1986: Peux ou paix?

 Peux ou paix?

  

Lé 22 d'dézembre, 1986.

 

Moussieu l'Rédacteu,

 

“Noué s'veint qu'eune fais pas an” s'lon la preumié lîngne du vièr diton Angliais, mais châque année i' m'sembl'ye qué Noué c'menche dé pus d'bouonne heuthe et qu' les célébrâtions sont dé pus longue duthée qué janmais.

 

Ch't' année j'èrchûmes un catalogue pour des cartes dé Noué à la fîn du mais d'août, et dans l'couothant du préchain mais lé porteux d'lettres am'nit jour après jour d'la publyicité pour cartes, décorâtions, présents et tout l'galimatchias qu' les difféthentes compangnies et sociêtés nos encouothagent d'acater même qué j'n'en avons pas bésoin.

 

J'aime penser qué Noué a autant d'attraction pour mé comme quand j'tais mousse, mais i' faut qu' j'admette qué j'n'piêsse pon m'exciter entouor mes acats à pliein solé sus la grève dans l'haut d'l'êté. Tchi damage qu' j'nos trouvons tous forchis dé c'menchi tant à l'avanche et qu' j'n'pouvons pas laîssi la pliûpart dé nos prépathâtions à la dreinne minnute. Malheutheusement, chennechîn est ieun dé plusieurs sîngnes qué nos célébrâtions d'veinnent dé pus en pus commèrciales et dé mains en mains r'ligieuses.

 

“Tch'est qu'ous allez faithe pour Noué?” nos d'mandîtent des amîns la s'maine pâssée. D'vant qué j'eûnmes l'temps d'rêpondre, i' nos explyitchîtent qu'i' s'en allaient pâsser deux jours en hôtel, qu'il avaient dêjà dêpensé plusieurs chents louis sus des présents et qué châque année il' appréhendent Noué car tout couôte tant en pa'ce qu'i' y'a eune mâsse dé prépathâtions à faithe. Même, i' sont tréjous êpuisés quand l'jour dé Noué arrive et i' sont pus qu' contents quand tout est finni et tch'i' peuvent lus r'mettre en travas. Les célébrâtions dé Noué n'lus apportent autcheune jouaie et l'annivèrsaithe d'la naîssance du Sauveur du monde est un êvénement annuel tchi faut qu'il enduthent. Qué ch'est triste qué ch'est là l'attitude dé tant d'aut's qu'ont compliètement mantchi l'împortance d'la bouonne nouvelle dé l'Êvangile et tchi n'connaîssent pas l'pouvé du Saint Esprit tchi transforme nos vies! Quand j'dêcouvrons chutte véthité comme réalité, Noué d'veint l'occâsion la pus sainte dé toute l'année et nos rêjouissances n'connaîssent autcheunes bornes ni lînmites.

 

J'vivons dans un monde tch'est accâblié par la peux et la gene. Les gâzettes châque jour, les nouvelles à la télévision et à la radio annoncent la longue liste dé nos craintes. Comme êfants, j'avons souvent peux d'la niet, des pêtres et aînchîn d'siette, mais en vieillissant j'nos trouvons victînmes dé difféthentes gênes tchi gâtent la vie qué Dgieu nos a donné pour nouot' bonheu. I' y'en a qu'ont peux d'êt' pauvres, d'aut's qu'ont peux d'êt' trop riches; i' y'a les cheins qu'ont peux d'êt' sans travas, d'aut's qu'ont peux d'la maladie, et eune mâsse d'aut's qu'ont eune peux mortelle d'la m'niche d'la bombe nucléaire. Et pis i' y'a eune tapée d'gens qu' appréhendent l'av'nîn et qui vont consulter les d'vîns, tchi lus content des histouaithes pour tâchi d'les rendre heûtheux. Et si l'histouaithe né pliaît pas i' vont êprouver ailleurs au point d'mettre lus fouai dans les fielles dé thée ou dans un patchet d'cartes. J'pouôrrais mentionner bein d'aut's craintes, mais la peux d'la mort et dé chenna tchi nos attend quand j'éthons pâssé l'pas otchupent les idées dé l'homme pus qué rein d'aut'.

 

Êtes-'ous du rang des êffrités? J'sis seux qué je s'sais lé preunmyi parmi ieux sinon pour la présence dans ma vie du Seigneur, mon Sauveur Jésû-Christ. Lé preunmyi Noué, i' y'a presqué deux mille ans à ch't heu, les bèrgers avaient peux, mais les patholes dé l'ange les rasseûthîtent tout d'suite. “N'ayiz pon d'peux; car j'vos annonce eune grand' jouaie tchi s'sa pour tout l'monde; anniet, dans la ville dé Dâvi, lé Sauveur, tch'est l'Christ, lé Seigneur, vos est né.” (Luc 2, 10-11.) Dé siette, à la pliaiche dé la peux, la paix tch'i' n'avaient janmais connue d'vant remplyit lus vies et i' s'mîntent à glorifier, et louangi Dgieu.

 

Ch'est là lé chouaix tchi nos attend en 1986 étout. Peux ou paix? Heûtheusement, Jésû a vêtchu la vie humaine et I' connaît nos souffrances, nos tentâtions et nos craintes, et Il a promîns dé nos fourni auve tout ch'tch'i' faut à fin qué j'séyons gângnants dans la batâle quôtidienne contre lé Dgiabl'ye. Jésu-Christ gângnyit châque fais tch'I bataillit contre Satan et même la mort n'put pas L'vaincre. Comme Ses discipl'yes, j'èrchêvons l'învitâtion dé partagi toutes ses victouaithes auve Li et dé joui d'la vie en abondance. N'ayiz pon d'peux dé l'înconnu et dé l'av'nîn mais découvrez pûtôt la jouaie et la paix tchi sont les nôtres à tout janmais quand j'nos soumettons à la chèrge dé Jésû comme Seigneur dé notre vie.

 

J'vos souhaite à tous un bouôn Noué, et ma priéthe pour touos vous est qu'ou trouv'thez l'temps et eune pliaiche dans vos célébrâtions pour lé Sauveur. J'espèthe qué les mots à la fin du sèrvice d'la Communion prendront eune nouvelle împortance pour vous et qu'en êffet “la paix dé Dgieu, tchi surpâsse toute notre compréhension, gardétha vot' tchoeu et vot' esprit en Jésû-Christ.”

 

UN AUT' GRIS VENTRE