1954: Ph'lip va es Etats

 Ph'lip va es Etats.

Merrienne le tchestchonne.

 

Moussieu l'Editeu,

 

Viyan que n'y avait pas grand' chose à faithe sûs la ferme, et qu'la Merrienne pour une fais tait d'bouonne humeur, j'print la bus Mardi matin pour aller ès Etats vais l'qu'mench'ment d'la séssion. Quand je r'vint dans l'arlevée la bouonnefemme fit une tâsse de tais et, assise à la tablye assez près du feu, ou me d'mandit tchèsque j'avais veu et entendu.

 

“Eh bein, Merrienne,” j'y dit, “j'en ai veu et ouï pûs d'une sorte, mais, à prendre yun dans l'autre, le jour n'a pas tait r'mérquablye.”

 

“Y n'fallait pas s'y'attendre,” ou dit, “car tous l's'ans ch'est la mème boutique. Les preumiers jours ch'est tréjous la paix et la trantchillité dans l's'Etats, mais par chein qu'nou m'a dit, y'étha du feu d'satchi pûs tard. As-tu fait mes compliements à mes cousines d'Saint Louothains et d'Saint Martin ?”

 

Pour vos dithe, Moussieu, je n'les avais pas veux, ni l'un ni l'autre, mais j'n'ôsais pas l'dithe, car la Merrienne éthait peut craithe que j'n'avais pas tait en Ville du tout. Comme ou l'savez, ou peut être drôle par bordeé, la vieille.

 

“Sans doute, oui,” j'l'y dit, “et y m'ont d'mandé de te r'mércié et de t'dithe tch'y veindront béthe une tâsse de tais tchique Dîmanche arlevée.

 

“Y'a une chose,” je continuit. “J'me s'y trouvé dans la Place Royale en temps pour vais tous les membres arrivé, et ch'tait pliaisant d'les vais si bein habillyis. J'm'en ai pas veu yun tch'y n'tait pas frais râsé et tch'y n'tait pas en tout san Dimanche. Et tu pâsle de bianches dgènes et d'bottes bein biéchinnées!”

 

“Grâce à lûs femmes,” dit la Merrienne. “Quand j'vêrrai un membre d's'Etats à faithe chonna l'y-même j'écrithai une lettre à la gâzette disant tch'y méthite une médaille, quant ou s'sait faite de poté. Mais tchèsqu'y s'est arrivé dans la Chambre ? Y'a-t'y yeu des discours?”

 

“Oui assez,” j'l'y dit, “mais rain à cratchi. Après une heuthe, ou d'même nou, viyait des membres s'ebâillyi, et d'autres tch'avaient l'siers prèsque freumés, sans doute pour entendre mûs. Sûs la fin y'a yeu un vote pour tchiquechose que je n'comprenais pas, et j'garantis que je n'tais pas l'seul. Mais arrête! N'y étha pas ditet bétòt quand l'projét au sujet du service national s'sa introduit.”      

 

 “Bon!” ou s'fit, “J'pensais qu'nous avait fini avec tout chonna. Veur-tu m'dithe tch'y voudraient ocquo envié nos garçons en Angliétêrre ?”

 

“Oui,” j'l'y dit. “La preumié fais le Sénateur Collas, tch'y tait Président du Comité d'la D'fense résignit quand son Projét fut renversé, mais l'Comité décidit d'r'êprouvé, et je n'sais pas trop comment qu'chonna finitha. J'ai d'la peine à craithe que l'Comité remportetha, mais y'a du monde tch'y craient qu'l'opposition chutte bordée ne s'sa pas si forte. Y'a, tchéstchon étout, de chein qu'j'entends de résuscité notre ancienne Milice, mais l'Comité n'en veur rain de ch't'idée-là.”

 

“Et y'étha-t'y des reunions d'constituants,” ou d'mandit, “ou faudra-t'y qu'toute la pâraisse de Saint-Ou s'trouve en Ville quand l'jour veindra? Tu n'as pas oublié que l'Jack Le Mérquand avait promint chonna si l's'Etats taient tétoignes.”

 

“Véthe,” j'l'y dit, “mais n'y'a rain à faithe ach'teu; nou vêrra quand l'temps veindra. Quant ès reunions d'constituants, y n'sèrvent de rain. J'ai tréjous tait d'opinion, que quand nous a assez d'confiance dans un homme pour le nommé Député ès Etats, nou dév'thai s'fié sûs san jugement, autrement aussi bein y mettre un but d'bouais ou un trou d'chouor. Nou n'entendais pas pâslé d'chu gniolin-là dans l'temps d'man pèthe.”

 

“Tout chonna est bein bon,” ou dit, “mais si un Député vote contre la volonté d'la majorité d'ses constituants, tchèsque nou peut faithe?”

 

“Nou peut l'fichi à la porte au but d'ses trais ans,” j'l'y dit.

 

“ J'sais bein chonna,” ou dit, “mais un homme peut faithe bein du ma dans trais ans. Nous a veu chonna d'vant agniet. Ach'teu y faut qu'j'aille jusqu'au poulaillyi car y'a une poule tchi fait la mine de couardé, et j'espèthe que d'main j'pouorrai la mettre à coué.”

 

Ph'lip

1954