1927: Wireless

 “WIRELESS” 

 

Dépis l'jour que la nièche à Mait'e Cliément d'Caen persuade l'bouonhomme à faithe mettre le “Wireless” dans la maison, i' n'y a ieu qu'des disputes siez ieux.

 

La bouonhomme n'avait jamais realisé que v'la tchi s'en allait li couôter tant d'sous, la hardelle li avait dit que che n'tait qu'une bagatelle, qu'ou connaissait un jeune ingénieur qui li f'thait tout l'travas pour rain et que tout ch'qu'i y aithait à acater étaient les matéthiaux, mais quand tout avait un compte pour trente-chinq louis, ou pouvez craithe qu'il en fit du potin.

 

Mais i' falli bain payi.

 

La hardelle avait 'té maline et avait prins bouan soin d'ordonner un bouan “set” tandis qu'ou y était.

 

Pour longtemps Maît'e Cliém ne pouvait pas enduther qu'i' fusse mins en marche.

 

Que ch'fusse de la musique, du chant ou des discours, tout ch'qu'i' li sembliait ouï était “Trente-chinq louis! Trente-chinq louis! Trente-chinq louis!”

 

Avec le temps, i'vint à y prendre un mio pus d'intéthêt.

 

I'vint à dêcouvri que le “Weather Forecast” était tréjous correct, que nou pouvait s'fier tchi sorte d'temps qu'i' s'en allait faithe le lendemain, et chenna li était bain utile pour le travas d'sa ferme.

 

L'appétit vint en mangeant et Maît'e Cliém vint à réaliser que ch'tait un véthitablye pliaisi d'être assis dans sa grand' chaîthe avec ses pids dans l'âtre et sa pipe au bec à êcouter des concerts de Londres et ailleurs, pourtchi que bain des gens avaient payi treis ou quatre chelins pour un billet, tandis qu'li, il avait tout chenna pour rain.

 

Mais comme i' disait “Ch'est bain au mains, opprès aver payi trente-chinq louis pour l'instrument”.

 

Le pouore vi n'a jamais seu qu'i' faut qu'les bat'ties êlectriques saient erchergies périodiquement et que v'là tchi couôte un chelin ou deux châque feis.

 

Maît'e Cliém paie tout chenna sans l'saver.

 

Sa nièche a fait un arrangement avec le garçon du bouochi, qui vaint avec san môteur toutes les s'maines.

 

Il emporte les bat'ties en ville pour les faithe arrangi et les rapporte la s'maine en r'venant, et tout va sus l'compte du bouochi.

 

Comme oulle en a un double “set,” san “wireless” marche touos les jours et Maît'e Cliém n'en est pas pus savant.

 

Comme i' comprend l'Français bain mus que l'Angliais i' préfèthe que sa nièche le mette en rapport avec les stations d'Paris mais ou li dit souvent que l'vent est contraithe ou li donne tchique autre extchuse, quand ou veurt le programme Anglais, qu'est bain pus à san goût.

 

Chein qu'ou préfèthe lyi, est “Dance Music” qui s'donne dépis onze heuthes à mînièt et ou reste souvent à bas pour en joui opprès que Maît'e Cliém est couochi.

 

Mais chenna a quâsi 'té la cause qu'oulle a perdu san “wireless” tout-à-fait.

 

I'y a tchique temps Mess de Caen se rèveilly en sursaut et i' li semblyi ouï d'la musique.

 

Il êcouti pour une minute ou deux et s'aperchu que les f'nêtres trésonnaient comme i'font quand i' y a un tremblyement d'terre.

 

Comme v'la tchi continuait tout l'temps, i' se l'vi pour s'asseuther tch'est qu'chenna voulait dithe.

 

I'r'gardi à sa montre et vi qu'il appréchait d'mînièt et ne pouvant y aver à ches heuthes-là i's' décidi de d'valler en bas pour sonder l'mystèthe.

 

I' mins ses cauches et sauti dans ses braies et prenant sa chandelle à sa main, descendi.

 

Quand il ouvri la porte de la tchuisine il eut un choc comme i' n'avait jamais ieu d'sa vie.

 

La tablye et les chaîthes avaient 'té toutes tassées dans un coin d'l'appartement, le “wireless” marchait à toute vitesse et sa nièche, qu'i' comptait qu'i' y avait d's heuthes qu'oulle 'tait couochie était à danser un “Fox-Trot” avec le domestique!

 

Maît'e Cliém vint futhieux et s'mins à juther sus la pouore hardelle et l'domestique li, profiti de l'occasion pour se faufiler hors de la maison.

 

Le bouonhomme la m'nichi qu'i' s'en allait prendre sa hache le lendemain au matin et mettre le maudit “Wireless” en minchons.

 

I'n'le fît pas tout-d'même car l'idée que ch'aithait 'té un sacrifice de trente-chinq louis le fit réfléchi un mio et r'prendre san bouan sens.

 

Mais dépis chute sethée-là i' n'y r'a pas ieu de “Dance Music!”

 

Maît'e Cliém à donnè l'ordre que dès que l'moussieu qu'annonce le programme a dit “Goodnight everybody, Goodnight,” i' faut frumer tout et que tout l'monde aille se couochi.

 

Quand au domestique, i' fut treis jours hors, car il avait peux de r'envisagi l'bouonhomme.

 

Mais quand i'r'vint à la fin pour cherchi ses habits, le sieur De Caen fut bain content de la r'prendre afin d'êviter un scandale, car les vaisins c'menchaient dêjà à se d'mander tch'est qui pouvait en être dévenu.

 

Chein qu'est p't-être à r'gretter ch'est quedépis que l' “Wireless” est installé siez Mess De Caen, ni li ni sa nièche ne r'ont jamais 'té à la Chapelle.

 

Maît'e Cliém souôchaint qu'il entend de bain miyeu services siez-li au Dimanche au sé et pis il a caltchulë que comme i' mettaient chàtchun douze sous dans l'assiette pour la collecte ch'est un chelin d'sauvé par Dimanche et que dans à peu près treize ans et d'mi il aitha sauvé ses trente-chinq louis.

 

Caouain