1979: Couôteunmes du temps jadis

 Couôteunmes du temps jadis

 

Trenton,

Michigan,

U.S.A.

Lé 10 d'novembre, 1979

 

Moussieu l'Rédacteu,

 

"J'tais ravie d'vaie la fanmil'ye Choutchet à prendre lé deu à l'Églyise dé St. George dînmanche au sé," Missis Sprague dît à Manman quand j'la rencontrînmes dans La Rue à La Pendue en r'vénant d'la boutique, à La Fontaine, quand j'tais mousse.

 

"Bon!", Manman lî dît, "et pourtchi? Nou-s-a couôteunme dé prendre lé deu l'preunmié Dînmanche auprès l'entèrrement quand y'a d'la mort dans la fanmil'ye."

 

"Sans doute," s'fît Missis Sprague. "Jé l'sai bein, mais les Choutchets sont d'la Chapelle à ch't heu. Y'a dêjà longtemps tch'i' sont Méthodistes Wesleyens, et j'éthais creu tch'il' éthaient prîns l'deu à la chapelle dépis qué l'bouanhomme Choutchet est entèrré là."

 

"Ch'est eune drôle dé chose," Manman lî dît, "mais j'ai r'mèrtchi qu'les gens d'la Chapelle veinnent à l'églyise pour cèrtaines choses. Par exempl'ye, i' sont souvent bâptîsis dans l'églyise, et les femmes veinnent tréjous à l'églyise pour êt' èrlévées. J'pense bein qu'ch'est assez difficile pour cèrtains d'pèrdre des habitudes héthitées d'lus anchêtres pour des généthâtions. Y'a eune chose tchi faut admettre - ch'est qu'les Wesleyens ont des Prédicateurs tchi valent la peine d'aller ouï. I' prêchent bein us qu'nous Minnistres."

 

"Mais les Wesleyens ont des Minnistres étout," s'fît Missis Sprague.

 

"Véthe," Manman lî dît, "mais j'ai d'la peine à m'mett' dans la tête tch'i' sont vrais Minnistres dépis tch'i' n'ont pon 'té ordinnés par un Êvêque dé l'Églyise."

 

"Eh bein," s'fît Missis Sprague, "l'Êvêque dév'thait apprendre ès nouotres à prêchi. J'm'attendais d'ouï un bouan sèrmon à St. George Dînmanche au sé dépis tch'i' y'avait des gens à prendre lé deu mais ch'tait Moussieu Barascud tch'était là et i' n'pâlit même pon du défunt. Quand ch'est Moussieu Pépîn i' nouos dit tréjous qué l'défunt 'tait un bouan Chrêtchien et tch'il est tout probabliément à chanter les louanges à ch't heu lé tou du trône Êtèrnel."

 

"Eh bein," Manman lî dît, "nou n'peut pon aver Moussieu Pépîn à condithe les sèrvices à St George et à la Grande Églyise en même temps."

 

"J'crai bein tch'i' n'sont pon bein riche, les Choutchets," Missis Sprague nouos dît. "Auprès l'sèrvice, j'arrêtis dans man banc pour les vaie sorti et j'm'apèrchus qué l'vouaile dé crêpe à la veuve dévalant à peine sus s'n estonma. Quand l'bouanhomme dé d'siez nous mouothit, lé vouaile dé crêpe qué M'mèe ordonnit lî d'valait quâsi jusqu'ès pids, et ou l'mînt touos les Dînmanches pour un an d'temps."

 

"Tch'est tch'i' faîsait, [lé vouaile] l'bouanhomme Choutchet?", Manman lî d'mandit.

 

"Ma fîngre, jé n'sai pon trop bein, j'pense tch'il allait à san jour," Missis Sprague nouos dît, "et tch'i' travaillait un mio d'bord-t-en autre. Il' 'taient v'nus d'St. Jean, j'pense, et 'taient d'bouanne fanmil'ye Nouormande. J'ai ouï qu'lus vrais nom 'tait 'Choutchet de La Garenne' et qu'lus mangni 'tait d'tchique bord du côté d'Granville et tch'il' avaient 'té chassés d'siez ieux dans l'temps des dgèrres dé Napoléon. Il avait apprîns l'mêtchi d'couvreux en gli, mais il avait ieu eune fouaiblièche en montant s'n êtchelle quand il' 'taient à couvri eune maîson et i' s'drotchit et s'dêslotchit la hanque. I' n'èrtravaillit janmais dans san mêtchi. Lus deux garçons sont à La Côte et travaillent pour les Robîn.

 

"La bouannefemme Missis Choutchet m'dît l'aut' jour qu'ou s'attendait bein qué s'n homme s'en allait mouothi, car oulle avait ieu d's avèrtis. Y'a un an ou s'èrvit lyi-même en r'gardant par la f'nêtre et oulle 'tait seûthe qu'oulle allait mouothi dans l'couothant d'l'année, mais ou m'dît qu'ou vait bein à ch't heu qué ch'tait un sîngne dé mort pour san bouanhomme dépis qu'oulle est acouo en vie lyi-même. Trais jours dévant l'trépas, eune assiétte tchit dé d'ssus l'drécheux. Lé jour dé d'vant - ch'tait tard dans l'arlévée, justément d'vant la niet - un ouaîsé tapit à la f'nêtre, et un tchian hueûlit sans cêsse, la tête en l'air, quâsi tout l'preunmié jour qui l'bouanhomme gardit l'liet. Et comme ou r'vénait d'la boutique lé traîsième jour dévant sa mort - i' faîsait justément niet dans l'temps - ou ouît l'cri d'un cahouain justément comme oulle arrivait dans La Rue à la Pendue."

 

"Eh bein," s'fît Manman, "dépis qu'oulle est si supèrstitieuse, i' faut penser qu'ou savait bein tch'i' fallait faithe san bouanhomme sorti d'la maîson pour sén entèrrement les pids l'avant pour l'empêchi d'vaie la maîson en sortant et d'pouver r'trouver san c'mîn comme èrvénant. Quant à mé, jé n'crai pus à tout chenna, mais comme nouos l'dit l'vièr diton, châtchun embraiche sa femme à sa manniéthe!"

 

George d'La Forge