“Je me d'mande. Est-ce vraiement un bardgain?”

 “Je me d'mande. Est-ce vraiement un bardgain?”

par 'Charlot'.

 

Je n'pouvais pas craithe mes s'yiers Mercredi passé huit jours. J'taimes a faithe nôt boutiqu'sie de s'm'naine dans l'grand surmarchi au pid d'la Vallée des Vaux, quand tout d'un coup Mélie m'donnit un coup d'coute et pointi dans la direction des ais d'bouaisson.

 

Ch'tait nos viers anmins Pierre et Adèle LeCaudé. Je n'lés avaimes pas rencontrées depis plusieurs années. Le pourre Pierre 'tait dev'nu bein adossé et ch'tait auve d'la peine tchi pouvait marchi sans l'aidge de son batôn.

 

“Eh Bein, chés ichin la dernier pliaiche que j'm'attendaits de t'rencontrer. Tu' és liain de siez té. Est-ce tch'in i'a pus d'boutiques a St. Ouë”, j'lis dits.

 

“Mon pouorre garcon,” Pierre reponni, “la p'tite boutique au but d'la route a 'tait freunmée par l'ordre du Vicomte. I sonts plusieurs milles louis en dette, toup causer par des grandes entreprinses comme chennechin, ch'est une vraie honte que le p'tit entrepreneur escait etrangi d'commerce”.

 

Nos anmins avait prins l'opportunité d'viagi d'l'aute coté d'l'ile par-ce-que lus fille et bieau-fils etaits en vacances, et avaits decider d'visiter 'Safeways' pour un r'change.

 

Adèle nos racconti comme tchi qu'ou s'n'allait mantchi la p'tite boutique qu'avait 'tait en existence depis les jours de s'n'éfance. Ch'tait s'n'habitude chaque matin d'aller cherchi ses deux pintes de lait et d'autres p'tites choses. Bein seux ou s'n'aller mantchi le catchet, car la p'tite boutique 'tait le rendezvous pour apprendre les nouvelles du vaisinné et d'paraisse.

 

Ch'tait la preunmié fais que Pierre avait rentrer dans un surmarchi et i'n pouvait pas craithe ses yiers quand i viyait des gens auve des tchéthiots remplyies au par-dessus de toutes sortes de ledgeunmes, pains, gâches, conserves, viandes et bouaisson.

 

Nou dithait que l'argent crais sus les bouais la manniethe que les gens acate au'jourd'aniet”, s'fis Pierre. La pourre Adèle ergarder auve les yiers envieux, car etants tch'ils avaits 'tait ertithées pour plusieurs années et souffert d'la maladie dernierement i'n 'taits pas dans une position d'depenser a mal apropos.

 

Toup d'un coup, Pierre pointi a une affiche sus l'ais d'bouaisson 'Acate deux boutelles et la traisieme setha mié prix'.

 

“J'connais un bardgin quand j'en vai ieun”, i s'fit, et dans un coup d'satchet trais boutelles de bouon vin d'Bordeaux 'taits dans l'tchéthiot.

 

Adèle n'avait autchune intention d'etre bâttue car ou'lle deja apérchu que siez tinnées d'saumon lus vendaits pour le prix d'chinque et sans avait dit autchune chose a Pierre, ou'lle avait fait seux d'obtenin un bardgin étout.

 

“I'a trejous un mot d'avis”, j'dits a Pierre. “Janmais laisse ta bouonn-femme seule dans chés boutiques, car i'a trejous une certaine tempation d'atchumuler des articl'yes tch'in sonts pas nécessaithes. Je réalise chenna chaque fais quand j'arrivons au point d'paiement.

 

La boutique était remplyie d'clients et comme j'avaimes appathence d'etre a causer une obstruction j'dits tchi 'tait temps d'nos carrer.

 

J'espêthe que Pierre et Adèle lus sonts bein rejouies d'lus achâts. Achteu tch'ils ont gouôter d'la bouonne vie, i s'peut tchi prendrons l'habitude de visiter le surmarchi rédguliéthement.

 

Ches malheutheux que les p'tits commerce de compagne ne peuvent pas continnué en existence a cause de la gourdmandise des grandes entreprinses.

 

La même chose se passe envers les p'tites fermes du temps passé en comparaison des grand fermes du jour d'aniet, les p'tites maisons d'pension et les grandes hotels.

 

Ch'est ch'la que j'appelons 'Progrés', mais pas trejous pour le meilleu.

 

Clifford Laisney