The First ‘Kobzar’

La Bibliothèque Britannique a bliodgi entouor la publyicâtion en 1840 dé ‘Kobzar’. À compather: la publyicâtion d'"Rimes Guernesiaises" en 1831 et d'"Rimes et Poësies Jersiaises" en 1865. La preunmié maîntchi du 19e siècl'ye têmouongnit à un întéthêt r'nouv'lé dans les littéthatuthes des langues dites régionnales en Ûrope.

The British Library has blogged ("The First ‘Kobzar’") the anniversary of the first publication of Taras Shevchenko's collection of poetry - a founding volume of modern Ukrainian literature. It's interesting to compare Shevchenko's influence with the founding volumes of modern Norman literature - the first published collections of Dgèrnésiais and Jèrriais poetry in 1831 and 1865 respectively. The first half of the 19th century witnessed a revival of interest in the literatures of so-called regional languages in Europe.

Eune Valentinne à la Souky

"Eune Valentinne (à la Souky)" - eune poésie (1864) en Jèrriais par Juvenis (Philip de Faye).

Un Valentîn

"Un Valentîn" - eune poésie en Jèrriais par Henri Luce Manuel (1818-1875).

Ma Valentinne

"Ma Valentinne" en mp3

1952: Lé Quatorze Févri (2)

Pouor la Saint Valentîn, né v'chîn l'adgèvement d'eune histouaithe dé Ph'lip et Merrienne des Chroniques de Jersey du 16/2/1952:

Here's the concluding part of a Valentine's Day text by Edward Le Brocq:

Lé Quatorze Févri

Les Valentines et l's'Ouaisiaux

(siette et fîn)

"Ch'tait un Vendredi, ch't'année-là," j'ly dit, et j'me r'souveins que quand vint l'dîmanche au sé, tu m'dis, pour la preumié fais que j'pouvais allé te r'condithe après la chapelle. J'éspethais assez qu'tu me d'mand'dais d'entré, mais quand j'vinmes end'hors de siez-té, tu m'dis à bétôt, sans seulement m'laissi t'embréchi."

"J'avais tait ben êl'vée," ou dit, "et j'n'éthais pas ôsé t'laissi prendre une telle libérté."

"V'la tchi vint pûs tard quand-même," je r'mértchit, "mais pour te dithe, Merrienne, ch'tait sans grande éspéthance que j'mont chutte Valentine dans la poste, car l'année de d'vant j'en avais envié yunne à une hardelle, tch'y d'meuthait dans l'bas d'l'Eta, et l'affaithe finit mal, car le dîmanche au sé, ou s'en fut, bras-d'sûs, bras d'sous, avec un individu du bord du Coin, et m'laissit en pliant."

"Tu n'm'avais jamais dit chonna," ou s'fit.

1952: Lé Quatorze Févri (1)

Pouor la Saint Valentîn, né v'chîn lé c'menchement d'eune histouaithe dé Ph'lip et Merrienne des Chroniques de Jersey du 16/2/1952:

Here's the first part of a Valentine's Day text by Edward Le Brocq:

Lé Quatorze Févri

Les Valentines et l's'Ouaisiaux

Moussieu l'Editeu,

J'tiomes à dêjeuné, Jeudi matîn, quand la Merrienne me d'mandit: "Sais-tu tchi jour que ch'est agniet, Ph'lip?"

"Ma fé!" j'ly raîponnit, "je n's'y pas trop seux, mais pourtchi qu'tu veur savé?"

"Tu veur me dithe," ou continuit, "que tu n'sais pas qu'ch'est l'quatorze de Févri."

"Damme," j'ly dit, "que che s'sait l'quatorze ou l'tchinze, tout ch'que s'sait ch'est que l'temps n'a pas belle mine, et qu'ch'est seux qu'j'éthons d'eau d'vant long, comme si la têrre n'était pas dêjà assez mouollie. Avec chonna, y fait une fraid d'tchan, et si la suée d'fraid qu'j'attrapit la s'maine passée n'amende pas d'vant dîné, j'îthai m'fouôrré au liet."

"Tu f'thas comme tu voudras," ou dit, "mais y faut que j'te diche que tu qu'menche à perdre ta mémouaithe, si tu n'sais pas tchèsqu'y soulait s'arrivé quand j'tiomes jeunes le quatorze Févri. Pense don pour une minute."

Et, Moussieu, sûs chonna, tchique chose me vint à l'idée. "Ch'est vrai," je m'fit. "Aut'fais nous envié un Valentine à s'n'amouotheuse. Eh ben, eh ben, est'y pôssiblye que j'avais oublié chonna?"

La Merrienne souôrit en s'versant une autre tâsse de tais. "Vèthe," ou dit, "et un jour j'en r'chut trais, épis trais belles, avec de bieaux vérsets. j'pensais ben qu'y'en avait yunne de té, car le postman me dit tch'il avait yeu ben d'la peine à lièthe t'n'êcrituthe sûs l'env'lope, mais j'n'ai jamais seu tchèsqu'y m'envyit l's'autres."

(à siéthe)

Toûtre ou dêtoûtre? - To cough or not to cough?

Y n'ia rein d'miyieu souos l'soleit,
Que "Johnson's Cough Mixture" pour un freit.

Où n'aveais ni besoin du docteu, ni du yiet,
Si où vouleais faithe justement comme j' ai fait,
Alleais dans David Place, siez de Faye l'Pharmacien,
Pour Johnson's Cough Mixture qu'a l'y seul appartient.

Limericks

Y'en avait iun du Carrefour Sélous
Tchi s'dguérit eune fais d'eune hôrribl'ye toux,
Car i' s'fit du syrop
Auve d'la graisse dé pirot
Et s'vantait, ma fé, qu'il avait bouan goût

Du Sitho d'Cârottes

Tranchiz des cârottes et couvriz-les auve du jaune chucre. Laîssiz pouor un coupl'ye dé jours. Prannez eune tchul'lée du jus trais fais par jour pouor dgéthi la toux

Des r'mièdes du temps pâssé

"Eh, bein," Manman lî dît, "ch'est bein aîsi. I' n'est pon bésoin d'êt' docteu pour en faithe.

L'Êtac'sé - the small stack

Aniet j'têmes à L'Êtac'sé auve tchiques artistes Jèrriais dans l'vièr Fort, et chenna pouor l'Don ès Arts d'Jèrri. S'i' y'avait ieu des batchieaux aniet, nou-s'éthait atchilyi d's artistes d'la France étout - mais l'arrivée d's învités a 'té r'tèrgie malheutheusement.

J'distchutînmes des noms d'pliaiche en Jèrriais et les formes du paysage - et j'èrcitînmes d'la poésie. Lé Jèrriais est eune înspithâtion!

1916: Some opinions on the Projet de Loi

Acouo un texte d'la Grande Dgèrre:

Another text from the Great War:

Some opinions on the Projet de Loi

"Avec tout chenna, tchès qui m'ditha d'en par ou-ès qu'j'en soummes avec la Loué sus la Milice?" s'fit Cliém R'non, en s'appiant sus sa have a crevette. "Pus j'èsprouve a comprendre et pus j'm'enphôtôme. Tchès qu'i' fait qu'l'affaithe n'avanche pon?"

J'taîmes chinq de nous, ensemlye, à bûsotchi pour de la crevette, souos la Cosnièthe, a la Roque; et coumme i' n'y'en avait djethe, j'nos taîmes assîs a mangi eunne bouochie ch'attendant qu'la mé dvallisse ocquo eunne demi-heuthe. Ch'fut quand la jougue fut viedde et qu'nous avait allumé ses pipes qu'la distchusson c'menchi. Piteur Langliais v'nait d'dithe que san fils 'tait a je-n'sai si fallait avanchi ou r'tchullé ses neuches souos les circonstances. Mé, j'lis dounni en avis d'mathié san mousse au pus vite, pa's'que, chose seuthe, le Coummité éthait d's èsgards pour les jeunnes mathiés quand vindrait l'temps d'fourni des extchuses pour ne pon marchi d'lavant.

1959: Une rude niet au Portinfé (fîn)

Né v'chîn l'restant d'l'articl'ye dé Ph'lip et Merrienne dé d'dans Les Chroniques de Jersey du 3/1/1959:

Here's the remainder of the piece by Edward Le Brocq published in January 1959:

Pâslant d'autre chose:- les Etats s'en vont bétôt siégi (je crais qu'ch'est Mardi l'treize) et j'ai veu la list d'sujéts tch'ils éthont à considéthé d'vant procédé pûs long. Y'en a dans les deux douzaines de chais projets, et l'preumyi ch'est l'sien que notre Député, le Majeur de Gruchy, présentit en chinquante-chinq pour la réorgagnisâtion d'la Milice.

Exoleune - exomoon

Nou liet qu'nou-s'a indentifié la preunmié exoleune.

Astronomy news: "first exomoon glimpsed".

• exoleune = exomoon
• exoplianète = exoplanet

Viyiz étout:

• Y'a-t-i' d'la vie sus Mars? - Is there life on Mars?
• Acouo des fîsées - more rockets
• La Leune - The Moon
• 1961: Gagarinne en orbite - Gagarin in orbit
• Vouler la leune - Asking for the moon
• Des langues et des noes - Titbits

1959: Une rude niet au Portinfé

Un but à propos d'Ph'lip et Merrienne dé d'dans Les Chroniques de Jersey du 3/1/1959:

Here's a topical snippet from a piece by Edward Le Brocq published in January 1959:

Une rude niet au Portinfé
La Merrienne sus l'plianchais

Mais, tchi temps! Hier, le Jour de l'An, lé solé brillait comme au mais d'Avri, et la Merrienne me dit que dans san gardin tout poussait. Les p'tits ouaisiaux chantaient à lûs câssé la gorge, et j'vit deux rouogegorges tchi 'taient à s'entre faithe la cârre. Mais agniet tout est changi.

Pour vos dithe, la Merrienne et mé j'avions yeu un mio d'brit en soupant, et quand j'ramontîmes pour nos couochi, j'vit bein vite qu'ou 'tait ocquo roupilleuse. Ou m'douônit l'dos, et s'mint aussi près du bord du liet comme ou pouvait. Dans les trais heuthes et d'mie il est v'nu une bouffée d'vent tch'a châtchit la maison, épis pûs tard est v'nu chu tremblyement d'têrre tch'a fliantchi la bouonnefemme tout san long sûs l'plianchais. Ou s'est minse à faithe des brais, et, Moussieu, jamais ou n'craithais la djobbe que j'ai yeu à la r'méttre au liet. Vlà tchi y'apprendra, la vieille tétoigne, de s'êloigni d'san bouonhomme quand j'allons nos couochi. J'veins justement d'l'y porté une tâsse de tais, et ou s'pliains ocquo, mais j'peux vais qu'ou n'a pas yeu grand ma. Et don, j'ai décidé d'vos êcrithe de bouonne heuthe, pour avé tchiquechose à faithe, car y n'fait pas d'temps d's'en allé d'hors. Il est vrai que j'pouôrrais allé traithe, mais une heuthe de pûs ou d'mains ne f'tha pas grand' difféthence à la quantité d'lait tchi portent dans lûs minséthablyes piéchots...