1895: Un Buon Vier Jerriais

 Un Buon Vier Jerriais.

Vos en souv'nous du buon houmme Ph'lip Roumri du Mont Canté? ma fingre! tout vi qu'y tait (il avait septante ans bain sounnées) y prenait s'narme quand v'nait la saison d'la chasse, et nou l'viyait mâté près des fossais ov san vier chen “Black.” Ch'tait pliaisi de le vais, un vier Jerriais d'la vielle race ch'ty là, et un villais par d'sus l'marchi. Il en'tait tout fi. Y a bétôt quarante ans j'entry l'vais un Dimanche au sé. Y dounait un coup d'bringe à ses neuves brais, et y paraissait tout raijoui. “Chêque y a d'nouvé mess Roumri?” – J'sis r'venu d'Paris, hier matin, valet, v'là ch'qu'y a d'nouvé, et j'n'm'y pliais pas du tout. Les gens d'par ichin m'estybochais tréjous et m'racontaient un tas d'gnolet de chu Paris, et m'disaient que j'serais èsgalué quand j'contemplerais les miracles que nou s'y viyait, ch'y bêtises! quant à mé j'm'sis mins coum' nou m'avait dit tout près du gardin des Tuileries, et jé r'gardis du bord d'l'arche de Triomphe. Ch'est de ché be, sans doute, mais ch'la n'vaut pas la veue qu'nous a quand nou s'met près d'la statue dans l'vier marchi ichin en ville, et qu'nou r'garde la statue L'Sueue dans Broad Street, avec Sherring Cross à l'aurizon! En v'là eunne belle veue!

 

J'm'en sis bain vite ervenu. Nou n'a rain à mangi dans chu Paris. J'fus dans un reste au Rand qu'nou m'avait indichi, et j'massievi sus un banc quand un biau moussieu en cravate bianche et en casaque a coue d'pie, habilly coum l'prédicateur chi nos arrive d'France chiq' fais, vint m'offri un brévieze ch'avait l'air d'eunne p'tite gazette, chiq'chose coum' la voie d's'Iles d'autfais. Tu sais bain valet qu'papa ne dépenset poun fort d'sous sus m'n'èscolage, et je n'comprins rain de ch'qu'y avait d'sus. Enfin j'mins man dé sur la prémièze ligne, et y m'apporti eunne assiette avec deux liards de soupe dedans que j'avalis bétôt.

 

Pis l'biau moussieu me r'presenti la p'tite gazette, et je r'mins man dé sus la s'conde ligne.  Man buon' homme' ch'tait ocquo d'la soupe. Enfin j'em sis dit j'vaindrons bétôt à la viande et je r'mangi ch'qu'y avait dans l'assiette, ch'tait d'la soupe rouoge et èpaisse avec du paivre, man buon'homme, j'en èsternue ocquo quand j'y pense. Et n'er vechin la gazette. Tu n'elcrérais pas, ch'tait quo d'la soupe, d'la soupe de pais. J'n'osais rain dire au biau moussieu, ch'avait ocquo l'air de s'moqui d'mé. Enfin je m'dis je n'peux pas mangi tout che qu'y a sus la p'tite gazette, et quand y m'la rapport j'en sauty eunne vingtaine d'lignes et je pointy sus chique chose à la fin. Jamais tu ne d'vinerais che qu'y m'dounni : “un p'tit verre ou êque y y'avait eunne preune verte dedans avec eunne goutte d'iau d'vie.”

 

Man pouor garçon, j'payi bain vite; j'er saute jusqu'à l'hostel, jé r'prins eunne cab, pis le k'min d'fé, et m'er véchin. Escoute m'é man vi, n'va jamais à chu Paris!

 

Ch'la n'fait d'rain, Phlip Roumri n'avait poun té au Collaige, mais ch'tait tout d'même un bain brave houmme. La drenne fais que j'lis pâli ch'tait à l'eslection dans l'marchi et y'm dit, les Jerriais s'en vont man buon houmme, n'y en erra bétôt pus.

 

Les jeunes garçons voudraient touos d'venin des messieux angiais, et pis dans nos campannes je n'ouions que du Breton. Oué qu'i sont les Jerriais d'man janne temps.

 

Eh! pis l's'èlections achteu n'valent rain du tout. Nous s'crérait à un enterrement! Je m'souvains quand j'tais mousse avé veu les Mont au Prêtriais s'naller à l'èslection de Moussieu Perrot et d'Moussieu Frank Godfray, bannière en tête, et la rose à la boutounnière, et si rencontraient chiq' èslecteu ov un mio d'louori espilé à sa casaque, y sautaient d'sus coum un cat sus eunne suoris. Et quand y r'venaient le sé tout près d'miniet, ils avaient lus casaques toute minchis, chitchin avait un black eye, et l'autre cliopinait, mais chequ'il en t'ait, nous avait gagni la victoithe.

 

Achteu tout l'monde vote coum y veurt, et noun bé pas même eunne goutte de vin à la santé d'son candidat. Oué qu'est le buon vier temps?