1952: L'Union des Fermiers

 L'Union des Fermiers.

Merrienne n'est pas contente.

 

Moussieu l'Editeu,

 

J'éthais ben voulu allé à la réunion des férmiers en ville, sam'di pâssé, mais j'avais attrapé une suée d'fraid, et la Merrienne me dit que je s'sais ben mûs assis aupi d'man feu, et don je n'sortit pas.

 

Quand la Chronique arrivit Mêcredi matin j'n'avais pas ocquo ouï un mot de chen tchi s'était pâssé, mais une fais qu'j'avais liut le rapport dans la gâzette je n'tais pas mârri d'n'avé pas dêshallé, et j'en dit autant à la bouonnefemme. “Liét chonna,” j'ajouôtit, “et dis-mé tchèsque tu'en pense.”

 

La v'la tch'y pose ses lunéttes sûs san néz et s'met à lièthe. Oulle en eut pour une pôse, car ch'est tout à la douoche quand ou s'y met, et ou digèthe tout du qu'menchement jusqu'à la fin. Enfin la v'la finie. Ou mint l'papi sûs sa tablye, êtérnuit un couplye d'fais, car oulle a du fraid étout, épis: “Eh ben, Ph'lip,” ou dit, “j'ai tréjous creu qu'y'a de ben drôles d'individus parmi nos férmiers, mais ach'teu j'en s'y pûs seuze que jamais.”

 

“R'garde,” ou continuit, “à qu'menchi, chu vote de r'mérciements à Ph'lip Le Feuvre, un homme tch'a ses d'fauts, sans doute, comme tout l'restant, mais tch'avait travâillyi ben du pour les férmiers quand y tait président d'l'Union. Après l'avé fichi à la porte, sans l'y donné une chance de fini san terme, y décident tch'y méthite un vote de r'mérciements. Ch'est assez pour faite ma vieille catte crévé d'rithe.”

 

“Ma fé, vèthe,” j'm'accordit, “ch'est tchiquechose que nou n'comprend pas, et j'crai ben que l'Sieur Le Feuvre a trouvé ch'là drôle assez. Mais les Jêrriais sont d'même, et pûs qu'probablye à chent ans d'ichin y l'y bâtithont un grand monûment dans la Place Royale ou la Parade. Le Général Don eut a arrêté prèsque nonante ans pour sa statue, et n'y'a pas si longtemps que l's'Etats vintes à dêcouvri qu'un certain noblye avait tait Gouverneux d'l'île dans l'temps d'la Reine Elizabeth, et décidîtes de l'y mettre une inscription dans la Chambre.”

 

“Y'a autre chose étout dans chu rapport tchi m'fait bistchi,” ou dit. “As-tu veu que quand y fut tchéstchon d'êlithe les membres du Conseil, trais bouons Jêrriais furent battus par trais Anglais? Absolûment, Ph'lip, ch'est honteux. Tchèsque j'allons dév'nin si chonna continue?”

 

“Eh ben,” j'l'y dit, “y'a p't'être le pour et l'contre, je n'sais pas. Mais, probablyement, si une cértaine r'mérque n'avait pas tait d'pâssée d'vant l'vote, les Angliais n'en éthaient pas remporté si aisîment. Avec chonna, nou m'dit qu'chais mêssieux sont d's'hommes capablyes, tch'y ne f'thont pas d'ma sûs l'Conseil. Y faut lûs donné une chance de dêmontré chen tch'y peuvent faithe.”

 

“Vèthe,” ou dit, “et dans tchiques années, ch'ne s'sa pas trais, mais une doûzaine de chais individus tch'y sont v'nus en Jêrri pour apprendre le férmage ès Jêrrais. Et j'vait même que dans pûs d'une pâraisse y'a d's'Angliais tch'otchupent des postes dans la Municipalité. J'trouvit un vier almanac d'la Chronique l'autre jour dans l'gal'tas, et je r'gardit la liste des Officiers dans chaque pâraisse, et ch'tait touos des Jêrriais.”

 

“Ah damme vèthe, dans chu temps-là,” je m'fit. “A Saint-Ou, y d'vait y'avé des Feuvres, des Viberts, des Hamons et des Boutilliers.”

 

“Y'avait étout un Le Cornu tch'y tait Chantgni, un autre tch'y tait Officyi d'Connêtablye, et un traisième tch'y tait sûs l'Comité des Qu'mins. Un Bro tait Surveillant, et un Douard Le Bro, fils Ph'lip, fils Jan, tait Collécteur d'Aumônes. Dans l's autres pâraisses ch'tait la même boutique. A la Trin'té par exemplye ch'tait prèsque tous des Cabots.”

 

“La race n'est pas pérdue,” j'l'y dit, “la vieille réchine tchent ocquo bon. A Saint Martin, sans doute, la famille des Renoufs tait ben r'présentée.”

 

“Oh vèthe,” ou dit, “mais y'en avait d'autres, les Nouaux, les Billots et les Perchards. Même en ville les Chantigniers taient d'bouons Jêrriais. Mais chais temps-là sont passés, man Ph'lip. Allons, met ta cravate et ta grand'-câsaque, et va-t'en donné un coup d'bringe dans l'êtablye.”

 

Ph'lip.

1952