1992: Youth Club

  

J'sis dé t'n avis,' sé fit i' Ph'lip Desclios en r'vénant l'aut' sé d'l'Assembliée, 'ch'est eune vraie hounte qué la Pâraisse brûle des milles et des milles louis sus chu souo-disant Youth Club. Dans not'janne temps j'avaîmes not' club étout, ch'tait dans l'êtablye à vaques, avec eune scabelle et eune canne à traithe. V'là tchi n'coûatait rein à la pâraisse, j'aidgiâmes à nos parents et ch'tait eun vrai pliaisi qué d'traithe. Achteu les gamins et les hardelles, i'n'sount pas countents si i'n'ount pas des discos, du brit d'musique si haut qué nous en affole et, bah, eun potîn d'enfé à êffriter tout l'vaîsinné. Et en d'sus touas les milles dé louis que j'avouns déjà brûle là-d'sus j'v'nouns à ces sé dé lus fourni acquo trais milles louis. J'éthaîmes mus fait dé nos allumer la pipe avec des billes dé banque!'

 

Coumme qué t'as raison', j'lis dis, 'ieune des pus belles mémouaithes qué j'értcheins d'ma janesse ch'tait d'êt' dans l'êtablye à traite. Mais pas touas les jannes gens d'au jour d'aniet sount dans l'fèrmage, et la puspart des siens qu'y sount né gardent pus d'bêtes ou, s'il'en ount, i'n savent pas l'pliaisi d'traithe à la main, i'fount servi d'ches maudites macheinnes à traithe. N'y'a autcheun pliaisi là d'dans. Et d'même les jannes d'achteu exigent, coumme si ch'tait lus drouait, des Youth Club. Eh bein, si ch'est cheunna qu' ches pouorres bégauds veullent i' peuvent les aver, partchi qu'i' n'embêtent pas les gens et qu'i' payent lus mêmes pour lus niollîn. Mais pourtchi qu' té et mé, qu' avouns travailli dû toute not'vie pour gagni lé p'tit qu'j'avouns, pourtchi aller brûler nos sou sus ditelle niais'rie? Mais chest là vie d'achteu. Les gens sount v'nus à craithe qué j'avouns autant d'sou qué y'a d'ieau dans la mé, et qué j'pouvouns en dêpenser autant qué j'voulouns, n'importe sus tchi bêtise. Ch'n'est reinqu'achteu, quand il est trop tard, qué les membres d's'Etâts c'menchent à s'gratter la tête - les siens, et n'y'en a a pas fort … qu'ount eune tête à gratter, et à d'mander si i'n'est pas temps d'arrêter l'bidet et d'lis mett' la groumette. Mais, quand l'bidet est déjà abanoun, pour l'i' mett'la groumette i' faut dabord le rattraper. I'ya prêt' acquo tchiques Jèrriais dans l's'Etâts tchi saithaient s'y prendre, mais, dis mé, coumbein d'vrais Jerriaise y'a t'ti achteu dans l's 'Etâts?'

 

'Mais, s'fit l'Ph'lip, 'dès qu'tu r'veins en Jèrri y'a chinq ans, quand tout allait si bein et qué j'taîmes à faithe tant d'sou tu 'tais à prédithe qué chutte prospérité 'tait malsaine et qué l'avârie s'n allait vite v'ner, aussi suthement qué la niet suit l'jour. Coumment dgiâblyé qu' tu savais, qu'tu 'tais si certain, qué l's affaithes s'n'allaient touaônner mal? Es tu tchique sorte éd prophète?'

 

'Mon garçoun', jé m'fis en riant, 'si j'tais prophète et pouvais prédithe l'av'ner j' s'rais autrément pus riche qué jé n'sis! Mais dans mon temps, dans bein des pays, j'ai veu s'dêrouâller chein qui s'dêroualle achteu en Jèrri. Prends par exemplye les Etàts Unis d'Amérique. Dès la fin d'la dgèrre en quarante chinq, et pour bein d's années après, l'Amérique 'tait l'pus fort et l'pus riche pays du mounde. Achteu les Ameritchains sount presqué souas l'fou. Et coumment qu'i' sount v'nus au pité qu'i' sount d'dans au jour d'aniet? Ch'est viyant qu'i' criaient qué les pouvé, les richesse, lus forche militaithe et êconomique s'n allaient durer à tout jamais. Mais, vais-tu, i' n'en est pas d'même sus chutte terre. Coumme nos dit le vièr ditoun: 'tout lasse, tout casse, tout passe.'

 

'Mais au mains l'Amérique est eun pays assez grand et avec assez d'érsources pour s'en dêhaller. Mais coumment qu'eune faillie p'tite île coumme Jèrri s'en va s'en dêpiautchi? J'soummes prîns dans la trappe du malheu, et autre qué d'prendre des m'suthes qué nos Etâts n'ôsent pas prendre i' nos n'est laissi qué d'éspéther qu'les affaithes sount vount s'ramoder. Et, déjà prîns dans chutte trappe-là v'là, nous, les Trin'tais, à brûler des sou sus chu Youth Club! Qué l'Buoan Djeu nos pardounne, car la raisoun et l'buoan sens nos pardounn'nouent cértainement pas'.

 

J'taîmes arrivés au haut d'la Route du Presbytaithe, ouest qu'nos c'mîns sé s'parîtent. 'J'avais pensé, s'fit l'Ph'lip, 'dé t'inviter à ragagni siez mé et d't'offri ravigotter l'esprit. Mais, après chein qu'tu veins dé m'dithe, j'sis d'avis qu'i' vaudrait mus garder chu lèrmîn-là pour lé Dénounciateu quand i' veint faithe sa Visite'.

 

Et d'même, buoannes gens, tout seu', lâssé et la gorge hardi à sec, j'm'en fus siez mé et jé m'mîns au liet.

 

Lé vier Trin'tais

JEP 15 August 1992