1951: Ocquo l's'Etats.

 Ocquo l's'Etats.

 Merrienne veur des Vieillards.

 

Moussieu l'Editeu,

 

J'tais à lièthe la gâzette l'autre sé quand j'vit tchiquechose tchi m'fit rithe, et la Merrienne, toute tchuthieuse comme de couôtume, voulut savé tchèsqu'y m'amusait.

 

“Ch'est l's'Etats,” j'l'y dit. “Ne v'la un Moussieu tch'a propôsé qu'à l'av'nin un homme tch'y voudra être Sénateur ou Connêtablye ou Député étha à dêcliathé s'n'âge.”

 

“Et ont-y adopté chonna?”

 

“Nânin,” j'l'y dit, “mais y'a yeu une assez longue distchusion. A la fin ils ont dêmontre un mio d'bouon-sens et y'a yeu une mâjorité contre.”

 

“Ben êtonnant,” s'fit Merrienne, “car de nos jours tant pûs bête la proposition dans l's'Etats tant pûs oulle est seuze de passé. Mais, dis-mé, Ph'lip, tchèsque était l'idée du propôsant?”

 

“Ma fé!” j'l'y dit, “je n'sais pas. Il a fait sans mûs d'l'explitchi, mais y n'en a pas fait une grande affaithe. Après tout, pourtchi qu'un candidat s'sait forchi d'allé siez l'Enregistreur et payi pour une copie d'san cértificat d'naissance? Jamais n'ou n'avait ouï pathéille chose.”

 

“Oh, nan,” ou dit, “mais n'oublie pas qu'les viers temps sont passés et qu'ach'teu ch'est tout difféthent. Tant pûs que l's'Etats et touos lûs fichus comités peuvent embêté et êtibotchi l'monde tant pûs y sont contents. Mais tu'as pâslé d's'hommes. Voulait-on applitchi chonna ès femmes étout? Y'en a dêjà yunne dans l's'Etats, et par chen qu'nou ouait y'en étha pûs après l's'êléctions à la fin d'l'année.

 

“La sienne tch'y y'est ach'teu,” j'l'y dit, “asseuthit la Chambre que les femmes n'objéctethaient pas. Accordant à l'yi, une femme est tréjous prête à dithe s'n'âge.”

 

“Vèthe,” s'fit Merrienne, “sans doute, tandis tch'y sont jeunes, mais quand y veinnent à une certaine âge, surtout si ch'est des vieilles filles. Te r'souveins tu d'ta couôsine, la Besty Jane, tch'y n'put jamais trouvé un homme, et ch'tait pas manque d'êprouvé pourtant.”

 

“Oui,” j'l'y dit, “la pouôre fille n'eut pas d'chance. Hardi d'galants mais jamais yun qu'ou put pérsuadé au mathiage.”

 

“Ch'tait d'sa faute,” dit Merrienne. “Ou n'savait pas comment s'y prendre. Mais chen que j'voulais dithe ch'tait que quand oulle arrivit à trente-chinq ans ou restit là pour une bouonne pôse. Quand vint un temps, au lieu d'viéillyi ou rajeunissait. Chutte femme-là dans l's'Etats n'dithait pas chu gniolin-là s'ou n'avait pas gaffé un homme.”

 

“Mais,” ou continuit, “y'a une chose que j'voudrais vais, puisqu'il est tchéstchon d'l'âge des candidats. J'voudrais vais l's'Etats pâssé une louai qu'hommes et femmes ne s'saient pas êligibles d'vant avé passé l'âge de septante au tout mains.”

 

J'me r'mint à rithe. “Eh ben,” j'l'y dit, “n'en v'la une bouonne. Une Assembliée d'viéillards. Grand doux d'la vie, y s'endormithaient et n'y éthait rain d'fait. Y faudrait d's'ambulances toutes les fais et une daingue de docteurs en attendance.”

 

“Si n'y'avait rain d'fait, tant mûs,” ou dit. “Et quand ès vieillards, jamais tu n'me dithas qu'un homme de septante ans, avec l'expéthience tch'il a yeu, n'sait pas mûs qu'un babouin d'vingt-chinq. Considèthe un mio, et tu vêrras que ch'n'est pas les viers tch'y sont résponsables pour toutes les bêtises que l's'Etats font agniet.”

 

Ph'lip.

1951