1910: Fête Municipale Jeudi au-sé

Les fêtes né vont pon tréjous coumme sus rouôlettes; Elie en racontit en 1910:

Festivals are not always as festive as they might be, as Elie recounted in 1910:

Fête Municipale Jeudi au-sé

Elie va pour se divertir et sort en groumâchant

Ch'tait bein "municipal," j'l'admets, car j'y vis des Vingtniers et des Officiers du Connétabl'ye, mais de fête? Et, quémant, un tas d'monde s'en r'furent à mié la séthèe! Nou dounnait douze sous pour entrer dans l'Marchi à lédghumes de Minden Place, y'où que la fête se dounnait, mais pour s'assièthe fallait erbailly'i siez sous, ou douze sous, ou même un ch'lin!! Ch'n'est pon d'pourres fermiers qui peuvent s'affaurder chonna, ni la classe de touristes qui nou veint in'tou. I' pathait que ch'est des fonds pour la Bataille de flieurs que nou cherche.

Ils avaient mins la strade, sus tchi que les chanteurs et les chanteuses étaient, du bu de Beresford Street, et la maintchi du monde qu'avaient payi pour entrer et un tchièrs des siens qu'avaient payi pour s'assièthe n'pouvaient dghethe comprendre un mot des chansons. Pourtant, en se l'vant sus l'bu d'ses pids, nou pouvait vaie les gingoêts et les morgaches mais nou n'ouïait mot.

Y'en avait qu'éthaient peu ouï mais qui n'ouïaient pas car d'autres, qui n'pouvaient pon ouï, marchaient et d'visaient et riaient et empêchaient les siens qu'éthaient deu ouï de ouï.

Les lanternes en papi et les p'tits bus d'chicques couleuthèes 'taient pendus sus les cords, toutes à peu près à la même hauteur. V'là qu'avait l'air d'un tas de rouais dans une vieille tchuisine, peituthès les uns en blu et les autres en rouoge. Nou z'allait s'proumner, si nou voulait, dans l'marchi a paisson en fumant une cigarette. Pour les dames y'avait des mousses qui vendaient des "choclets twopence," et pis Geo. Couoillard, avait d'la litcheu.

Y'eut des "Dandies" qui s'dand'linidrent et des "Chentecler" qui chantidrent... d'lus mus. La musique du Fort joui. Nou l'entendit magnifique.

Y'avait ètou une monièthe de râfliéthie à d'viner le numétho d'un billet d'banque. George Sinnatt dis que l'numétho 'tait 85,394 et que Mess Hocquard Ph'lip avait gagné £5 en d'vinant 85,684; un homme d'Cauchie £1 en d'vinant 85,693, George (du Caesarea) 'tait 3e ov 84,652.

Dans les bancs de d'vant y'avait un tas de dames et d'messieux de chein qu'ils appellent "l'élite." J'pouvais pon vais s'ils r'taient à s'êbaill'yi.

I pathaît qu'i' y'eut hardi de gi à une bataille de confettis quand vint sus l'tard, mais j'n'en vit rein. J'tais r'hors siez mé et j'tais à faithe un biau rêve; que ch'tait l'mais d'Novembre et qui faisait biau temps.

Elie
Nouvelle Chronique de Jersey 23/7/1910