter autchun changement s'i' n'est pas seux que che c'sa pour san bénéfice. Par chein que j'en vais, nos patates eûsives se vendront tréjous à bouon prix, pourvu tchi pouôrront être sûs l'marchi d'vant autchunes autres. Y'étha tréjous d'la compétition, mais nou-s-a veu chonna d'vant, et la bouonne vielle Rouoyale est ocquo là. Y'en a tchi disent que hardi d'la s'menche a 'té g'lée dans les bouaîtes, mais par chein que j'ai ouï par ichin le dommage n'est pas si sérieux comme tout chonna, et il en reste assez pour plianter des milles vrégies.

La Merrienne, tch'a tréjous 'té fortement dé l'opinion que si nou-s-a une vouaix nou dév'thait pouver s'en faithe servi, ne veur pas craithe que n'y étha pas une forte élection pour Sénateur au mais d'décembre. "J'îthais à la Salle Pârouaissiale quand veindra l'jour," ou s'fit hier, quand j'tiomes à distchuter la position, "et j'mett'rais ma vouaix sûs l'papi, quand ch'ne s'sait que pour un but d'bouais, et j'voudrais vaie l'homme tchi s'en va m'en empêchi."

Ou m'a d'mandé étout à ces sé si ch'n'est pas à bein près l'temps pour les Connêtablyes à être êlus ou ré-êlus. J'li dit que j'criyais que oui, mais qué je n'pouvais pas craithe que si ch'tait d'même, nou vêrrait hardi d'changements.

"Et les Recteurs?", oulle a d'mandé.

"Ah, bein, ma fille," j'li ai dit, "les Recteurs sont une bein difféthente affaithe, car une fais tch'i' sont là nou n'peut pas bein s'en dêfaithe comme nou peut d'un membre d'la Police Honorifique. Dans l'couothant d'ma vie j'n'en ai veu que deux tch'ont té suspendus pour un terme d'années, mais i' n'fûtent pas fichis à la parte."

"Pourtant," ou s'fit, "ch'n'est pas juste que nou peut s'dêfaithe d'un Connêtablye, s'i' n'fait pas san d'vé, mais que dans l'cas d'un Recteur, il est là pour sa vie, quand i' n'vaudrait pas quatre sous. Une bein drôle de position, i' m'semblye."

"Comme hardi de louais tchi sont ocquo en forche," j'li dis. "I' sont là et i' faut obéi."

"Ch'né s'sa pas tréjous d'même," ou s'fit. "Arrête que y'aie une majorité de femmes dans l's Etats, et tu vêrras si chais louais ne s'sont pas bein vite bannies dans l'fond du royaume des taupes, ch'est à dithe, louogies au Greffe."

Ph'lip
4/3/1963