1911: Tchès qui veux Mille Louis?

 Tchès qui veux Mille Louis?

 

L'Èsté passè, quand j'èscrivi sus la gazette qué j'nos n'allaîmes avé un Show d'grouêzilles, et qu'lé preumié prix s'sait Mille Louis, lé Chef tréssauti sus sa tchaise. “Old 'ard! qui dit. Mille Louis d'pus ou mains pour la Chronique, ch'n'est pon eune forte affaithe, sans doute, mais enfin: n'ou s'n'appercheut! Mille Louis pour des grouêzilles! v'la tchi m's'embye hardi quand y'a tant d'monièthes dé piéchi ses sous a miyeu intéthèts! Y'a des Sociétées pour les Missions Extérieures, Intérieures, et du grué pour les pouôres femmes en couoche. Y'a la Société pour encouothagi la cruauté ès animaux (réspé d'la compognie), la Société pour du tchérbon a Noué; la sienne qui crait qué d'freumé l's'auberges f'tha les gens béthe du coco! Y'a les grands Soeurs des p'tits pauvres! Et un fliotchet d'autr' creux qu'avall'aient nos Mille Louis d'eunne bouochie – sans pensé qu'javais quasi pensé dèspensé patheille soumme l'année tchi vint pour allé vée Jérusalem: d'pis qu'tant d'nos èscrivains y'ont 'té, l'envie d'vaie tchi sortes d'hypotèques conventionnelles ils ont 'té dèspieautchi la bas m'est v'nue.”

 

Justement! Ov man plian, la cirtchulation d'la gazette s'en va augmenté d'chent pour chent, qué j'fis. Ou pouôrrez allé passé un mais à Jérusalem … ou a Jerico, et y resté! Et j'vos affirme qué man Show d'grouêzilles paietha pus qu'vos frais!

 

La d'sus, l'Chef s'mint a rithe dé jouée, et dèshalli d's'n'armouéthe la jougue sus tchi y'a un papi imprimé “Encre noire,” et j'en bûmes chatchun un lirman dans la mogue èsbred'lée dans tchi qu'nou met les vielles plieummes usées.

 

Et pis j'mé a lis sufflié dans l'onothelle man plian pour man Show. A m'zuthe qué j'pâslais, y s'teurtait d'rithe et remplyissait la mogue après chaque teurque. A la fin, quand j'eut fini d'pâslé et qu'la jougue n'disait pus mot, y m'dit en souôriant: “Pis qu'chest d'même, Pepin, vas-y carrement ov tes grouêzilles – et j't'invite a dîné Dinmanche tchi vint: y'étha d'la soupe dé pouothét, du horfi èstuivé ov des toumates, du fée d'lard fricachi, du poddin d'riz, et du cidre de poummes dé fraistchan.”

 

*   *   *   *

 

Né v'chin les conditions du Show d'Grouêzilles de la Chronique, pour Dixneu'chents douze.

 

Les entrées pour le Show peuvent se faithe dès achteu jusqu'a la fin du mais d'Mars.

 

Hoummes, femmes, mathiées ou pas, filles sus l'r'tou, garçons qu'ont fini lus apprentissage - tous peuvent met' lus nom bas, quand ben mème y né d'meuth'thaient pon en Jerri, a condition qu'ils aient 'té vaccinés et n's'ètre jammais motchis d'Missis Gabéldu.

 

N'y'a pon rin a payi pour entré: seulment huit sh'lings d'souscription (seven an' ten, cash d'avanche) pour un an d'Chronique – portèe a domicile s'ou n'd'meuthez pas trop loin.

 

Chaque exposant fournitha un affidavid qu'les grouêzilles ont cru sus un grouêzillyi plianté par li mème au mains très mais d'vant l'Show, et pas tchillyis un dinmanche.

 

Chaque exposant apportétha un siêxtounnyi d'grouêzilles a not' office, dans un ponnyi, pagas, pouque, bouëte, d'jichon, ou antchie, “any time” de jour et sus la s'maine, d'vant l'jour dé la preumié grande-mathée du mais d'Juin. (Accaté notr' Almana pour s'asseûthé d'la date). Les siens qui mettront très livres de chucre dans l'pagas, ponnyi, ou antchie, éthont du coup tchînez points mértchis a lus crédit: mais l'shucre est “optional”.

 

Coumme pour lé beurre au “Test” d'la Société d'Agritchultuthe, grouêzilles et vaissé restéthont pour nous.

 

La couleu des grouêzilles n'y fait d'rin. Vertes, rouoges, jaunes, ou blieus peuvent v'nin. Les poillues sont “disqualified” si nou s'appercheut qué l'poil a 'té artificiellement frisé.

 

Sus chaque “entry” y'étha eunne fielle de papi ov le nom d'l'exposant, s'il est mathié ou en veue d'l'ètre, s'il est tie-tôt'leur, et d'tchi guano qui s'est servi.

 

Tout exposant étha drouèt a eunne carte d'entrée pour li et la persounne qu'a fait l'ponnyi, pagas, ou autre vaissé dans tchi sont les grouêzilles. Les garçons engagis éthont en outre eunne carte pour lus hardelle, a condition qu'Samuel sétha invité ès neuches sans avé a dounné eunne bouëte a bistchuit ou autre bûsoq'thie.

 

L'jour d'la grand-mathée (l'lend'main s'ou s'adounne un dimanche ou qu'lé ouais-bridge sait freummé chu jour la), je f'thons porté touôs les lots dans l'pavillon d'Springfield, qu'Moussieu Pérrée nos prète a condition qué je'n grimthons pon la peintuthe. L'entrée des exposants s'sa par la bréque dé l'Est: l'public payant entrétha par la sienne du Sud (morning dress) et les gens d'la campanne pouôrront amathé lus ch'vaux souôs les tchérquéthies a bêtes: j'fournithon des g'nèts pour brîngi ch'qui pouôrrait tchès bas.

 

Les héches ouvrithont a djix heuthes du matin. Les siens qu'éthont des cartes les doun'nont a Mess Cabot: les siens qui n'en ont pon paiethont douze sous ou engamb'thont par sus la muthâlle. La maîntchi du “gate-money” – déduction faite des raffraichissements pour les Juges, l'Coumité, lé “staff” de la Chronique, les “reporters” des autres gazettes, les members d's'Estats, George de Carteret et l'Caouen – y sont près pathents et du mème connon – les marchands d'bètes-à-cône, et touôs l'éxposants d'grouêzilles – s'sa pour pus tard payi les frais d'enterrement d'Samuel; et l'aut' maîntchi pour un neu' plianchais a notr' office. Touôs les siens qu'éthont accaté un Almana d'la Chronique pour 1912, entréthont pour rin en montrant l'Almana.

 

N'y'étha pon d'musique ni d'coconettes, sus l'terrain; et j'avons carrement r'fusé d'permett' a Mess Bellingham d'y pitchi eunne tente pour faithe craithe a nos jerriais qu'y'a d'pûs belles grouêzilles au Canada qu'ichin.

 

A onze heuthes juste, nou qu'mench'cha a jugi; et 'ou pouôrrez tous entré souôs l'Pavillon vaie “fair-play.”

 

Y'étha, coumme j'avons dit, tchinze points pour les lots a chucre.

 

Pour qui n'y'ait pon d'jalousie, ni d'tromp'thie, ni d'injustice, la jug'gie se f'tha au cribye. Trouve-à-r'dithe et l'Caouen cribiéthont chatchun lus lot, y'un après l'autre, avec des cribyes en fi-d'fé qu'javons fait faithe exprès.

 

Les grouêzilles qui restéthont dans l'cribye s'sont mînses a part, par lots, et gouôtées par Samuel.

 

Grouêzilles et chucre restent pour nous, coumme il est dit: j'comptons en faithe d'la g'lée jûsée pour not' provision.

 

SCALE OF POINTS:

 

15 points pour lé chucre.

                                                    250     “        “     resté dans l'cribye.

                                                     27      “        “     bouan gout.

                                                      3       “        “     general appearance.

                                                      5       “        “     a-dji-l'a-dèrt.

                                                    ­­___

                                                    300

 

Ni prix ni certificats au d'sous d'nonnante-sept points.

 

*   *  *  *

 

 

 

PREUMIÉ PRIX:

 

Mille Louis (cash) ou un rèsvill'-matin, au chouêx du gagnant.

 

J'avaîmes pensé exposé les Mille Louis sus eunne tchaise, dans un bathi; mais coumme George de Carteret s'a dans l's'envithons, j'avons creu prudent d'les laissi a la banque. J'môntréthons l'bathi.

 

DEUXIÈME PRIX:

 

Eunne s'pultuthe dans l'cheumtchèthe dé Mac'Fellah, ou eunne pathe dé pînchettes a codrettes.

 

TRÈSIÈME PRIX:

 

Eunne demié douzaine de pottées dé g'lée d'grouêzilles, et un fro d'rouöge v'lous si ch'est eunne fille qui gagne chu prix la.

 

QUATRIÈME PRIX:

 

Les crybyes qu'étont servi a crybyé.

 

N'y'éthant pon – coumme dé raison – d'prix pour les grouêzilles qu'étont passé a travers des crybyés.

 

L'Coumité s'rèserve lé drouét de fliantchi d'hors les siens qui s'permettraient d'critichi la décision des juges.

 

PEPIN BILO.

 

 

Ah! tandi qu'j'y pense! J'avons idée dé qu'mandé nos cribes a la grande mannfactuthe dé cribyes d'Anjou: les creux sont pour avé djix centimetres en long et en large.