1902: Ne v'la comme “Pretoria” fut prins

 Ne v'la comme “Pretoria” fut prins.

  

Yiavet eunne fais eunne jenne fille qu'était à viagit;

Oul' tet dans eun “train” à Londres; ou s'en allait s'rêjouit

Avec ses ammeins pour deuex-strès s'maines,

Jusqu'à ce qu'où qu'ermenchisse ses écoles de s'maines.

 

Dans l'même compartiment yiavet eunne femme et san “Baby”

A la premièthe station la femme, ayant faim, d'scendit

Pour des rafraîchissements et tchique chose à mangit

En s'nallant ou l'y d'mande de soignit san “Baby”.

 

La pouore jenne fille, à la bouanne foë,

Prend soin d'chut pouor petit avé.

Ne v'la “l'train” qui s'en va et la mèthe n'ervain pas

Chute fille toute êpeuethéai le garde dans ses bras.

 

Ne v'la eunne scène s'arrive à la préchaine station

La mèthe êponvanteai demande pour san garçon –

- A yieun des “Policemen” qu'est là à strictmarchi

Et de suite y cherche – à la fin y l'trouvit. –

 

- Dans les bras d'la jenne fille il tet bein endormi

Et la fille bein contente toute suite ou l'y donnit

Mais jugis d'sa surpreinse : le “Policeman” l'arrête

L'y disant qu'oul avait volet chu pouore p'tit être.

 

La fille toute ênerveai ne savait pas t'chi faithe

Ou l'y dît qu'oul en avet preins soin pour la mèthe,

Tandis qu'oul tet horte à cherchit du fricot

Ou'l tet bein obligie d'prendre soin du marmot.

 

Ou'l eut bein d'la peine à le persuadé

Qu'ou n'avait jamais yieu idée de l'volé

Mais que ch'tait seulement pour faithe piaisi;

Et vraiment à la fin y l'a r'lâchi.

 

Dans l'couothant d'la conversation

La fille demandit à la mèthe le nom

De chu pouor petit être là

Ou l'y dit j'lavons nommé “Pretoria”.

 

Mes chieirs ammeins quand ou viagis

Je vos en prie, preneais m'navis,

Ne jamais preneais dans vos bras

Des êfants qui n'vos appartiennent pas.

 

            Love your neighbour as yourself

            But paddle your own canoe.

 

                                                                                                Georgie.