1964: En c'mîn pour l'Australie! (2)

 En c'mîn pour l'Australie!

 

(Siète)

 

 

En fîn d'compte les visiteurs sont tous à tèrre. I' sont rangis sus la cauchie. Les passerelles sont r'tchulées du navithe par des cranes et mînses en pliaiche à tèrre. Lé Cap'taine donne des ordres et eune manièthe dé trompette dans la cheunm'née beûle comme un gros boeu affolé, et les mouôrins sont halés dé d'ssus les capestes. Deux ou trais r'morqueurs halent et poussent sus l'navithe et nouos v'là houors! Châque moment alouangne la distance entre nous et la cauchie, et l'nez du navithe pouainte au large un mio à la fais. Les gens à terre et à bord êprouvent acouo a lus entre-pâler, mais comme i' l'font touos en même temps et à tue-tête pèrsonne n'y comprend rein! Chatchun lève lé bras atout san mouochet en main, et l'mouochet sèrt dé sîngna et d'êssuie-lèrmes en même temps!

 

P'tit à p'tit nou pèrd la cauchie d'veue et, dans la distance, nou vait les gens d'ssus s'en aller. Les gens à bord c'menchent à cherchi pour lus mousses, pus ou mains oublyiés à cause du chagrîn d'aver à tchitter pathents et anmîns restés à tèrre. Les mousses né sont pon aîsis à trouver. I' sont à galvauder amont et avau les montées et à couôrre l's uns souotre l's autres dans l's allées comme des fos. Des mousses sont tréjous d'même à bord d'un baté à mains tch'i' s'saient malades quand la mé est rude. À la fîn, chatchun r'trouve les siens et tout l'monde s'amène dans sa cabine pour arrangi san butîn dans les titheurs et armouaithes, sachant tch'i' y'a quâsi un mais l'avant à sé d'vant l'arrivée en Australie. I' faudra avanchi l's holouoges un quart-d'heuthe à ces sé. Nou-s est supposés dé l'faithe à deux heuthes du matin, mais nou l'fait en s'couochant et v'là tchi r'veint au même.

 

Nouot' preunmié niet à bord s'est bein passée. Ouaithe qué la mé n'tait pon rude, nou n'éthait pon quand-même peut dithe qu'oulle 'tait calme, mais ou' n'tait cèrtainement pon rude assez pour mett' lé monde malade. Les r'pas sont supèrbes. I' faut y'aller à deux fais car i' n'y éthait pon assez d'run dans la salle à mangi pour y mett' tout l'monde en même temps. Y'a un bieau grand cinnéma à bord, et deux baingnerêsses pour les passagièrs dé la classe touriste, iune pour les mousses et ieune pour les grands où-est tch'i' peuvent nouer à lus tchoeur-content. Et yen a ieune en preunmié classe et ieune pour les membres d'l' êtchipage. Ch'est d'l'ieau d'mé tch'est faite sèrvi dans toutes les baingnerêsses. Oulle est pompée d'dans fraîche touos les jours.

 

J'faîsons sèrvi chînq chents tonnieaux dg'ieau douoche à bord par jour, pour les bains et douches et pour sé laver, graie les r'pas, laver les vaissieaux, et comme bouaisson. Auve lé navithe combl'ye d'êtchipage et d'passagièrs, v'là tchi veurt dithe à bein près septante pots par pèrsonne par jour. L'ieau douoche qué j'faisons sèrvi pour touos les besouains est rêéllement d'l'ieau d'mé êvaporisée, purifiée et raffinée par sept grands êvaporisateurs tchi sont pliaichis et font lus travas dans la chambre ès machinnes dans l'fond du navithe.

 

J'avions fait entre quatre et chînq chents milles à méjeu, et j'entrons dans la Baie d'Biscaye. La mé est pus mouvementée, mais jé n'l'avais janmais veue si belle dans la Baie, et n'y a pon hardi d'monde malades, ouaithe tch'i' y'en a tchi pathaîssent un mio badauds et tchi sont verts lé tou d's ouothelles! J'avons tous l'envie d'êt' dans la Méditerranée. Faudra avanchi l's holouoges un aut' quart-d'heuthe à ces sé.

 

Eune aut' bouanne niet d'dormi nouos amène au traisième jour en mé. J'avons passé Gibraltar dé vièrs trais heuthes ch't arlévée et l'fanmeux rotchi pathaîssait formidabl'ye et même majestueux d'la mé. Il a ieu san portrait prîns par un tas d'monde. La mé 'tait calme comme j'avanchions dans l'Dêtrait, et nouos y v'là, dans la belle Méditerranée! À méjeu j'avions fait 595 milles dépis la même heuthe hièr à eune vitesse dé vîngt-chînq noeuds. La tempéthatuthe est souoxante-quatre dégrés.

 

Eune belle matinnée siet eune belle niet. À matin, j'appréchons d'La Sardaigne. Ch't arlévée, j'avons appèrchu l'Ile dé Toro au seur-vouêst, et à sept heuthes un quart j'avons passé lé Cap Spartivento, lé point l'pus au sud d'île. Tout l'monde tch'ont des longues-veues 'taient dêhalés à vaie la tèrre.

 

Y'a eune inprinm'thie à bord, et touos les jours lé garçon d'chambre nouos apporte eune pétite gâzette tchi donne les nouvelles mondiales, et en même temps, un r'cit d's activités proposées pour lé jour à bord. À matîn, jour du vîngt-trais d'Novembre mil neu' chent souoxante-trais, j'avons la triste nouvelle dé l'assassinat du Président Kennedy des Êtats-Unis d'Améthique. Nou n'pouvait pon en r'vénîn! Ch't êvènement tragique a 'té l'sujet d'convèrsation à bord tout l'jour, et y'a ieu un tas d'expressions d'sympathie pour la veuve, présente à la mort si creulle dé s'n homme.

 

(A sièthe)

 

George d'La Forge

 

En Améthique,

Lé 19 dé juin, 1964.