"Si........."

Né v'chîn l'texte d'aniet d'not' auteu du mais, Jean Picot (J.P.):

Here's today's text by our author of the month, Jean Picot (J.P.):

"Si........."

Si y'ià alentou d'nous dé la dîsette,
Si tchiq's'uns s'plaîgnent du manque dé sous,
Jé lyièsais l'autre jour sus la Gâzette
Qué ch'n'est pas d'maîme partout!

Qué les Banques en Amérique
Sont tréjous ouërtes - jour et nièt,
Faût-y qu'il' aient dé la pratique,
Pour pouver faire ditêt!...

Ch'est du travâs ès Millionnaires,
Des hoummes à dolleurs - mais, coumment gâgnis?
Ch'n'est pon les p'tits propriétaires
Qui gardent les Bantchièrs èsvillyis!

Dans un coffre-fort à doub'ye cliè
Aver un tâs d'sous enfrummès,
Ch'est là lus idèe d'la Charitè,
Mais ch'est la cheinne "bein ordounnèe"!

Ah, si tchiq' raide bouan Missionnaire,
Pustôt qué d'aller ès payiëns prêchi,
Happait un grand Millionnaire,
Et parvénait à lé converti,

Lé faire vais qué d'garder tout s'n'or et argent
Est lé qu'min qui mêne à la perdition:
Non n'bliaûm'rait pon Moussieu lé révérend,
Si s'faisait bein payi pour sa bouonn' léçon -

Et si lé Millionnaire s'décidait à dèslier sa bourse,
Dé disposer coumme i faût dé san bein,
J'en counnais hardi qu'iraient au "pas d'course,"
Pour être les premièrs a l'y tendre la main!...

Enfin, si deusse trais d'yieûx v'naient démeurer ichin,
Djiantre, nos gens vos les taxéraient t'y!
Et nou n'souffrirait p't'être pas lé temps à v'nin,
Des suites d'un "escart" ou d'un "déficit"!

Tout chounn'chin n'est qu'un "Si,"
Et "Si" n'est pourtant qu'un p'tit mot,
Si tchiq'fais n'est pas hardi,
Et dans d'aut'temps y'i'est trop!

(Exemples: " Si j'ôsais, j'l'y d'mander'rais dé m'prêter ching ch'lins."
" Si tu m'bailles trop d'ta goûle, j'té f...... man pi'd, etc., etc.!)