La machinne à éthêques
Not' vier
oncle, qua viagi, nos contait unn'bordée pour unn'petite machinne qu'il avait
veu travaillyi en Améthique. “Pour les grand mangeurs dé paisson,” – sé
faisait-y – “oull' tait fâmeuse; ou z'avêtes vot' paisson sus vot' assiette,
est-che pon? eh bein, ou prenêtes chutte pétite machinne ichin, et y n'yiavait
qu'a la pliaichi endrait vous et touôner, unn' mannièthe dé manivelle, et dans
un clin d'ji ou sé mettait en travas: chen qui y'iavait dé bon du paisson s'en
allait drait avaût vot' gôsi, et les éthêques étaient fliantchies dans l'âtre
ou dans lé mitan dé l'aire! pas bésoin dé sé salir des daigts à lès èspinotchi,
et quand nou s'tait pressis y'avait dé l'avanche, pardingue! … Mais unn'fais s'arrivit
un triste accident – un manièthe d'achocre qui voulait s'en servi touôni la
manivelle à l'arbours … et ou pouvez bein d'vinner chen qu'en d'vint; chu
pouôre baloque là fut si d'jantrement stoffé dé éthêques, qué quand y vint à l'hopitâ,
y futhent trais s'maines dé temps dévant pouver l'y haller sa qu'minse!”
“Ou paslez
dé vos grand' t'cherrues, garçons,” s'er fît not' Oncle. – ch'est en Améthique
qui faut en vais. – Unn' fais j'étions à touôner unn' grand pièche de terre qui
n'avait jàmais 'tait tchulbutèe – y'iavait yieu unn' forêt là dé-vant et tout
était plien dé gros trontchets, mais nou labouôthait entre du mûs qu'nou
pouvait, et j'avions unn' quarantaine de boeu's att'lès à nou tcherrue, et jé
fut entre les manchots pour pus dé huit jours dé temps – Unn' matinée v'là t'y
pon qué les fiers tappent raide dans un gros choutchet dé tchène – y m'suthait
chinq pi'ds dé travers en travers – et la tcherrue lé fendit en deux –
Justément l'idée m'vint dé l'ver les gambes en haût dé peux d'être happé entre
lé bouais quand y veindrait a s'er frumer et jé cryiais en être clyai, quand v'la
t'y pon qué la craque sé rapprèche tout d'un coup et mé v'la happé dans lé
fichu choutchet par lé fond des braies! – J'étais mall'ment prins, mais cryious
que j'en laissi couôrre les manchots? pas du tout – et les boeu's hallaient et
hallaient tout l'temps, mais rein né dounnait. Enfin ôprès les aver laissi
erprendre lus vent, car les bêtes en 'taient presqu'a but y dounnithent un
raide bouan satc'het tous d'un temps, et v'la t'y pon qué le trontchet s'en
vint, machinnes et tout, et y l'en avait dé fâmeuses longues, jé vos l'gage.”
"Et
vos braies, l'oncle?”
“Mes
braies?” si fit-y, y'l'étaient faites ov dé bouanne marchandise, et y n'y avait
rein dé trillyi – jé les ai occuo siez-nous.
Un'
individu, raide gris, ervénait dé fête – à mié qu'min dé sièz-l'y lé pi'd l'y
manque, y s'estravelle dans la route, et y s'endort la. Unn' vielle bête à saie
qui s'était abannounée s'en vint fousnotter alentou dé l'y, et sé mins à
ligouaîsi sa fache. Not' houmme sé resville à maintchi et crie: “Allons,
allons, tch'est qui r'est occuo à m'embrasshi? Ou vyiz bein comme les hardelles
sont tréjous à mé faithe la carre!”
J.P.
No comments:
Post a Comment