Lé Temps Pâssé
par F A Le M.
Au temps pâssé, nou marchait partout pa'ce qu'i' n'y'avait pon les mouoyens dé viagi alentou d'Île comme nou fait au jour d'aniet, qué ch's'sait en char-à-bancs ou en vouaituthes ou d'autres manniéthes dé transports. À ch't heu, nou peut s'pronm'ner en France ou en Angliétèrre qué s'sait par baté ou par avion comme lé temps pâssé, mais acouo mus, partout l'monde, par avion ou en grands navithes tchi nouos amènent qué s'sait en Ûrope, La Méditerrannée, Les Îndes et bein d'autres pays au lain. Et les lîngnes directes en Êcôsse, en Irlande, au Pays d'Galles, à Londres et jusqu'au Portûnga et ès Canâries par avion. Quand nou-s-arrive à sa destinnâtion, i' y'a tréjous du transport pouor vos am'ner à l'hôtel ou siez vos anmîns et nou n'a pon bésoin dé marchi autchun bord. Ichîn en Jèrri à ch't heu, un tas d'monde ont au mains eune ou p't-être deux vouaituthes pouor cachi partout. Bouistre d'mêtchi, j'n'avons pon assez d'exèrcice ches jours, et ch'est pouor chonna tch'i' y'a tant d'gros gens par les c'mîns. Souvent, nou ouait des vaîsîns à s'entr' êtibotchi et lus enhèrméler dans l'affaithes à d'autres pa'ce qu'i' n's'sont pon fortifiés auve eune bouonne pronm'nade à pid sus les c'mîns d'falaises ou sus la grève. Et pis étout, un tas d'monde r'gardent qué la télévision au sé. La vie d'à ch't heu, m'en pâle pon!
No comments:
Post a Comment