1952: La vacance

 La vacance.

Le Candidat Tchi Faut.

 

Moussieu l'Editeu,

 

“Eh bein,” la Merrienne se fit, “ch'tait vrai donc chen qu'nous avait ouï. Le Sénateur Carson à donné sa démission.”

 

“Vèthe,” j'l'y dit, “et j'en ai grand r'gret, car ch'est un homme tch'éthait peut faithe de bouon travas dans l's'Etats et ailleurs. Je n'criyaimes djèthe, Merrienne, quand j'nos en fûmes chu jour-là à la Salle Pâraouaissiale voté pour l'y, que chonna s'arriv'thait.”

 

“Damme, nan!” ou dit. “Quand vint l'sé et que j'fûmes bèthe à sa santé dans Halkett Place, j'tais pûs contente que si tchitchun m'avait donné une neuve robe de souaie. Mais enfin, ch'est l'y tch'y sait, et sans doute y n'a pas abandonné l'affaithe sans bouonne raison. Mais, ach'teu, Ph'lip, y faut en trouvé un nouvé et n'y'a pas d'temps à perdre si je n'voulons pas vais tchique Colonel ou je n'sais pas tchi dans l's'Etats comme Sénateur. Ch'est tout bein bouon d'en faithe des Jurés-Justiciers, car, de nos jours chais mêssieux n'servent à rain, mais...”

 

“Ah, n'va pas si vite, Merrienne,” j'l'y dit. “Nos Jurés sont ocquo des gens importants. Sans yeux la Cour Royale ne pouôrrait pas fonctionné.”

 

“Et nou n'en s'sait pas d'pièthe,” ou dit. “Mais enfin, y n'est pas tchéstchon d'une Juré-Justicier, mais d'un Sénateur, et y faut être bein r'gardants tchèsque nous y met. A qu'menchi, y faut tâchi de trouvé un bouon Saint-Ouennais.”

 

“Pour une patheille djobbe,” j'l'y dit, “les candidats sont êcarts dans la pâraisse. Ch'n'est pas comme aut'fais, quand y' avait d'bouon monde à toutes les cârres de route, mais agniet iou les trouvé?”

 

“Ch'est vrai assez,” ou dit, “mais jamais tu n'me dithas qu'si nou cherche nou n'trouv'tha pas l'homme tchi nos faut. Y'a pûs d'un férmyi r'tithé, tch'y prendrait p't'être si nou l'poussait un mio. Le Frainque Le Maistre, par exemplye, l'y tch'y n'a rain à faithe, pourtchi pas l'y d'mandé? Quant à mé, j's'y prête à joindre une députâtion et y'en a bein d'autres comme mé! Mais ch'est d'capuchi sûs l'fé quand nou peut l'faishoné comme nou veur, et dans d's'affaithes comme chéttechin l'preumyi sûs les rangs a tréjous un avantage. Tchèsche tu'en dit?”

 

“Chen qu'j'en dit, chais que l'Frainque bârr'rait sa porte et mett'rait l'tchan à banon si nos viyait arrivé. Ch'n'est pas la peine d'allé perdre san temps là. Franchement, Merrienne, je n'crai pas qu'autchun Saint-Ouennais veur chutte fichue djobbe-là. Et pourtant, y faut remplyi la vacance. Tchi sorte de qualités qu'tu voudrais trouvé dans un candidat?”

 

“Ch'là méthite d'la considéthâtion,” ou raiponnit. “A la preumièthe êlection, Ph'lip, Jêrri fit pûs d'une mêprinse, sans paslé d'bêtises, et chutte fais y n'faut pas s'laissi entrainé par des promêsses tchi n'valent rain. D'ma part, je n'vot'tai jamais à l'av'nin pour un moussieu tch'y n'a pas donné ses preuves, ou pour yun tch'y n'est pas pour l'êconomie. Y n'est pas tchestchon dans l's'Etats d'avé la langue bein pendue mais d'voté du bouon bord et de n'se laissi pas embiûté par un tâs d'gniolin.”

 

J'l'y dit que j'tais d'accord, mais, dans une êlection n'y'a pas un seul candidat tch'y n'est pas prêt à juthé tch'il aime mûs l'êconomie qu'sa femme, que ses mousses, ou même qu'sa bouonne vaque.

 

“Vèthe,” ou dit, “et y n'ont pas tait dans l's'Etats chinq minutes d'vant prouvé tch'ils aiment l'êconomie comme ils aiment lûs belle-mèthes. Mais absolûment, y'a moyen de trouvé un bouon campagnard tch'y tcheindra à sa pathole. Est-che que tu n'connais pas tchique vier avâre tch'y cop'thait un liard en quatre?”

 

“Ch'est-là les pièthes,” j'l'y dit. “J'en connais yun tch'y trouvit un sou dans la route une bordée, et tch'y fut r'vais châque jour pour pûs d'un mais, espethant qu'y'en éthait un autre. Mais donne-l'y un siège dans l's'Etats, et y s'sa prêt à gaspillyi les sous du publyic en-as-tu-en-veur-tu. Y faut cherchi ailleurs, Merrienne.”

 

La bouonnefemme soupithit, hauchit l's'êpaules, et se r'mint à sa couôtuthe.

 

Ph'lip.

1952