1989: Dépis qu'not'vier amîn, Georgé l'Fèvre, Georges d'la Forge, pâssit l'pas

 Dépis qu'not'vier amîn, Georgé l'Fèvre, Georges d'la Forge, pâssit l'pas j'n'avouns pas ieu rédjulièthement d'articyles en jèrriais dans la gazette. Ch'est dommage, car les articyles au buon' houmme Georges nos rapp'laient lé vier temps et i' nos dounnaient étout l'tchoeu d'faithe dé not' mus pour tâchi d'présérver not' langue.

 

Mais hélas! tout lâsse, tout câsse, tout pâsse, et lé v'là, lé vier Georges est pâssé. Lé miyeu monument qué j'pourraimes li bâti ch'est d'countinuer l'oeuvre qu'il si bein avanchi. Nou' m'a d'mandé d'entréprendre chutte tâche. Ou n's'ra pas facile, et j'sis bein seux qué jé n'm'en vais pas pliaithe à tout l'mounde. D'abord, J'êcris l'jèrriais coumme jé l'pâle, ch'est â dithe coumme eun Trin'tais et, bah, aussi bein l'admett', j'n' obsèrve pas tréjous dé trop près les règl'yes qui nos veinnent dé Saint' Ouën. Et pis, quant à la politique jèrriaise, j'sis réactiounnaithe: jé r'counnais qué chein qu'au jour d'agniet les gens appellent lé progrès né s'en va nos ram'ner qué d'la mînséthe.

 

Et d'même, y'erra dans mes articyles p'têt' tchiqu' chose qui pliaitha ès euns, mais bein d'tchi qui f'ra enrage l's'aut'es. Qu'i' n's'enragissent pas trop – i' pourraient s'faithe eun mêché, et nou' n' voudrait pas vaie d'ité – et pis, si y'a eunne chose qué la vie qu'j'ai m'né ma apprînt ch'est qu'i'n'faut jamais s'prendre trop au sérieux. Sé prendre trop au sérieux ch'est malsain.

 

Mais agniet, dépis qu'ch'est ma preumier' bordée, i' vaut mus né pas vos racounter trop d'bêtises – ch'ésra pour pus tard. Nou'm'dit qué, chutte fais, i'faut fini sus eunne note sérieuse. I's'adounne qué chu mais d'séprembre ch'est l'mais d'la fête jèrriaise-française. Les viers d'entré nouss j'nos rapp'louns l'temps qu'la France 'tait not'énn'mîn, et i' semblye p'têt'assez drôle qu'au jour d'agniet jé s'saimes à la fêter. Ou counnaissez sans doute l'histouaithe d'la buonnefemme Cousinard, d'la Rue ès Français, qui vièdgi son pot d'chambre sus la tête ès jeunes patriotes jèrriais en train d'célébrer not' victouaithe à Mafekin dans la dgèrre countre Les Bôeurs. Y'eu du feu d'satchi en ville chu sé là, et bein des f'nêtres dé câssées dans la Rue ès Français!

 

Mais i's'en va sus chent' ans d'cheunna: achteu, heureusement, ch'n'est pus avec des pots d'chambre qué les Jèrriais et les Français coundisent lus affaithes. J'soummes bein aise qu'après huit chent ans et pus dé coumbat et d'tracâss'ie nos rapports avec nos vaîsîns français saient des miyeurs. Dé oues'qué j'sis assis à vos êcrithe cheun'tchein j'peux vaie la côte dé France. Nos anchêtres éthaient érgardé chutte veue-là avec crainte et mèfiance, au dgêt pour les navires d'la fliotte français en train d'nos envahi. Il' éthaient 'té prêts à mett' lé feu au Tâs d'Géon pour dgèrni les gens dé muchi lus femmes et d'ragagni, armés, s'i'n'avaient pas d'fusi', d'lus frouque à pânnais ou à vrai pour d'fendre lus siez-ieux. Eh bein, grâce au Buoan Djeu, i'n'en est pas d'même achteu. Les Français countinuent à nos envahi, mais coumme touristes, pas coumme énn'mîns. A la bouonn' heure! J'sis bein deux qué, touas d'nous, j'éspéthouns qu'la fête jèrriaise-française nos ravigot'ta l'esprit et d'pus en pus nos f'ra, les Français et nous, dé bouons vaîsîns.

 

Pus tard, quand ou' s'sez pus accouôtumés qu'ou n'êtes achteu à mes caprices, j'vos dithai pourtchi qu'à m'n'avis i'faut qu'nou countinue à r'garder la côte dé France avec eun' yi au dgêt. Mais ch'n'est pas eunn'aut' invâsioun qué j'crains, ch'est dgiêux's neu' chent' neunante deux.

 

Lé Vier Trin'tais.

JEP 28 September 1989