A Elie

Né v'chîn l'texte d'aniet d'not' auteu du mais, Jean Picot (J.P.):

Here's today's text by our author of the month, Jean Picot (J.P.):

A Elie

Elie, Elie,
Les escrits
Qué tu'as fabritchi dernièrement
M'affligent... jé n'sait trop coumment
Té ramm'ner un mio au bouan sens.....
Tu t'pliais à è-tibotchi lé Gérant;
Est-che la bliâze, est-che la chaleu'
Qu'y t'ont dé-maîme enduèrchi l'tchoeu?
Eh! s'y y'ià tchiq'chose dé "méslifique"
Portè pour "Show" à la "Chronique,"
Tch'est qu'là tchi t'fait, à té, Elie?
Si au Bureau y'ià du maïs
Qu'a tchinze pi'ds d'long, ou p'têtre bein pus,
Lé Gérant, pour ses ammins, fait don d'san mus...
Et lé ballot, lé matin, quand y faût cliergi
Du pliafond et racoins irâgnies et ponsi!...
Fait don coumme mé, Elie, prend tout au sérieux,
Né té fait pon pâsser pour un fichu moqueux,
N'abuse pon la Gazette... ait pus dé charitè:
Ergarde, jé t'en prie, sus la "Chronique" d'annièt,
Et gémis coumme notre ammin, gémis don bein haût
Parce qu'y n'yià pus dé vente pour les "p'tits animaux" -
Pense au pouôre pouôchin qui s'était èsguéré,
A la peinne du fermi qu'y l'avait èsl'vé,
Pense à ses tchinze jours sans rein à mangi,
Drière unn' foule de fagots tristément accliutchi!...
Voire, unn' foule de fagots! (Quand l'encanteur en vend,
Y n'pâsle pas dé foule, mais dé quart de chent...)
Allons, Elie, n'en rit pas, mais, coumme l'ammin, pense
A la "triste ironie dé l'existence" -
Et qué lé bouais souôs tchi
Y' l'avait trouvé dé l'abri
Quand lé poulet s'ra gras, servira à l'rôti!...
Mais jé n'en doute pas, quoiqu'l'histouaire est tou chante
Qué s'y'l'tait bein servi ov unn' "sauce piquante"
Y'n't'en s'rait pon d'rein, ma fé, d'en mangi!...

Enfin, Elie, prend chounn'chin dé bouann' part,
Et amende tes escrits devant qu'y sait trop tard.
Lé Gérant dé tes picagnes en paraît tout paîneux,
J'ai veu qué chounna l'y fait perdre les qu'veux -
Mais s'y'l'en perd sus la tête, y'ià occuo du bon,
Y n'en a don pas mal, ma fé, au menton!...