1989: Erais-tu par chance tchiqu' vièr bâtisse qué tu voudrais vaie abattu?

 

'Erais-tu par chance tchiqu' vièr bâtisse qué tu voudrais vaie abattu?' mé d'mandi Ph'lip Desclios quand jé l'vis l'aut' jour en train d'rentrer ses raves.

 

'Pas qué j'sache' j'li dis, 'à mains qué ch'sait la p'tite maisoun au bas du bel. Mais tchiqu't'âs dans la caboche? Pourtchi qu'tu mé d'mande d'ité?' Car j'countais qué ch'tait d'ses raves qu'il éthait voulu m'pâler, pas d'bâtisses à abattre.

 

'Tu m'disais l'aut'jour', i's'fit, qué j'dévrais lièthe ma gazette, mais tu n'as pas lu la tcheinne: i'paraît qué l's' Etâts n'ount qu'a vaie eun vièr bâtisse qu'i' veullent lé toupiner - bein seux rein qu'les bâtisses fameux qu'ount d'l'histouaithe – J'veurs bein qu'ta p'tite maisoun a veu d'l'histouaithe étout, mais pas d'sorte à satisfaithe ès Etâts. Ch'est les grands et les biaux bâtisses qu'i'veulent abattre, par exemplye la maisoun au Gouvèrneux'.

 

'En êffet', j'li dis, 'j'en ai entendu pâler. Mais pourtchi, crai-tu, qu'i'veullent l'abattre? I' prétendent qu'oulle est en d'lacres, et qu'ch'est miyeu marchi dé l'abattre et d'en bâti eunne nouvelle qué d'y faithe des frais et la mett' en ordre. Crai-tu d'ité?'

 

'Chein qu'j'en crai', Ph'lip répounnit, assez âprément, 'n'a rein à y faithe. V'là tchi nos ér'garde pas, à té et mé, qu'la maisoun au Gouvèrneux ait presque deux chents ans, qu'ou sai imposante et qu'ou' faiche partie d'l'histouaithe dé Jèrri. L's'Etâts ount décidé d'l'abattre. Bein seux, i' n'ount pas prîns chutte décisioun ieux-mêmes. A grands frais, il'ount fait v'ner d'en Angliétèrre eunne dgaîngue dé sou-disants experts qui lus ount dit qué ch'n'est qu'eunne baraque tchi n'vaut pas la peine dé r'parer. Mais achteu qu'les gens d'Jèrri sé sount butés et ount fait à saver qu'il'en ount assez d'chu niolîn l's'Etâts ount la frousse et i'voudraient faithe v'ner, à acquo d'pus grands frais, eune aut'dgaîngue d'experts dé l'êtrangi lus dithe qué sus autcheun coumpte i'n' faut pas abattre chu biau bâtisse historique mais qu'i' faut l'présérver. As-tu bein coumprîns?'

 

'Ma fé, mait Ph'lip', j'lis dis, 'j'n'y coumprends méthe. Si les membres d's'Etâts ne savent tchi faithe, n'y'a t'i'poun d'buoans Jèrriais dé tchi qu'i' pourraient prendre avis? Pourtchi aller chèrchi d's'êtrangiérs qui n'counnaissent rein d'Jèrri pour nos dithe coumment réglyi nos affaithes? V'là tchi m'semblye eunne drôle dé manière dé s'y prendre'.

 

'Bah' s'fit l'Ph'lip, 'té, t'as 'tait hors pays trop loungtemps. En Jèrri au jour d'agniét nou'n'd'mande pas l'avis des Jèrriais, surtout si'l' est tchestioun d'choses qui nos councernent coumme Jèrriais - tchi sorté d'maisoun, par exemplye, qué j'errouns pour not' Gouvèrneux, tchi sorte d'êducatioun qué j'allouns dounner à nos ésfants, coumment qu'j'allouns arrangi nos taxes. Nânnîn, au jour d'agniet la d'vise est : Né prendre autcheun avis dé chein qu'les Jèrriais veulent si les êtrangiers nos disent autrément. Abattez tout, boulversez tout, dêtruisez tout. Car lé pus qu'nous abatte chein qu'y a d'bouon, chein qu'y'a d'pliaisant, chein qu'y'a d'jérriais, et lé pus qu'nou' l'rempliaiche avec d'la salop'rie, le pus d'sous qu'nou' s'en va faithe. Après nous l'dêluge!'

 

Drôle dé gas qué l'Ph'lip. Ch'en est ieun dé ches-là qui craient acquo qué lus d'vé coumme Jèrriais ch'est dé s'coumporter coumme Jèrriais, pas coumme des marmousêts et des mariounéttes qui dansant à la musique des êtrangiers.

 

Lé Vier Trin'tais.

JEP 24 November 1989