A basse-iâue

Né v'chîn l'texte d'aniet d'not' auteu du mais, Jean Picot (J.P.):

Here's today's text by our author of the month, Jean Picot (J.P.):

A basse-iâue

Ah, coumme i faîsait c'aûd,
Et qué l'solèt lîsait,
Quand jé fûmes à basse-iâue
La belle Lîze et mé -
Dans la van d'un vaîsin,
Fraîche peinte et vernie,
Sus un biaû mo' couôssin
J'étions si bein assis
- Un mio près, il est vrai -
La belle Lize et mé.

Le grand Jos nos r'gardait
D'un' assèz maûvais y'i,
Car i s'était fiè d'aver,
La belle Lîze oprès d'li,
Si nou v'nait m'dire
Qué lé Jos est bein fait,
J'en bouff'rais d'rire,
Car pour mé, jé l'trouve laid!
Si Jos n'a pas d'biaûtè,
Vraîment jé n'm'en gêne pon,
Car j'ai tréjous passè
Pour être un biaû garçon!

Ch'tait là-bas au rôtchi
Qu'il' y faîsait bé,
Quand j'qu'menchîmes à pêtchi
La belle Lîze et mé.
Si parfais ou mouôillyiait
Dans tchiq' mâre ses deux pi'ds,
Ma chière Lîze faîsait
Dé drôlles dé p'tits cris...
Vite j'la prennais dans mes bras,
Jé l'y t'nais tendrément,
Et en la r'mettant bas,
J'y'iallais, oh si douôchement!
Man pouôre tchoeur battait
Coumme marté sus l'encliumme,
Quoiqu'pourtant Lîze né p'sait
Pas fert pus qu'unn' plieumme!
Ah, combein vite qué l'temps s'pâssait
Quand j'étions à basse-iaue, Lîze et mé!

J'trouvîmes, unn' fais ramontès,
Car j'étions les derniers,
Nos gens embarrassès
Ov lus pêques et panniers.
Quand que l'grand Jos,
Coumme un vilain apôtre,
S'en veint drière man dos!
Couler sa main dans l'nôtre!
Et lé jaloux qu'il 'tait,
- J'érais voulu l'achouëmi -
S'en fut conter qué j'n'avions pêtchi -
Entre' la belle Lîze et mé
Deux p'tites crabes et un baînit!
(Et, si faût l'dire, ch'tait vrai).

- Hélas, tout est changi pour mé acheteu...
Quand j'vais à basse-iâue jé sis tout seu'...
Ch'est ov lé grand Jos qué la Lîze hante...
Bouann' gens, voul'ous saver pour tchi?
Ch'est d'pis la mort d'unn' riche vielle tante
Qu'a fait dé Jos s'enn' héritchi!!! -