L'mais d'Juîn

L'mais d'Juîn

Touos les poètes, lé temps pâssé
chantaient l'arrivée du R'nouvé,
les plyies d'Avri, les flieurs dé Mai,
l'cri du coucou et la bieauté
d'l'êpîngne êpannie sus l'fôssé.

I' pretendaient qué vèrs l'amour
les garçons touônnaient lus pensée,
et qu'les hardelles, lé long des jours,
habilyies dans lus bieaux atours,
né d'mandaient qu'à être admithées.

Mais ch'est là des sornettes d'aut' fais.
Les choses né s'pâssent pas comme chonna.
Au R'nouvé, les jours sont trop fraids.
Nou-s'a des r'fraideuses ès ortés,
et l'amour né date pon dé d'là!

Non, ch'est l'mais d'Juîn qu'i' faut louangi;
lé mais tch'apporte du maq'thé
et des pihangnes à bouan marchi
et des grouaîsiles et un tas d'tchi
tchi vaut bein mus qu'chein qui n'est qu'bé!

Vive lé mais tch'apporte à Jèrri
eune bouanne récolte d'belles patates!
Tchi donne tchiques hèrpîns au fèrmyi,
Et tch'êcrit cash au lieu d'crédit...
Vive lé mais d'Juîn! N'y'a rein tchi l'batte!

Elie