1918: Les tchians - Dogs

Les tchians n'taient pon râtionnés en 1918:

Dogs weren't rationed in 1918:

I'y a-t-i' autchun d'mes lecteurs qui peuvent m'êcliaithi sus un certain point?

Je lus une lettre l'aut'e sé dans l'Evening Post qui suggérait que nous augmentisse la taxe sur les tchans afin de garder les pavés d'la ville pus propres!

Ah ça! par tchi procédé de raisonnement que chu correspondant-là pouvait prouver l'êfficacité d'san r'mède?

Je me d'mande mé, comment que l'montant d'la taxe payée sus un tchan peut contrôler les habitudes dudit tchan?

Est-che qu'i' s'sait possibl'ye qu'un malheutheux tchan, taxé raique à un êtchu, en s'promenant dans la ville, se permettrait de céder à un caprice soudain et, sans l'moindre souci, lanch'ait un defi au Comité Sanitaithe, tandis qu'un autre, taxé à chinq chelins, attendrait à être ervenu siez-li?

J'ai quâsiment d'la peine à l'craithe.

Mais ch'n'est pas la prumié feis que nous a veu de patheilles sottises dans les gâzettes. I' y a tchique temps nous avait erquémandé la destruction de touos les tchans qui n'avaient pas un "pedigree" pour la même raison, ch'est-à-dithe, dans l'întéthêt des pavés... Mais j'ai veu mé, des feis sans nombre, dans les rues de chette ville ichin, des dames de la pus haute société à promener lus tou-tous aristocratiques au but d'un biau riban, des tou-tous qui fidguthaient ès "At homes" et ès receptions de ls noblièche, et qu'étaient supposés être tout ch'qui y avait de pus "well-behaved," lus arrêter tout court quand l'idée les prenait, et, malgré les saccades de lus audgustes maîtresses, lus comporter, eh bain, tout comme un tchan d'un simplye braconn'yi!

Si la taxe peut empêchi chenna, eh bain, faut taxer, sapresti!

Caouain
Les Chroniques de Jersey 5/1/1918