Du Jèrriais et des couôteunmes à la télévision Française aniet:

"À quelques kilomètres du continent, les îles anglo-normandes ont un secret bien gardé. Leurs paysages de dunes et de falaises sont connus des vacanciers et leur statut fiscal avantageux fait le bonheur des banquiers. Au-delà des clichés, ces paradis ont leur propre culture."

1962: Merrienne n'a pas d'chance

Merrienne n'a pas d'chance

Un vièr St. Ouennais et sa béthie

À Portinfé,

Saint Ou.

Moussieu l'Editeu,

Vraiment, la pouôre Merrienne n'a pas d'chance chais jours. L'autre matîn, tandis qu'ou 'tait d'hors, ou s'trouvit trop prés d'une vêprièthe, et dans un couplye d'heuthes ou 'tait dêconnaissablye. Même à ch'teu ou porte les merques de chais sales bêtes sûs san visage. Epis, pour agver tout, ou s'est mînse à m'fliantchi des co-d'pids dans l'dos à trais heuthes à matîn.

Ichîn, i' faut que j'vos explyique que mé, quant j'si couochi, j'voudrais aver tout freumé, mais ma femme a tréjous dit qu'ou n'peut pas dormi si n'y a pas un bouon couothant d'air dans la chambre, chein tchi fait que yunne des f'nêtres est tréjous large ouverte. Et chein tchi m'a fait rêvillyi si soudainement ch'tait parsque une cauque-souothie avait entré et 'tait à voltiger d'un bord et d'l'autre dans la chambre. Mé, j'l'éthais laîssie trantchille, sachant qu'ou s'en r'itha comme oulle 'tait v'nue, mais la Merrienne, tch'a tréjous yeu peux des cauque-souothies, avait fouôrré sa tête souos les couvertuthes et însistait que j'éthais à me l'ver pour la cachi d'hors.

À ch'teu, Moussieu, av-ous jamais êprouvé à attraper une cauque-souothie dans l'mitan d'la niet avec l'aide d'une chandelle et d'une bouonne chouque? Y'en a tchi dîsent tchi sont aveuglye, mais ch'n'est pas vrai, car chette-chîn êvadait ma chouque sans s'troublier, et si au but d'une bouonne dém'ieuthe ou n'avait pas décidé tchi faisait pûs bé d'hors, et fichi san camp, j'éthais envié pour le Chantgni. Une fais qu'ou 'tait horte, j'freumis la f'nêtre, et d'pis chonna i' n'y a pas yeu de couothants d'air dans notre chambre, et la Merrienne a décidé qu'ou peut dormi tout à fait beinsans. Comme j'vos l'ai dit plûsieurs fais, Moussieu, les femmes sont drôles!

1978: D'èrtou en Jèrri

  D'èrtou en Jèrri

Le Ménage ès Feuvres

St Ouën

Lé 3 d'juîn, 1978

 

Moussieu l'Rédacteu,

 

Quand j'èrvîns en Jèrri l'année pâssée j'mé dêcliathis chanceux d'pouver continnuer à viagi en Jèrri dans mes vièrs jours. Eh bein, m'y r'vélà acouothe eune fais, un an pus âgi et j'peux acouo exprînmer ma jouaie et l'pliâisi dé pouver r'vaie mes vièrs anmîns et d'èrmarchi les vièrs quémîns ichîn ès Landes qué m's anchêtres ont vressé tant dans l'temps jadis, et sanctifiés par lus duthes vies, lus couothage et îndustrie.

 

Et comme l'année pâssée j'peux m'ramémouaither qu'en 1955, quatre ans après la foundation d'L'Assembliée d'Jèrriais dé tchi j'eus l'honneu d'êt' lé preunmié Ségrétaithe, des vèrsets întitulés “ Rafales dé d'Siez Nous” mé fûdrent dêdiés dans san dgiexième bulletîn. Né v'chîn iun d'ches vèrsets:-

 

“Man vièr Jèrri -

J'y tcheins -

M'èrvélo, ch'est finni! . . .

Quarante ans hors au large . . .

 

J'm'en r'veins pour y mouothi.

Jé s'sai l'tou d'La Corbiéthe

Dans tchiques sémaines d'à ch't heu!

Jèrri – où'est qué j'sis né-

Mon doue, mais tchi bonheu!”

 

1976: Lé j'va

  

Lé j'va

Le Ménage ès Feuvres

St. Ouën.

Lé 28 d'août 1976

Moussieu l'Rédacteu,

 

Lé supèrbe bulletîn spécial dé Quart d'An d'L'Assembliée d'Jèrriais, fondée en 1951, veint d' pathaître pour célébrer ses vîngt-chînq ans. L'histouaithe dé ses activités duthant chu quart dé siècl'ye est r'cordée dans les bulletîns tch'ont pathu rédguliéthement souos la rédaction du Docteu Frank Le Maistre OBE, Membre des Académies dé Caën et d'Upsala et ouaithe qué j'les ai lius bein des fais j'trouve tréjous du pliaîsi à les r'liéthe viyant qu'à châque fais j'vai acouo tchiquechose întérêssant d'dans.

 

J'viyais, par exempl'ye dans l'chein d'La St. Miché et Noué d'1959, un accompte dé cèrtaines crianches entouorre un fé à j'va, et étant, nou peut dithe, quâsi êl'vé dans eune forge, j'sis êtonné qu'man P'pèe ou man Papa né l's avaient pon mentionnées. Ch'tait probabliément d'ma faute, car j'les tempêtaient tellement d'tchestchions au sé tch'i' n'avaient pon l'temps dé m'dithe aut' chose qué d'rêpondre mes tchestchions.

 

Ieune des crianches est tch'i' n'faut janmais env'yer hors un fé à j'va, car ch'est env'yer sa bouanne chance avec. Eune autre est qu'un fé à j'va clioué en d'ssus du capé d'eune porte ou d'eune fénêtre, les caûcoins en haut, est bouanne chance. D'aut' craient qué les caûcoins dév'thaient êt' en bas pour qué la bouanne chance né s'êcappe pon! Nou clioue, étout, un fé à la porte d'eune êtabl'ye à j'va, et au grand mât d'un navithe.

 

1978: J'vouos vèrrai beintôt!

 J'vouos vèrrai beintôt!

Trenton

Michigan

USA

Le 27 dé mai 1978

 

Moussieu l'Rédacteu,

Auve lé prix d'siex ch'lîns pour un pain annoncé dans la gâzette du six d'avri, ch'est eune raide bouanne chose qué les pains d'à ch't heu n'sont pon d'la grôsseu des cheins qu'nouos grand' méthes fouângnaient l'temps passé car i' couôt'taient eune petit forteune à chu prix-là. Les jannes d'à ch't heu ouvrithaient l's ièrs s'il' en viyaient d'même. Les grand'méthes les prannaient à la braichie pour en coper eune tranche. J'en mang'geais bein eune tranche couvèrte d'eune couoche de bouan beurre dè couleur d'or, comme nou s'en régalait dans l'temps. Chu pain-là 'tait fèrme et solide et avait du gout. I' n'tait pon comme lé failli mo pain d'acat d'nouos jours souvent copé en finnes tranches à la machnine quand nou l'acate.

Ch'est bein seux qu' les mousses né peuvent pon adguchi lus dents sus la crôte, et les anciens l'éthaient cèrtainement appelé du pain à pouochîns.

En pâlant d'pain v'là tchi m'ramémouaithe tchiques ditons où'est tch'il est mentionné. Par exempl'ye, pour èrmèrtchi tch'i' faut du temps et d'la pâcienche pour tchilyi des pais d'camp, nou dit: “Ch'est un long pain!” Pour donner eune idée d'la quantité d'mangi tch'i' faut pour nouôrri eune fanmil'ye, nou dit: “Siez Ph'lippe, tch'eûdrent eune fanmil'ye de 21, il' avaient tréjous l'pain au fou!” Quand eune pèrsonne sé trompe en d'visant nou dit: “Ou dit pain quand ch'est gâche!” Pour dithe qué tchiquechose né couôte rein ou n'a pon d'valeu, nou dit “V'là tchi n'mange pon d'pain!”

1976: Contentement pâsse richesse

 

Contentement pâsse richesse

 

Le Ménage ès Feuvres

St Ouën

Lé 4 dé septembre 1976

Moussieu l'Rédacteu,

 

Y'a trais choses tchi dominnent les nouvelles dans la gâzette ches jours, les grèves par les sŷndicats des travailleurs, lé manqué dg'ieau et la grande s'crèche. Tout est boulevèrsé. Et ch'n'est pon seulement en Jèrri. L'ordre, la tranchilité et l'respé pour la louai et la r'ligion n'sont pus. Ch'est à peine si les grosses têtes des gouvèrnéments piêssent empêchi les nâtions dé s'mett' en dgèrre, et pourtant les deux dreines grand' dgèrres 'taient supposes d'apporter fîn à l'idée dé s'entre quétilyi pour rêsoudre les disputes entre les nâtions. L'organisâtion appelée “Les Nâtions Unies” fut êtablyie pour les rêsoudre par la distchussion paîsibl'ye lé tou d'la tabl'ye et aboli la dgèrre. Mais tch'est tch'i's'arrive? Les nouvelles pétites nâtions, ayant eune vouaix êgale ès grandes, mett' des bâtons dans les reues et votent contre ieux ouaithe tch'il' aient fait d'lus mus pour les mett' sus pid et maint'nîn lus îndépendances. Dans l'entrétemps les dgèrres continnnuent ichîn et là, et L's Êtats-Unis d'Améthique continnuent à payi pus qu' lus châre des frais d'entrétchein d'l'organisâtion en espéthance qu'ou s'en va, à la fîn du compte, contribuer à l'êtablyissement d'la paix dans l'monde.

 

La plyie pathaît aver pus d'peine à v'nîn en Jèrri qu'les touristes. Il en a pourtant tchée en quantité en Angliétèrre, mais ou n'a pon voulu v'nîn jusqu'ichîn. J'espéthe qué les gens s'en vont obéi l's autorités et couoyer l'ûsage dg'ieau tch'est si nécessaithe pour lé maintchein d'l'homme et du bestchias. Nou vait acouo les mêmes sîngnes dé plyie qu'nou viyait l's aut années, et nou peut dithe “Ch'est sîngne dé plyie!” ou “L'temps est sus la plyie!” mais la plyie r'fuse d'obéi les sîngnes!

 

Bouan Pâques!

Bouan Pâques!

Jèrriais · La Bouonne Nouvelle s'lon Jean, chapitre 20, 1 - 17

À sinne dé jeu l'preunmié jour d'la s'maine, d'vant qu'lé solé fûsse lévé, Mathie Mad'laine vînt à la tombe et r'mèrtchit qu'la pièrre avait 'té emboulée d'la brècque. Ou r'couothit don à Simon l'Rotchi et l'aut' approti, l'chein qu'Jésû aimait, et ou dit, "Nou-s'a dêhalé l'Seigneu d'la tombe, et jé n'savons pon iou qu'nou l'a r'mué!"

L'Rotchi et l'aut' approti don lus arroutîdrent à la tombe. Les deux dg'ieux couothaient, mais l'aut' approti couothit pus quédaine qué l'Rotchi et gângnit l'preunmyi jusqu'à la tombe. I' s'baîssit et êpyit par dédans les lîncheurs y'êtrav'lés, mais i' n'y'entrit pon. Épis Simon l'Rotchi, tchi vînt souotre li, y gângnit et entrit dêliêment dans la tombe. Il y'êpyit les lîncheurs et la chique tch'avait amathé la tête à Jésû. Mais la chique 'tait ballotée du bord, cârrée des lîncheurs. Épis l'aut' approti, l'chein tchi 'tait arrivé l'preunmyi à la tombe, y'entrit étout. I' vit tout et crut. (I' n'comprannaient pon acouo qué s'lon la Sainte Êcrituthe Jésû 'tait pouor êt' souôl'vé des morts). Là-d'ssus l's approtis rentrîdrent siez ieux.

Mais Mathie restait mâtée l'avant à la tombe en plieuthant. Et quandi qu'ou plieuthait, ou s'baîssit pouor aver un apèrto dans la tombe. Et ou vit deux m'sagièrs en habits êgaluants, assis là où'est qu'lé corps dé Jésû avait 'té pliaichi, l'iun à la tête et l'aut' ès pids. I' lî d'mandîdrent, "Bouonnefemme, pouortchi qu'tu plieuthe?"

"Nou-s'a dêhalé man Seigneu," qu'ou s'fit, "et jé n'sai pon par iou qu'nou l'a r'mué." Un co qu'oulle avait dit chenna ou s'èrtouônnit et êpyit Jésû mâté là, mais ou n'réalîsit pon qué ch'tait Jésû.

"Bouonnefemme," qu'i' s'fit, "pouortchi qu'tu plieuthe? Tchi qu'tu chèrche?"

Ou criyait qué ch'tait l'gardîngni et ou dit, "Moussieu, si ch'est qu'tu l'as r'mué, di-nous par iou qu'tu l'as pliaichi, et j'l'èréthai."

Jésû lî dit, "Mathie!"

Ou s'èrtouônnit à li et briyit, "Rabboni!" (v'là tchi veurt dithe "Maît'" en Araméen).

Jésû dit, "Né m'croch'te d'aut'! Ch'est en tchi j'n'ai pon acouo amonté siez l'Péthe. Mais va ès fréthes et di-lus man d'vis: 'J'sis pouor ramonter siez man Péthe tch'est vot' Péthe, siez man Dgieu tch'est vot' Dgieu'."

La Pâque Flieuthie

Aniet ch'est la Pâque Flieuthie, et né v'chîn eune lectuthe d'la Bibl'ye

 

Today is Palm Sunday, and here's a Bible reading

Jèrriais · La Bouonne Nouvelle s'lon Jean, Chapitre 12, Vèrsets 9 - 19

Jèrriais Language Strategy 2022 to 2025

Jèrriais Language Strategy 2022 to 2025

 Lé Gouvèrnément d'Jèrri a lanchi la Stratégie du Jèrriais

The Government of Jersey has launched the “Jèrriais Language Strategy 2022 to 2025”

Lé Jour des Coues

April 1st is lé Jour des Coues - the day of the tails. Traditionally the prank for the day was to attach a long piece of paper or rag to someone's back.

 

La coue is the tail, but it's also one of the names for du fliancouais, a sticky plant called in English goosegrass or cleavers (Galium aparine). Fliancouais derives from verb fliantchi = to throw, and throwing stems of goosegrass from hedgerows at other children's backs so they stuck there as tails was a traditional children's prank. Pendre eune coue à tchitch'un l'preunmyi d'Avri pouor en faithe un Paîsson d'Avri  = to hang a tail on someone on April 1st to make an April Fool of them.

 

Frank Le Maistre in his Dictionnaire Jersiais-Français cast doubt on reports of this being done as an April Fool, suggesting that the plant scarcely grows around April 1st - however du fliancouais is certainly out now.

 

The newly published Glossary of the Norman Language in the Channel Islands (compiled by Professor Mari Jones) tells us that in Sark April 1st was also known traditionally as lé Jour des Coues and that a traditional chant that accompanied the tail-hanging was (in transcription) "Vive les coues, les siens qu'en portent!" (long live the tails, those who wear them). In Guernésiais, the chant was "La coue, la coue!"

1962: Les p'tites routes à Saint Louothains

Les p'tites routes à Saint Louothains

Ph'lip et la saison

 

à Portinfé, Saint Ou.

 

Moussieu l'Editeu,

 

Ch'tait après l'tais, hier au sè, que la Merrienne, ayant liut la gâzette tandis que j'fumais ma pipe trantchillement dans ma grand'tchaise, r'mertchit que d'nos jours y'avait de bein drôles dé jugements dans la P'tite Cour.

 

"Oh, quant à chonna, ma chièthe," j'li dis, "j'avons dit chonna pûs d'une fais des jugements d'autres. Ch'n'est rein d'nouvé."

 

"Ch'tait l'Juge Ahyi chute fais," ou m'dit en m'passant la gâzette.

 

Quand j'eus liut l'rapport de la cause en tchestchion, et chein que la "Post" en avait dit, j'refléchis pour tchiques minutes, épis j'dis à la Merrienne que y'avait, en m'n opinion, chein qu'nou-s-appèle des circonstances exténuantes.

 

"Et tchèsqu'tu veur dithe par chonna?" ou d'mandit. "Est'che parsque ch'tait une femme?"