Thursday 23 December 2010

Noué 1920 - Caouain

Les Chroniques de Jersey 25/12/1920:

Eh bain, mes chiers lecteurs, v'là Noué v'nu oquo une feis et je manquethais à man d'vé si je n'vos souhaitais pas à tous un "Merry Christmas."

Mais, par exemplye, qu'i' n'y ait pas de malentente!

Je n'sis pas à vos d'mander pour une "Christmas Box!"

Pas que che sait par ordgi, car le pouore Caouain ne connais pas chute sorte d'ordgi-là. Si ch'tait à là il accepthethait aucune chose. Mais je sis ennié de donner des "hints." Je l'avais fait assez rédguliéthement i' y a tchiques années, mais, avec une seule importante exception, personne ne m'a jamais donné rain. Alors je sis en parfait accord avec le vier diton, "Heutheux celui qui n's'attend à rain, car i' ne s'a pas désappointé."

En pâlant d'Noué, i' faut que j'vos raconte tch'est qui s'arrivi avant-hier à Maîte Cliément d'Caen.

I'y a d'vier tchînze jours, en r'vennt du vrèt, il entri à une certaine auberge prendre un p'tit lermin. En r'mettant san verre sus l'conteux il aperchu une boutelle scêllée qu'était remplie de pais de toutes les grosseurs et de toutes les couleurs.

"Tchi djantre est chenna?" i' d'mandi à l'aubergiste.

L'autre li raîponni que ch'tait un concours pour déviner combain qu'i' y ayait d'pais dans la boutelle. Nou pouvait d'viner autant d'feis comme nou voulait, seulement fallait payi quatre sous par "guess." Le sien qui d'vin'nait le nombre exact gagn'nait le prumié prix, un biau picot, le préchain aithait un pithot, le treisieme une boutelle de "gin" et ainsi d'suite. Les pais 'taient pour être comptés Jeudi au sé par treis principaux d'pâraisse, des hommes intègres, si nou pouvait en trouver, et qui n'avaient autchun intéthêt dans la compétition.

Cliément d'Caen pathu assez satisfait des conditions et, prenant la boutelle entre ses mains, il examini l'contenu bain minutieusement, en la touânant d'un côté et d'l'autre. A la fin i' s'inscrivi pour un couplye de chelins et enregistri une douzaine de numéthos dans les alentours de chein qu'i' criyait que la boutelle contenait.

Le bouonhoumme avait grand envie d'aver l'picot, et n'faisait qu'd'y penser touos les jours.

La nièt, i' rêvait qu'i' viyait des processions d'picots à faithe le touo d'san bel avec chatchun les boutelle de "gin," souos l'aile, et des boutillyies d'haricots dansaient la polka sus l'pid d'san lièt.

Dès qu'il eut bu san thée Jeudi au sé i's'en fut à l'auberge vaie tchi nouvelles.

La barre était pliaine de monde, et les principaux d'pâraisse étaient enfrumés à la clié dans l'parleux, à compter les pais.

Au but d'un quart-d'heuthe la porte ouvri et les treis messieux entrithent dans la barre.

Le moment 'tait solennel, et i' s'fit un silence comme quand les membres d'un jury rentrent dans la Cour pour annoncer lus verdict.

Le pus ancien des principaux avait un papi à la main et i' l'passi par sus l'conteux à l'aubergiste.

Ch'tis-chin l'dêpatchi, ergardi tch'est qu'était d'sus, et à haute vouaix annonci. "Messieux, le nombre d'pais dans la boutelle est quatre chents quarante neuf!"

Cliément d'Caen fit un brèt.

"Sacrebleu! J'vains dans les prix! J'avais d'viné quatre chents chinquante! A iun près, gasdémmin!"

L'aubergiste ne fit autchune attention au bouohomme mais continuant "Les gagnants des prix sont comme suit:
Fêlix Piatte 449... Le Picot
Laiesse Ernon 448... Le Pithot
Bill Jones 447... La bouteille de Gin
"Halte-là dja!" s'fit Maît'e Cliém j'avais d'viné 450 mé, raique iun hors de la vaie! Et pis j'n'ais pas d'prix? Pas dans ches braies-là, dja! Hear, Hear,! se fit tchiqu'un au coin d'la barre.

I' s'êlevi là dessus une vive distchussion et tout l'monde pâlait d'un temps.

Quand l'maître d'l'hôtel reussi à rêtablyi l'ordre i dit comme chenna, "ch'est inutile d'ardgumenter Messieux, le Comité a décidé que les chiffres qui dêpassent le nombre actuel de pais dans la boutelle ne peuvent pas aver d'prix, pour chute raison ichin: nou vos a invités à dithe combain qu'i' y avait d'pais. Eh bain, prenous l'cas à Maîte Cliément d'Caen! Il a dêcliathé qu'i' y en avait 450. Et nous a prouvé que ch'la n'tait pas vrai. I' n'y en avait que 449. Laïesse Ernon, à tchi qu'j'avons donné le deuxième prix, avait d'viné, li, 448. Alors la chose est bain simplye. Il 'tait pus près d'la véthité que Maît'e Cliém, car, au mains, ses 448 y étaient dans la boutelle, si ch'est qu'i' y en avait iun d'pus, che n'tait pas d'sa faute. Le même principe s'applique à Bill Jones, ch'est en tchi Mess de Caen n'a rain à dithe."

Les uns disaient "Ch'est pourtant vrai, quand nous envisage la chose de chu point-là!"

D'autres sympathiseaient avec le vier de Caen, et disaient, qu'au mains, il avait drouait au troisième prix.

Mais laïesse Ernon fut malin, li. Pour mettre fin à toute distchussion, i' dit comme chenna, "Ah ça, ch'n'est pas tout chenna, garçons! I' faut arroser l'pithot! Tch'est qu'ous allez baithe?"

Ch'en fut assez! Sus une patheille invitation i' touanithent tous l'dos au pouore Cliém, et i' s'en fut tout dret sièz-li en grommâchant à san tout seu. Il avait pourtant fait s'n idée que si ch'est qu'i gagnait un prix, i' s'en allait en faithe une vieille tchuite, mais il eut un tel dêpied qu'il entri siez-li sobre comme un juge, mais dame il 'tait mârri!

Jamais nou n'li r'prendra, dans ches concours-là!

* * *

Si ch'est qu'ou voulez m'promettre de n'en dithe mot à personne, je m'en vais vos dithe un ségret.

J'allons opendre une cauche (si pas deux) ès pids du lièt au chef, et iun d'ches matins i's'en va aver une grande surprinse.

Le vier Father Christmas et l'Docteu Bois ont fait un compliot ensemblye pour mettre tchiquechose dedans à un moment donné.

Et l'Chef n'en sait pas un mot.

Mais dame, n'allez pas li en pâler d'vant qu'i' sait temps!

I' s'sa temps assez de l'féciter opprès l'heutheux êvénement!

* * *

Eh bain, mes chiers lecteurs, je vos souhaitte à tous, p'tits et grands.
Un bouan et heutheux NOUÉ.

Caouain

No comments: