1952: Le fermyi et l'êducation

 Le fermyi et l'êducation.

 

La Merrienne, ayant luit l'rapport du grand bantchét en célébration du Centenaire du Collège Victoria, r'mint la gazette sûs la tablye, et considéthit pour tchiques minutes, épis ou m'pôsit une tchéstchon.

 

“Ch'est tout bein bon d'avé des bantchéts avec de long discours et un tâs d'grands méssieux à s'entre félicité d'avé yeu l'honneur d'être êdutchis à chu Collège, mais par chen qu'j'en vait, mé, toute chutte instruction, sans pâslé du coûotage, n'vaut pas grand'chose ès férmiers. Tchesque tu'en pense, man Ph'lip?”

 

“Eh bein, Merrienne,” j'l'y dit, “je n'sais pas. Mé, quand j't'chittit l'êcole à l'âge de douze ans, j'pouvais lièthe, sinon les longs mots, et j'pouvais êcrithe un mio sûs m'n'ardouaise. Avec chonna je n'me trompais pas bein souvent quand y tait tchéstchon d'additionné, pourvu que n'y'avait pas pûs que deux ou trais numéthos. Mais, à ch't'âge-là j'tais dêjà à maintchi fermyi. J'pouvais cachi la grande tchéthue, traithe siez vaques par heuthe, et mâté ma câsse de patates, quand ch'tait des toppeurs, dans chinq minutes. Et, en craissant j'apprint graduellement à lièthe, à êcrithe et à chiffré comme y faut. Mais j'admets que ch'n'est pas d'même au jour d'agniet.  Y'a l'mousse à la Liza, par exemplye; je doute hardi tch'y connaisse la difféthence entre une bêque et une frouque, et j's'y bein seux qu'si nou l'y pâslait de déch'té et affêté, y réstethait à vos r'gardé la goule ouérte, ne comprenant pas.”

 

“Vèthe,” ou dit, “ch'est vrai. Mais enfin sa mèthe prétend que l'mousse se dêshalle bein à l'êcole, et oulle espèthe de l'vais Ministre pûs tard, et même Recteur de yunne de nos pâraisses.”

 

“Ma fé!” je m'fit, “ch'n'est pas une mauvaise djobbe, la djobbe de Recteur. Djais louis l's'maine, au tout mains, une belle maison, fournie, et un bouon gardin, sans pâslé d'bein des p'tites choses tchi veinnent au Rectorat, quand l'Recteur a yieu l'avis de n'se mathié pon, et qu'y'a tout-plien d'vieilles filles dans sa pâraisse. Bein seux que v'la tchi vaut mûs que l'férmage.”

 

“Et,” j'continuit, “quand, en hivé, le pouôre fermyi est forchie de dêshallé pour traithe ses fichues vaques, le Recteur peut resté souos les couvértuthes. Mais l'pûs bé ch'est que quand un fermyi fait banq'route, y s'trouve à la route, tandis qu'un Recteur, pour bein tch'y n'se mette pas dans la tête de copé la gorge à sa belle-mèthe, ou d'fichi san camp avec la femme d'un Chantgni ou d'un Seurveillant, peut résté ouesqu'il est pour le restant d'ses jours. Quant à mé, je n'trouve pas qu'chonna est juste.”

 

“R'garde, Ph'lip,” dit la Merrienne, sévèthement, “n'en v'la assez et bein trop au sujet des Recteurs. Y'en a tch'y travaillent bein du, et n'oublie pas tch'y faut prépathé deux sérmons la s'maine. Comment qu'tu voudrais avé à faithe chonna?”

 

“Damme!” j'l'y dit, “j'te garantis que si j'me méttais à prêchi ichin à Saint-Ou ch'ne s'sait pas à des bancs vièdes. Et si par chance je n'trouvais pas un texte à man goût, y'éthait tréjous moyen d'accaté un raide bouon sermon à bouon marchi.”

 

“T'en vas-tu t'taithe!” ou criyit, capuchant sûs la tablye à deux mains. “J't'ai d'mandé une simplye tchéstchon au sujet d'l'êducation, et te v'la ach'teu à m'chanté un tas d'gniolin d'une manièthe tchic m'dêmontre que tu qu'menche à avé la tête cratchie. Pour la deuxième fais, crai-tu que toute chutte êducation fait du bein ès férmiers de l'île!”

 

“Ma pouôre Merrienne,” j'l'y dit, “pourtchi s'gèné d'chonna? Autchune personne avec un mio d'bouon-sens peut vais qu'si nos férmiers attrapent ocquo yunne ou deux saisons comme ch't'année, n'y'étha pûs d'férmage en Jérri.”

 

“Oh!” ou s'fit, “d'pis qu'tu'est dans chais sentîments-là, tu f'thas mûs d'allé t'couochi, autrement tu m'f'thas mârri. Allons! happe la chandélle et ramonte.”

 

Et, Moussieu, j'fit chen qu'sans doute ous éthiez fait s'ous aviez tait mé. J'gaffit la chandélle et me v'la hors.

 

Ph'lip.

1952