1960: Ph'lip va ès Êtats

 Ph'lip va ès Êtats

- et n'en profite pas

 

à Portinfé.

 

Moussieu l'Editeu,

 

J'vos avais dit, la s'maine passée, que j'avais idée d'aller en ville mardi pour être présent à la preumié séance des Etats pour l'année couothante. Eh bein j'y fus, et j'tais assis dans la gal'rie de bouonne heuthe pour vaie les membres entrer. J'avais prédit qué l'Sénateur John Le Mèrquand s'sait tard, comme dé couotume, mais je m'trompais, parsqué, pour yunne des preumié fais dans sa vie je l'vis arrivé d'vant hardi d's autres, habillyi comme un vrai moussieu et frais râsé. Ch'tait un Saint Ouënnais, et un homme de bouon tchoeu quand i' n'se met pas à faithe des bêtises.

 

1949: Ph'lip meets with an accident

 Ph'lip meets with an accident

And blames Merrienne for it

 

Moussieu l'Editeu,

 

J'm'en vais avé assez d'peine à vos êcrithe agniet car je s'y tout man long sûs l'sofa, par suite d'un accident tchi m'arrivit hier dans l'arlévée, et j'crai ben qu'j'en ai pour une pôsé.

 

Ch'tait la faute à la Merrienne, tch'y m'criyit d'allé l'y ramâssé une bouq'tée d'iau. J'tais en train d'gratté tchiques navets pour les bêtes, et comme j'y ai dit dêjà chent fais, s'ou voulait une bouq'tée d'diau, ch'tait à lyi d'allé à la pompe et de m'laissi à man travas.

 

J'vait ben ach'teu qu'j'éthais deu l'y dithe chonna dans l'temps, mais j'ai tréjous yeu la bête d'habitude de y'obêi, pour n'avé pas d'brit, en don j'mint ma brioche bas, et me v'la hors à la pompe, tch'est située, comme j'vos l'avais dit, aupi d'la maie à fumyi.

 

1961: Ph'lip et les belles-mèthes

 Ph'lip et les belles-mèthes

Merrienne et l'comité

 

à Portinfé,

Saint Ou.

 

Né v'là tchînze jours que je n'me trouve pas trop raide, et après l'tais à ces seit, ayant un mio l's esprits bâs, j'me mîns à penser tchésqu'i' s'arriv'thait à la Merrienne si j'm'en allais d'vant lyi. Actuellement j'n'ai autchune crainte, car oulle a 'té une bouonne mèthe à ses êfans, mais chonna m'a ram'né à la mémouaithe chein tch'arrivit y'a tchiques années à yun d'mes amins et sa femme quand lis invitîtent lûs belle-méthe, tchi v'nait de perdre s'n homme, à v'nîn d'meuther siez-yeux pour tchique temps. I' faut que j'vos diche que jusqu'alors la mèthe à Joe et sa femme avaient tréjous accordé, et i' n'avait autchune doute que chonna continuéthait. Ch'tait un bouon corps, lé Joe, et Isabé, sa femme, avait tréjous 'tait trantchille et une bouonne mênagièthe. Ch'tait la paix et la trantchilité dans lûs maison, et si l'Joe r'venait de temps en temps un mio caud d'bèthe, après avé 'té à une Assembliée d'Pâraisse, ou ly' aidgeait à ramonter les d'grès et à se deshabiliyi, et i' n'y avait pas un mot de r'proche quand v'nait l'matîn.

 

1961: La Merrienne a tout plien à dithe

La Merrienne a tout plien à dithe

Les patates, la prison et la paix à St. Piêrre

 

à Portinfé,

Saint Ou.

 

Moussieu l'Editeu,

 

La Merrienne avait tout plien à dithe hier au sé. Quant oulle eut liut la gâzette d'un but à l'autre, tandis que j'tais assis dans ma grand'tchaise à fumer ma pipe trantchillement, ou la pôsit sûs la table, avec ses lunettes, prînt la catte sûs ses g'nors, et la v'là horte!

 

Ou qu'menchit par m'pâsler d'une famille qu'oulle avait visité dans l'arlévée. Y'a huit mousses, et ou les trouvit tous dans la même chambre, quatre à un but d'un grand liet et quatre de l'autre. Yunne des filles avait attrapé la rouogeule, et lûs mèthe, tch'éthait p't'être deu saver mûs, les avait enfreunmés touos ensemblyes, disant que ch'tait mains d'peine, car la rouogeule est hardi contagieuse et ch'tait certain que la pliupart des huit l'attrap'thaient étout, et ch'tait mûs d'en fini, comme sa mèthe avait fait quand la Merrienne 'tait yunne d'une dgainge de garçons et d'filles avec la maladie. “Il est vrai,” ou dit, “que trais d'nous fûtes bein prêt d'crever, mais j'nos r'fîmes quand-même, mais j'ai tréjous yeu ma au gros ortet d'man pid drouait, tchi fut mordu une niet jusqu'à l'os par le p'tit Johnnie, tchi 'tait d'l'autre but du liet. Nous en rit et nou badine à ch'teu,” oulle ajouôtit “et heutheusement chonna n'câsse par les dents. Ch'tait un diton des anciens.”

 

1962: Merrienne et Saint Martîn

 Merrienne et Saint Martîn

Ph'lip et l's êlections

 

à Portinfé,

Saint Ou.

 

Moussieu l'Editeu,

 

Ah, mais, ch'est qu'la Merrienne n'est pas de bouonne humeur chais jours. “Nou nos avait promînt un bieau s'tembre,” ou s'fit hièr au sé, “mais y tchait d'la plyie presque tout l'temps, et le vent est si fort que quand nou tâche d'aller d'hors pour tchiques minutes pour se faithe du bein, nou-s-est boustchulés d'un bord et d'l'autre et nou-s-a bein d'la peine à se t'nîn sûs ses pids. J'n'avons pas yeu d'êté et à ch'teu' nos v'lá bétôt en hivé.”

 

“Mais, Merrienne,” j'li dis, “n'oublie pas que j'avons veu tchiques bieaux jours de solé chutte semaine.”

 

“Je sais bein chonna,” ou dit, “j'en avons yeu quatre de siète, et nou-s-appéle chonna le p'tit êté de Saint Martîn. Eh bein, tout ch'que j'ai à dithe là-d'sûs ch'est que si un saint n'peut pas faithe mûs i' dev'thait aver honte. J'ai même connu des prédicateurs locaux tchi nos éthaient donner au mains une bouonne semaine, et pourtant i' 'taient bein lien d'être des saints, si nou pouvait craithe la maintchi des rumeurs tchi couôthaient dans l'temps. N'm'en pâsle pas de chais saints. J'n'avons pas un saint de Saint Ou, et par chein que j'en vais j'n'en sommes pas d'pièthe. Depis hier mes rhoumatisses ont même attatchi mes p'tits-ortets, et chein tchi m'fait mârri pûs que l'restant ch'est qu'té tu n'pathais pas aver un mio d'ma autchun bord. Ch'n'est pas juste, chonna.”

 

1981: Dans la Gâzette...

 Dans la Gâzette...

 

Trenton,

Michigan, USA.

 

Lé 20 d'juin, 1981.

 

Moussieu l'Rédacteu,

 

Ouaithe qué les gâzettes dé Jèrri sont trais ou quat' sémaines en r'tard par lé temps tch'i' veinnent ichîn, i' sont înterêssantes pour un Jèrriais exilé. Par exempl'ye, à ches drein j'm'étais d'mandé tch'est tch'avait gângni l' “Muratti” ch't' année. Eh bein, la gâzette de sept dé mai, tchi veint d'arriver, nouos annonce qué Jèrri est l'gângnant. Mais j'n'ai pon veu un accompte du jeu d'dans. Fallut-i' patter pour décider tch'est tch'éthait l'vent driéthe pour quémenchi? Chose assez drôle, dgia, est tchi fallait fouoilli les spectateurs du “match” pour dêcouvri s'i' y'en avait tch'étaient armés. Et chose acouo pus êtonnante est qué la police trouvit un “blackjack”, deux-s'trais coutchieaux, des chîsieaux et des balles dé billiards tchi pouôrraient bein faithe du ma, car i' sont solides et b'santes. Mais lé “football” est un sport. Pourtchi qu' les spectateurs veulent êt' armés? Né v'là acouo eune aut' preuve qué tout est boulevèrsé d'nouos jours.

 

1981: Lé pâssage du temps

 Lé pâssage du temps

 

Fort Lauderdale,

Florida, USA.

 

Moussieu l'Rédacteu,

 

Dans la gâzette du quatre dé dézembre, 1980, lé bieau portrait d'la brigantinne Eye of the Wind mé ramémouaithit la brigantinne Dawn tchi transportit man p'pèe, ma m'mèe et mes fréthes Sydney George et John Giffard à La Côte dé Gaspé dans l'mais d'avri, 1901.

 

Sus un sens, nou peut dithe qué j'tions à nouos entr'èrgarder, man fréthe Sydney et mé, sans nouos entre vaie, à m'suthe qué l'Dawn pâssait par La Baie d'St Ouën en c'mîn pour La Côte. J'tais à lé r'garder par la f'nêtre dé ma chambre à La Forge, et Sydney m'a souvent dit tch'il' à r'garder les hauteurs de l'Êta et des Landes dans ma direction en même temps, et tch'i' gardit la côte dé Jèrri en veue jusqu'à la niet. Et la preunmié chose tch'i' fît en sé l'vant à bord du navithe lé lendemain matîn fut dé r'garder pour Jèrri. Mais i' fut surprîns d'vaie qué l'Île avait dispathu et qu'la seule chose en veue 'tait des montangnes dé mé l'tou du navithe!

 

1976: Répétition

 Répétition

 

Trenton, Michigan,

U.S.A.

 

Lé 11 dé dézembre, 1976.

 

Moussieu l'Rédacteu,

 

Quand j'tais à liéthe les gâzettes d'Angliétèrre Dînmanche pâssé j'mé d'mandais si l'pays s'èrmet'tait janmais sus ses pids. Nou n'sait janmais tch'est tchi vouos pend sus la tête, mais y'a eune chose tch'est cèrtaine - i' y'a bésoin d'un r'miède. I' n'faut pon oublier qué l's Angliais ont ieu d's êpreuves, mais pourtchi qu' lus gouvèrnément d'à ch't heu fut êlu? Ch'est bein aîsi dé d'vînner. Lé fanmeux bouanhomme Moussieu Churchill dît au monde tch'i' n'avait rein à lus ouffri qu des lèrmes et du travas pour les r'mett' sus lus pids d'driéthe, et l'parti ouvriyi promînt ès êlecteurs dé lus donner la leune et eune vie aîsie auve un tas d'sou à rein n'faithe. J'pense bein qu' les gens, êbahis par la dgèrre, criyaient chu niolîn-là.

 

À m'n idée, i' n'est pon nécessaithe d'aver des p'tits boudîns dans la tête pour saver tch'i' n'y'a qu' un r'miède pour dêhaler l'Angliétèrre du pité dans tchi qu' ou s'trouve à ch't heu. Ch'est l'travas! Eune heuthe dé travas pour une heuthe dé gages! Ch'est d'laîssi les grands d'îndustrie faithe sèrvi d'lus profit pour dêvelopper et agrandi lus conmèrce à la pliaiche dé les taxer à mort pour bailli des sou ès cheins tchi n'font rein sénon empêchi les travailleurs dé faithe eune bouanne heuthe dé travas pour eune heuthe dé gages.

 

1977: En reunminnant...

 En reunminnant...

 

Le Ménage ès Feuvres,

St. Ouën.

 

Lé 27 d'août, 1977.

 

Moussieu l'Rédacteu,

 

Un tas d'touristes Angliais pâssent par ichîn touos les jours en s'promenant, et l'pits dans l'bel du Ménage pathaît l's întérêssi hardi. Ch'est probabliément viyant qué, d'la route, i' n'vaient qu' eune tour - la porte et l'gîndas en d'dans du pits étant en fache dé la maison. S'i' s'adonne qué j'sis dans l'bel jé l's învitent à entrer et vaie la salle et la grande âtre atout sa cranne et les cros et la crémilliethe, et l'fou à fouângner et la fouânnaise en d'ssous d'sa dgeule, à côté d'l'âtre. Ch'est d'tchi vyi et Jèrriais qué j'ai voulu prêsérver viyant tch'i' dispathaît dé jour en jour à m'suthe qué les neuves maîsons rempliaichent les vielles et qu' la grande âtre par lé feu artificiel êlectrique dans un p'tit grais modèrne, ou par lé “chauffage central.”

 

1977: La fîn couronne l'oeuvre

 La fîn couronne l'oeuvre

 

Le Ménage ès Feuvres,

St. Ouën.

 

Lé 25 dé juîn, 1977.

 

Moussieu l'Rédacteu,

 

J'vai dans la gâzette qué la populâtion d'l'Île en gângne touos les jours. Les nouvieaux v'nus veinnent d'arriver au Mangni d's Augrès. Ieune des gâzettes montrait l'portrait d'deux ordgilleuses méthes et lus êfants nouvieaux-nés. J'ai oublié à tchi tribu tchil' appartchiennent - la tribu “Gorille” pour ieune des deux, i' m'sembl'ye. N'împorte, j'ai 'te d's heuthes à reunminner et êprouver à m'èrsouv'nîn à tchi qué chutte m'nèe Gorille-là r'sembl'ye. J'ai veu eune pèrsonne dé tchiquebord tchi lî r'sembl'ye comme deux d'goûts dg'ieaux. Mais iou? Etait-je-t-i' en Améthique, dans l's Îndes ou en Afrique? Ch'est drôle comme nou peut pèrdre d's heuthes dans des temps à penser à tchiquechose dé mème sans pouver rêsoudre la tchestchion. Eune chose tch'est r'mèrquabl'ye: la mode a 'té ches dreines années pour les hommes d'aver l'vîsage barbu. Les nouvieaux v'nus ont l'corps barbu mais l'vîsage nu. V'la tchi s'en va-t-i' êtablyi eune nouvelle mode?

 

1961: Les patates s'en veinnent vite

 Les patates s'en veinnent vite

Pas d'changement d'Connêtablye à Saint Louothains

 

à Portinfé,

Saint Ou.

 

Moussieu l'Editeu,

 

Hier matîn, en dêjeunant, la Merrienne mé dit qu'oulle avait 'té vaie ma bordeuse, et qu'ou criyait que j'dév'thais m'mettre à houetter. I' s'en veinnent si vite chais jours,” oulle ajouôtit, “que si tes patates n'ont pas d'ma, nou pouôrra les dêfoui tchique temps d'vant la fîn d'Avri.”

 

“Vèthe,” j'li dis, “mais pâslant d'patates, j'si v'nu à penser que ch't'année, à bein des bords, i' pouôrraient aver un drôle dé goût.”

 

“Et pourtchi, chonna?”

 

“Parsque y'a yeu des chents vregies de tigots d'bricolis tch'ont 'té enfouis par les tracteurs; épis, y'a étout chutte salop'thie dé compost mêlé dans la tèrre. J'ai persuadé que les patates éthont un goût d'bricoli et d'compost, et qu'les gens craithont que ch'est une nouvelle sorte de Rouoyale, ch'est-à-dithe les siens tch'i' ne s'sont pas empouaisonés. Es-tu de m'n opinion?”

 

1948: Merrienne chooses her candidates

 Merrienne chooses her candidates

 

Moussieu l'Editeu,

 

La Merrienne, ayant abandonné l'idée de s'mettre sûs les rangs pour Sénateur est ach'teu en train d'chouâisi les candidats tch'y l'y pliâisent. J'y'avais êcrit une liste de touos chais mêssieux, et hier au sé, après l'tais, la v'la tch'y met ses lunettes et qu'menche à considéthé.

 

“Y'en a djais-huit ichin,” ou s'fit. “Es-tu ben seûx Ph'lip que toute chutte dgâingue-là tcheindra bon?”

 

“Je crai qu'oui,” j'l'y raiponnit. “N'y a qu'san câs l'Député l'Feuvre de Saînte-Mathie tch'y n'a pas ocquo promint. Y'en a tch'y disent tch'y préféth'thait être Connêtablye.”