Avri 1975: Choses et Autres

 Choses et Autres

Trenton,

Michigan

U.S.A.

Lé 26 d'avri, 1975

Moussieu l'Rédacteu,

 

M'èrvélà dans l'Êtat d'Michigan. Ch'est comme si j'tais dans un aut' monde. Dans la ville dé Fort Lauderdale, à vîngt-deux milles dé Miami, en Floride, la tempéthatuthe 'tait dans les huiptante à nénante degrés Fahrenheit touos les jours. Ichîn, en Michigan, ch'est eune affaithe dé quarante dégrés, pus  ou mains, et ouaithe qué ch'n'est rêellement pon fraid, la difféthence est assez pour donner l'împression, v'nant des chaleurs, tch'i' fait fraid !

 

Deux gâzettes dé Jèrri m'attendaient ichîn, les cheinnes du six et treize dé mar, et la preunmié chose qué j'ai fait en arrivant 'tait d'les liéthe tout l'travers. Dans l'annonces des décès, j'ai veu l'trépas d'un vier anmîn, lé Sieur Francis Andrew L'Mèrquand d'Gros Nez, à l'âge dé huiptante-siex ans, et j'veurs faithe mes condoléances à Mdle. Eva, sa soeu. Ch'est seux qu'ou s'en va s'trouver seule et qu'ou s'en va l'mantchi hardi. Lé Sieur Fraînque Le Mèrquand 'tait un charmant vièr Landîn. Consèrvateur et Jèrriais dans l'âme, et nou peut dithe qué né v'la acouo un mio d'Jèrri dispathu. Un autre anmîn – et vaîsîn – dispathu dreinement est l'Sieur Arthur (''Artie'') Vibert, des Palliéthes, iun des bouans corps dé la vie, tréjous riant et prêt à faithe un pliaîsi, et j'fais mes condoléances à sa danme étout. ''Artie'' Vibert avait 'té à la Côte dans san janne temps pour les Robîns, et il avait eune bouanne mémouaithe pour s'èrsouv'nîn des garçons tch'étaient là en même temps qu'li. Il 'tait hardi întérêssi à saver tch'est tch'en 'tait dév'nu, d'ieux, auve lé passage du temps, et La Côte 'tait souvent l'sujet d'convèrsâtion quand j'lé rencontrais. I' s'en vont à grands pas, les vièrs Landîns. Y'en a tréjous tchi manquent quand j'arrive en Jèrri. Et j'vais tréjous pus d'noms Jèrriais parmi les décès dans la gâzette qué parmi les naîssances.

 

I' n'y a pon d'doute qué tout change à m'suthe qué l'temps va, et tch'i' n'y a pon qu'lé Sénateur John Le Mèrquand tchi pâle des changements considéthés d'sithabl'yes dans L's Etats. J'tais întérêssi d'vaie qué l'Sénateu Shenton a d's idées d'chu côté-là étout. Jé n'sis pon assez au couothant d's affaithes politiques en Jèrri pour en aver mé-même dés ches idées, et en prîncipe j'sis trop consèrvateu et trop vyi pour êt' en faveur dé trop d'changement. Et ches jours ch'n'est qu'changement partout, changement d'temps, changement d'habits, changement d'idées, changement d'femmes, et surtout changement d'la valeu des choses du point d'veue d'la moralité et l'întégrité. Quand ès Êtats, ch'est seux qu'rein n'est si parfait tch'i' n'peut êt' amendé sus tchique sens, mais quand j'vai l'êbrouha tchi s'pâsse dans les gouvèrnéments d'aut' pays i' m'sembl'ye qué Jèrri est bein gouvèrné ouaithe qu'un tas d'badlagoules, tchi n'sont pon dans L's Etats mais tchi voudraient y'être et êt' payis trais mille louis par an, craient autrément. Si ches îndividus-là s'trouvent si mal sèrvis en Jèrri pourtchi tch'i' n's'en r'vont pon lus vraie siex-ieux ?

 

Ch'est r'mèrquabl'ye dé vaie dans la gâzette combein tch'i' y'a d'condamnés tchi veulent faithe appel contre lus condamnâtions. Un appel dait couôter gentiment en frais d'Cour et d'hommes d'affaithes, et où'est qu'les condamnés trouvent les sou pour les payi? J'tais bein content d'vaie qu'la Cour Rouoyale a, à ches drein, r'fûsé l'appel à plusieurs, car i' m'sembl'ye qu'auve trop d'encouothagement touos les malfaiteurs voudront faithe appel.

 

Y'a un bieau portrait d'la côtchiéthe dé la vielle prison dans la gâzette du treize dé mar tchi montre l's armueûthies d'la Couronne en d'ssus d'la grand' porte du mitan. I' fûdrent faites par man Papa, l'Cap'taine (et stchulpteux) John Philippe Giffard. J'sis bein content d'vaie qué l's architectes sont d'avis qué l'bâtisse èrprésente la pus belle architectuthe dé Jèrri et qu'ou vaut la peine dé conserver. S'il est possibl'ye  dé dêtachi l's armueuthies d'la côtchiéthe sans l's endommagi quand l'bâtisse s'sa dêmonté ou abattu, j'ai d'mandé ès autorités dé m'les donner pour les garder au Ménage ès Feuvres en mémouaithe dé Papa Giffard.

 

J'vai qué l'fèrmyi continnue â souffri d'l'înjuthe du temps. Moussieu Don Betchet, du ''Maincrop Potato Marketing Board'', nouos dit qu' à bein près d'souoxante du chent des fèrmièrs n'ont peut dêfoui à cause dé la plyie, et qué ché s'sait p't-êt' nécessaithe d'acater des patates dé hors-pays s'i' n'fournissent pon les boutitchièrs dé l'ile. Il' enhannent sus touos les sens, les pouorres fèrmièrs en Jèrri. Et en Améthique étout, quand à ch'la. Lus pliainte ichîn est tch'i' r'chèvent tréjous mains pour lé produit d'la fèrme, au même temps qué l'peupl'ye paie pus pour dans la boutique. Ch'est don l'fèrmyi tchi fait l'travas et l'boutitchi tchi fait les sou!        

 

George d'La Forge