1964: En c'mîn pour l'Australie! (1)

 En c'mîn pour l'Australie!

 

En Améthique.

 

Lé 12 dé juin, 1964.

 

Moussieu l'Rédacteu,

 

Comme i' prend pus d'trais s'maines dans un grand stînme tchi peut faithe eune mouoyenne dé vîngt-chinq noeuds par heuthe pour aller en Australie, et qu'nou-s a eune vie întérêssante à bord et un tas d'aventuthes en c'min, il est împossibl'ye d'en donner un bouan r'cit dans eune seule colonne dé la gâzette, ch'est-en-tchi ch't histouaithe s'en va êt' continnuée dé s'maine en s'maine pour tchique temps. J'espèthe qué vouos lecteurs s'en vont la trouver întérêssante assez pour en continnuer la lectuthe!

 

Ch'est l'vîngt d'novembre mil neu' chent souoxante-trais, et nouos v'la à bord du stînme. Il a tchaie hardi d'plyie et l'temps a 'té rude en Jèrri pour eune sémaine dé temps, mais l'solé lie aniet et l'temps pathaît bé. I' faut espéther qué v'la tchi s'en va continnuer. En pâlant d'Jèrri: J'tions là y'a un coupl'ye d'jours, dans chu p'tit pays tch'a donné tant d'naviguants avau l's années dans l'temps des navithes à vailes, et d'pis étout. Mais chu navithe-chîn est tout-a-fait eune aut' affaithe! San nom est l'même comme lé chein d'la capitale dé l'Australie, le Canberra. Il est iun des pus modèrnes navithes du monde. Il a au mains siez chents pids d'londgieu et ch'est un navithe dé quarante-chînq mille tonnieaux tchi porte deux mille passagièrs. Sa vitesse mouoyenne est dé vîngt-chînq noeuds, et i' peut aller pus vite au bésouain!

 

Tchi tîntâmarre à Southampton pour v'nîn à bord à matîn! À c'menchi, i' faut tâchi d's'înmaginner combein d'vouaituthes tch'i' faut pour transporter à la cauchie touos les cheins tchi veinnent dé d'siez ieux ou d's hôtels, sans pâler des cheins v'nus par le “Boat Train” tch'amène un tas d'pèrsonnes dé Londres et d'aut' bords tout drait sus la cauchie au côté du baté. I' sont chèrgis d'valises et d'patchets et il' ont lus mousses auve ieux. Les pouorres mèthes ont tout ch'tchi'i' peuvent faithe à aîdgi à lus hommes à porter les bagages et à garder l'yi sus l's êfants tchi les tcheinnent par la robe (et les robes tchi sont si courtes à ch't heu!) ou même tchi tcheinnent la ficelle des patchets, les hangnes des valises ou la câsaque à p'pèe! Et pis, étout, i' n'faut pon oublyiyer qu'un tas d'pathents sont v'nus condithe fis et filles au baté. Il' ont pèrmission dé v'nîn à bord, et i' veulent vaie l'navithe tchi s'en va enm'ner les leurs au liain pour né p't êt' janmais les r'vaie sus chutte tèrre, viyant qu'un tas d'ieux s'en vont s'êtabl'yi en Australie et à la Nouvelle Zélande.

 

Dévant embértchi, y'a un tas d'formalités à passer l'travers. Sus la cauchie y'a d's allées arrangies atout des bârrièthes tchi r'sembl'yent à des grand' héches mînses but à but, et tchi mênent en fîn d'compte à l'entrée d'la “passerelle” tchi monte à iun des ponts du navithe. À m'suthe qué châque pèrsonne marche dans l's allées i' faut présenter les passeports à un moussieu du Gouvèrnément pour l's aver mèrtchis. Pus liain i' faut montrer l'billet d'pâssage a un aut' moussieu tchi s'asseûthe qué l'passage est payi et que l'pâssagi a l'drouait d'aller à bord, et la pèrmission accordée à pathents et anmîns d'aller à bord est exanminnée étout.

 

Si y'avait du tîntamarre a terre, pouvons vouos înmaginner tch'est qu'ch'est à bord à ch't heu? Deux mille pâssagièrs et prèsqu'autant d'visiteurs en même temps! Quâsi quat' mille personnes à marchi partout pour vaie les cabines, salles à mangi, salles de rêcréation, aubèrges, cinnéma et toutes les c'mmodités et mèrvelles qué nou trouve sus un grand navithe dé nouos jours - autant comme y'en a dans eune grande hôtel, et acouo pus viyant tch'i' faut vivre en mé pour des s'maines dé temps et faithe lavage et féthage sus les lieux! L's aubèrges - y'en a eune démié-douzaine à bord - sont dêjà quâsi plieinnes dé monde ouaithe qué l'navithe est acouo amathé à la cauchie. I' pathaîssent aver eune fichue sé! Y'étha ieu eune forteune dêpensée à baithe dévant l'arrivée en Australie. Les mousses, dêbarrassés d'la main d'pèthe et d'mèthe pour lé moment, lus sauvent et c'menchent à couôrre et grîmper partout et beintôt les pathents sont au m'sespé à êprouver à les r'trouver. Lé brit des mousses à couôrre et pliailli, et d'tout l'monde à pâler en même temps est încriyabl'ye! Pourtant, tout d'un coup l'silence! Eune clioche veint d'sonner partout l'navithe et eune forte vouaix s'fait ouï dé touos les “hauts-parleurs” disant: “Touos les visiteurs à tèrre!”

 

Tchi confusion! Les vièrs sé mettent à plieuther en tchittant les jannes et lus êfants tch'êprouvent, auve pus ou mains d'succès, à n'pon lèrmer endrait l's anciens! La grand' partie des visiteurs s'en vont. Ch'est un vraie exode sus les “passerelles”. L's uns s'en vont douochement et trantchil'ment. Nou vait tch'il' ont du chagrîn d'aver a tchitter les leurs. Y'en a tchi restent acouo à d'viser sus l'baté, mais eune deuxième son'nie d'clioches et d'vouaix dans les hauts-parleurs annonçent qué l'navithe est prêt à dêmather et qu'ch'est la dreine fais qu'les visiteurs sont dgèrnis d's'en aller et i' s'en vont déliément!

 

(À sièthe.)

 

George d'La Forge.