Sonnet 18 d'Shakespeare

Sonnet 18

J'dithais qu'un jour d'Êté lit dans ta fache,
mais tu'es pus balanchi et bein pus bé.
V'là les flieurs du mais d'Mai qu'les vents égdachent,
coumme nou s'en va trilyi l'contrat d'l'Êté.
Parfais l'èrgard du solé nos embliûte
et souvent sén yi êcliaithant veint couèrt,
et châque bieauté d'un bieau but, véthe, dêroute
mais qu'la mathée d'Natuthe la couothe à tèrre.
Mais t'n Êté êtèrnel n'étha pon d'tchête:
ta bieauté reste tréjous à l'embelli.
La Mort n'en craqu'tha pon qu'tu'es souos la bliête,
quandi qu'tu pouss'sas dans ma poésie.
Lé monde vivthont et vèrront, entrétant
qué t'n or lithe ichîn d'dans en nièr et blianc.

• Acouo eune vèrsion Jèrriaise: Es-tu, ma belle, coumme eune journée d'Êté!

Tchu-lŷmpiques

Tchu-lŷmpiques

La branque

                 chèrgie

                            cahuche;

la gŷnmnaste

                  êcanche ses

                                   calipettes;

la brîsette

                pique les poummes

                                             à pliat tchu;

les hardelles

                 bonnetchulent en

                                             tchêtinnes.

La brecque

brecque = gap, breach, field entrance

Acouo eune fais à la brecque... - Once more unto the breach... #jerriais pic.twitter.com/zb6MWBGoue

— L'Office du Jèrriais (@le_jerriais) August 14, 2016

Ch’est un failli tchian tchi n’peut rester à sa brecque - it's a poor dog that can't stay at its entrance #jerriais #proverb

— L'Office du Jèrriais (@le_jerriais) August 14, 2016

I’ faut r’garder la brecque dévant la sauter - Look at the gap before jumping it (look before you leap) #jerriais #proverb

— L'Office du Jèrriais (@le_jerriais) August 14, 2016

La Fèrme

J'vînmes un tas d'vaques dé Jèrri à La Fèrme - We saw lots of Jersey cows at the farm fun day #jerriais pic.twitter.com/yCcJTL022k

— L'Office du Jèrriais (@le_jerriais) August 14, 2016

Nou chantit en #Jèrriais à La Fèrme hièr - singing yesterday @Kit_Ashton @DeputyTadier pic.twitter.com/gVpOzHVobM

— L'Office du Jèrriais (@le_jerriais) August 14, 2016

La Lettre Jèrriaise

La Lettre Jèrriaise:

Du P'tit Prînce, Chapitre 14:

La chîntchième plianète 'tait bein tchuthieuse. Ch'tait la pus p'tite dé toutes. Y'avait justément assez d'louga pouor mâter eune veue d'rue et un alleunmeux d'veues. Lé p'tit prînce n'arrivait pon à s'explyitchi à tchi bouôn pouvait êt' eune veue d'rue et un alleunmeux d'veues tchique bord dans l'ciel sus eune plianète sans maîson ni monde. Tout coumme i' s'fit à lî-même: "Ch't houmme-chîn est ofûche un nioleux. Tout coumme i' niole mains qu'lé rouai, qu'lé cratcheux, qu'lé marchand et qu'lé pînteux. Du mains san travas a un r'êffet. Quand il alleunme sa veue d'rue, ch'est coumme s'i' griyait acouo eune êtaile ou eune flieur. Quand i' dêteint sa veue d'rue, v'là tchi endort la flieur ou l'êtaile. Ch'est un bieau djobbe; véthe, ch'est utile viyant qu'ch'est bé."

Quand i' d'valit sus la plianète i' saluit l'alleunmeux respectueusement, "Bouônjour! Pouortchi qu'tu'as justément dêteint ta veue?"

"Ch'est l'ordre," qu'l'alleunmeux rêponnit. "Bouônjour!"

Lé Sèrmon sus la Montangne (9)

Ninth part of a Jèrriais version by Frank Le Maistre of the Sermon on the Mount (as published in the magazine The Pilot). Read by Geraint Jennings.

Gard'ous bein dé donner les choses saintes ès tchians, et n'fliantchiz pon vouos pèrles ès quétots, d'peux tch'i' n'les pilvâquent, et qué s'èrtouônnant sus vous, i' n'vouos égdachent.

D'mandez, et nou vouos donn'na; chèrchiz, et ou trouv'thez; tapez à l'us et nou vouos l'ouvritha.

Car tout homme tchi d'mande èrchait; et tchi chèrche trouve; et nou-s-ouvritha au chein tchi tape à l'us.

Et y'a-t-i' un homme d'entre vous tchi donne eune pièrre à san fis quand i' li d'mande du pain?

Ou s'i' lî d'mande un paîsson, lî donn'na-t-i' un sèrpent?

Un Êléphant

Aniet ch'est la Journée Mondiale d'l'Êléphant:

Today is World Elephant Day:

Un Êléphant

Un êléphant
est gris et grand
par driéthe, par d'vant,
et par dédans.

Un êléphant
n'fait pon d'san tchian,
mais pâsse san temps
paîsibliément.

Un êléphant
n'est pas au d'sans.
Nan-dgia! Il en
a l'tou d'san lian.

Et l'êléphant,
tch'est hardi b'sant,
va sus san lent
à ch't adgèvement.

1964: Lé lion au Bouôlay (1)

Lé c'menchement d'eune articl'ye d'la Gâzette du Sé du 12/3/1964:

Here's the opening of a Ph'lippe & Merrienne article from 1964:

Lé lion au Bouôlay

La Merrienne et les r'vénants

J'n'sais pas tchi sorte de temps qu'ous avez yeu siez vous chais jours, mais j'vos asseuthe que par ichin il a fait, et fait ocquo, une fraid d'tchan, avec un vent tchi vos donne toutes sortes de maux, partitchulièthement un ma dans l'dos. Nou-s-entend que les patates tchi perchaient la têrre à Rôzé, ichîn à l'Etâ et à d'autres bords, ont 'té brûlées, mais ch'est mûs d'aver d'laubegelée à ch'teu' que pûs tard.

Sonnet 78 d'Shakespeare

Sonnet 78

Ouaithe qué j't'aie êmoûtchi pouor m'înspither,
et r'chu t'n înspithâtion dans chein qu'j'êcris,
ch'est auve d'aut's langues étout qu'tu veins pâler
et t'êtrueûler sus un scrit êtrangi.
Tan r'gard a fait des muets à chanter haut,
et ma b'sante huthe à fliotter jusqu'ès cieux,
a êcrit ès nouages auve des plieunmes d'ouaîsieaux,
et fait l'pus haut jutchi deux fais grâcieux.
Mais chein qu'tu'amende lé mus, ch'est ma poésie
tch'est dêcrannetée horte l'esprit qué tu'înspithe.
Les vèrsets d'aut's plieunmes sont raîque appouaintchis;
tu'apprends à chu boucranneux d'bein êcrithe.
Sai tout chein qué j'sai: dans tchique avolée
ma cranne viède s'sa remplyie pouor tan musée.

Lé Sèrmon sus la Montangne (8)

Eighth part of a Jèrriais version by Frank Le Maistre of the Sermon on the Mount (as published in the magazine The Pilot). Read by Geraint Jennings.

Pouortch'est-che étout qu'ous vouos gênez des hardes? R'gardez don comme tchi qu'les lis des prés craîssent; i' n'travâlent pon, i' n'filent pon:

Et pouortant j'ouos asseûthe qué même Salomon dans toute sa glouaithe n'a janmais 'té attînté comme autchun d'ieux.

Où'est qu'la bourde chuche, j'chuche étout - Where the bee sucks, there suck I

D' "La Tempête" dé William Shakespeare (vèrsion Jèrriaise 2016):

Où'est qu'la bourde chuche, j'chuche étout:
couochi dans du jaune coucou;
J'm'y couoche quand lé cahouain crie.
j'vole sus l'dos d'eune caûque-souothis
souotré l'Êté bein heutheux.
Bein heutheux, bein heutheux j'vivthai achteu
souos la branque flieuthie d'un bouais bein ombreux.

Eune touônnée à La Trinneté - An outing to Trinity

À la belle Pâraisse d'La Trinneté - In the beautiful Parish of Trinity #jerriais #experiencejersey pic.twitter.com/S2wGN7SWr2

— L'Office du Jèrriais (@le_jerriais) August 8, 2016

Au Bouôlay/Bouôlé - At Bouley #jerriais #experiencejersey pic.twitter.com/sk39AoZoYM

— L'Office du Jèrriais (@le_jerriais) August 8, 2016

Tch'est qu'ch'est? Ch'est un dou à laver - What's that? It's a lavoir #jerriais pic.twitter.com/sxQANHZF1t

— L'Office du Jèrriais (@le_jerriais) August 8, 2016