1906: Une Histoire (vraie)

 Une Histoire (vraie).

 

L'Anmin Phlip' tchi d'meutheai à la campanne, avait un tas d'anmins en ville, et il avait l'habitude de crier à les vais en passant, yieun de ses grands anmins était un nommai Gaudin, tchi gardai une boutique pas bein lien de la “Fèthe à Bêtes;” ï l'y vendait toutes sortes d'êpie'cies, et ï gardait des figues sur san compteux.

 

L'Anmin Phlip', quand ï viyiait de tchi bon à manghi oprès d'li, ne pouvait pon rèsisté à la tentation d'en prendre pour manghi, ou s'y n'pouvait pon l'manghi sans être veu y l'mettait dans sa pouchette, pour le manghi pus tard à s'en d'laîsi. S'en anmin Gaudin s'était bein apperchu d'ses farces, et un jour le vïant v'nin de lyien, ï meins sa boiëte à figues sur l'compteux avec une figue tout près d'la boiëte. L'Anmin Phlip, étant entrai et après avé dit à s'n'anmin le bonjour, s'assid, sans faithe le meinne de rain, oprès des figues.

 

L'Anmin Gaudin, s'ent fut tout exprès dans unne autre partie d'sa boutique, tuounnant l'dos à l'Anmin Phlip'; dans l'entre temps l'Anmin Phlip' avait avisai la figue (il avait les yiers bons et l'nais bein fein) et pront coumme la poudre qu'il 'tait, vite en sans auqun souci ou'd'sendit avaut s'en gôzi. L'Anmin Gaudin en arrivant à san compteux, se meins, apparemment tout gênai, à cherchi pour tchique chose, ï tuonne et ratounne tout sur l'compteux, tellement que l'Anmin Phlip' l'y d'mandit pour tchest tchil'tait à cherchi? Mais Mess Gaudin l'y rêponnit bein rupaiement : Laisse mé en r'pos! et continuit à cherchi de pus bel; mais l'Anmin Phlip' 'tait gênai et ï fît la question une deuxième fais : Mais tchest don qu'tu cherches? S'n'anmin l'y rêpondit : “Je soummes remplis d'rats, et j'avais empoièzonnai une figue pour lus dounné, j'lavais meinze sur le compteux et j'en' la vai pus! Ah! se fît l'Anmin Phlip', “j'ai manghie!” Et pis che fut là que l'Anmin Gaudin se mins à battre ses bras, coumme si n'formaient pon partie d'sen corps; ch'tait coumme des ailes de moulin-à-vent, et y s'meins à dithe : Ah malheutheux! Ah malheutheux qué j'sis! J'veins d'empoiëzonné le plus grand anmin qu'j'ai au monde, et, en veint tout au mé'ses'pé et se meins à tappé bein dû sus s'en'estoma et pis y preins d'un diver embront un tumbler, ï l'y meins d'la moutarde, d'l'huile duouche, du vinaigre, du paivre, du sai, et un tas d'autres ramas'scies, et pis vos tuounnit et ratuounnit tout dans san grand verre, et il 'tait tout pien, et pis y donnit toute la verraie à s'n'anmin, l'y disant : prends vite, avale tout!

 

Mais tout l'temps que l'Anmin Gaudin 'tait à prépathé san stuff; l'anmin Phlip veint a avé caud ès ouothelles, et tout muouillï d'sueu, et bian comme une chique, et quand y l'y dît “avale tout,” chest que j'vos promets bein qui'n'fît pon d'compliements, et down it went avaut sa gorge, clean as a whistle; il étheai avalait l'verre ait-ou s'il avait fallu, avec la tchulliy. Mais la dose était tellement forte qu'ou 'restait pon longtemps à bas! ï smeins à vomi (respect d'vous) et a vomi jusqu'à qu'la figue erveint; ce fut là l'moment que l'Anmin Gaudin pathu contant! té v'la sauvait se fit ï, et y n'fît que répété : Hélas! Hélas! si j't'avais empoiezonnai! Té qu'est man pus grand anmin au monde, j'en m'en sais janmais er-pardonnai!

 

Inutile de dithe qu'après chounna l'Anmin Gaudin put bein trusté l'Anmin Phlip' et y put bein mettre tout chein tchi voulait sur l'compteux, l'Anmin Phlip' pour reim au monde, n'en étheai pon manghi!!