Lé Parapluie du Temps passé

Né v'chîn l'texte d'aniet d'not' auteu du mais, Jean Picot (J.P.):

Here's today's text by our author of the month, Jean Picot (J.P.):

Lé Parapluie du Temps passé

Jé voudrais vos pâsler entouôre pus d'unn' anchêtre
Fort et robuste qué n'ou s'a veu disparaître
A câuse dés modes dé not' temps -
Il' tait grand et solide - et n'ou pouvait souvent l'vais
Garder bein à l'abri - en s'y sèrrant dé près -
Deux hardelles et lus galants -

Un manche bein fait, coumme unn' moyienne ravaûle,
Qué n'ou 's'app'yiait raide contre s'enn' èspaûle
Du bord ouèqu' lé vent poussait la plyie,
Et i n'en changeait pon - i n'y'iavait pon d'dangi
Qué squâlle ou d'luge s'en 'allaient l'saccagi
Sa monteûre en' 'tait sa garantie -

Sa cou'erture était lé pus souvent b'yieue.
Et en d'dans d'la baleinne, châque brèdelle couôsue,
Et bein prinse dans la féraille du manche.
La pl'yie n'avait quâ'tchais, car unn' fais ou'ert
N'ou 's'tait à s'enn'aîse dessous lé corps tout couvert
Ov san d'sus bein èstanche.

Mé n'anchêtre - i faût l'dire - durait quâsi chent ans,
Lé père s'en servait - ôprès l'i, ses êsfants,
Sans aver bésoin dé grand racc'modage,
Lé parapluie d'famille bein serrè dans san coin
Tout prêt à s'en servi' en câs dé bésoin
Etait l'ordgi du maînage -

Unn' fais bein patchi, il 'tait gros et ventru,
I servait dé bâton ès vieux tant lé manche était du
Et bein assaîsounnè,
La poignie en bec dé corbin ov des yiers en verre,
Plièchie p'tétre un p'tit mio hors d'èsquierre
Ténait raide au poignet.

En ville, n'ou m'a dit, qué plusieurs Messieux
Ont fait un "Musée" ouèqu' tout chein qu'est vieux
Est bein merqui et cliâssè -
Jé n'sait si y'iont mint parmi paissons stoffès
Et squellettes dé bêtes dé maûvaise ernoûmmèe
Yieun dé m's'anchêtres: lé parapluie du Temps Passè???