1952: L'homme tch'y nos faut

 L'homme tch'y nos faut.

Ph'lip et Merrienne d'accord.

 

Moussieu l'Editeu,

 

Quand la Merrienne r'vint l'autre arlevée, après avé tait béthe du tais avec sa belle-fille, la Lîsabé, ou tait toute excitée.

 

“Là! vé-tu, Ph'lip,” ou qu'menchit. “J't'avais tréjous dit que l'Mâjeur de Gruchy f'thait un bouon Député, et ach'teu j'en avons la preuve. N'y'a pas longtemps tch'il des dans l's'Etats, mais il a dêjà démontré tch'y n'est pas là tout simplyement pour prendre un somme par bordée et pour voté comme nou l'y dit. La Lîsabé veint de m'raconté tch'il a propôsé dans l's'Etats que nou réscucite la vieille Milice. V'la chen qu'j'appèle un homme!”

 

“Tu'as raison,” je r'mértchit, “mais, malheutheusement la Chambre a dêjà adopté l'principe du Comité d'la D'fense de l'Ile, d'envié nos garçons d'l'autre bord pour faithe lûs sérvice. Ils en éthont là pour un couplye d'années, et pûs qu'probablye y'en étha une tappée tch'y ne r'veindront pas en Jêrri. Le plian du Mâjeur est raide bouon, mais il est trop tard, car l'affaithe est dêjà décidée.”

 

“Oh, grand doux, nouffé,” ou dit, “car j'me r'souveins que dans l'temps, le Jack Le Mèrquand, tch'y tait contre chu système-là, me dit, quand je l'trouvit en ville le Sam'di d'après, que l'affaithe n'était pas finie d'un biau but, et qu'si l's'Etats insistaient, y réunithait toute la pâraisse de Saint-Ou pour une grande démonstrâtion dans la Place Royale. Et j'pouvons nos fié tch'il est ocquo d'la même idée.”

 

“Le temps ditha tout,” je m'fit, “mais j'crains ben que quand l'jour veindra pour distchuté la propôsition d'notre Député, y n'étha pas assez d'support. Aussi ben capuchi sa tête contre une muthaille comme d'oppôsé le Comité d'la D'fense.”

 

“Fiche du Comité d'la D'fense,” ou dit. “J'n'allons pas laissi nos garçons tchitté l'Ile pour faithe chen tchi peut tout aussi ben être fait ichin.”

 

“Le Comité,” j'l'y dit, “est d'opinion q'nouffé, et qu'si nou veur faithe de bouons soudards de nos garçons, y faut tch'ils aillent en Angliéterre.”

 

“Dis au Comité d'allé lûs couochi,” ou s'fit. “Tout chonna ch'nest du gniolin d'mousse. Si j'avions yeu notre brave vieille milice, avec les siez compagnie de l'Ouest, sans compté l'Est et la Ville et l'Artill'rie, l's Allemands n'éthaient jamais otchupé l'île en quarante. Ach'teu l'Comité voudrait nos r'mettre dans la même pôsition, et si les Russes veinent n'y'étha rain à faithe que d'allé rencontré lûs officiers à l'airport et d'promettre d'être de bouons garçons. Es-tu en faveur de chonna, oui ou non?”

 

“Tu dév'thais savé mûs que me d'mandé patheille tchéstchon,” j'l'y dit. “Même à l'âge que j'ai, je s'sais prêt à mettre la rouoge câsaque et m'n'arme pour empéchi l'enn'min d'landé dans la baie d'Saint-Ou, comme man grand'pèthe fit dans l'temps d'Napoléon. Et j's'y ben seux que n'y'a ni homme ni femme dans toutes les pâraisses de l'Ouest tch'y n'se trouv'thait pas là avec mé. Mais, tandis qu'j'y pense, y faut que j'diche au Mâjeur tchi faudra les rouoges câsaques si la Milice est pour être populaithe.”

 

“Vèthe,” ou dit, “sans doute. Tu r'souveins-tu, Ph'lip, d'la bordée d'la Grand' r'veue quand tu m'trouvit dans l'arlevée et me d'mandit si tu pouvais me r'condithe? Je n't'l'ai jamais dit, mais sinon pour ta rouoge câsaque et tes biaux boutons, sans pâslé d'la stripe de corpotha, j'en éthais ben vite chouaisi un autre. Y'avait un certain sérgent d'la compagnie tch'éthait ben voulu m'faithe la cârre, mais j'n'y t'nais pas pûs qu'chonna, car y tait tréjous à maintchi râsé.”

 

“Oh, damme, y'avait du fun dans la vieille Milice,” j'l'y dit. “Nou qu'menchait par allé à l'arsenal une fais la s'maine, épis y'avait l'inspection, le tir à Crabbé, et, pour fini tout, la Grand' r'Veue. Et, grand doux, nou n'enhannait pas. Che s'sais la même chose ach'teu, j'en s'y pérsuadé. Nos garçons sont prêts à faithe lûs sérvice, mais y veulent la faithe en Jêrri.”

 

“Absolûment,” ou s'fit. “Ach'teu quantchi que l'projet du Mâjeur est pour v'nin d'vant la Chambre?”

 

“Pour le moment,” j'l'y dit, “il est louogi au Greffe, mais nou peut s'fié qu'notre Député trouv'tha l'moyen de l'dêshallé au pûs tot. Y n'est pas l'moussieu pour laissi l'herbe craitre souos ses pids.”

 

“Eh ben, tant pûs vite tant mûs,” s'fit la Merrienne. “Et j'éspèthe qu'à la fin d'la distchusion y'étha un autre comité, avec l'y à la tête.”

 

“Ch'là s'pouorrait,” j'l'y dit, “mais j'ai ocquo mes doutes.”

 

Ph'lip.

1952