2011: Lettre Jèrriaise

 Lettre Jerriaise Lundi 28 de Novembre 2011.

 

Acquo une fais ch'ést auve grand plaisir que me r'vela Clifford Laisney a vos presenter mes pensées aniet lundi l'28 de Novembre 2011.

 

Ne v'la deja un mais qu'javons erterdgi l's houolouges, les heûthes de lumiere d'jour sont limitées, et dans trais s'm'naimes j'aûthons arrivé au pus court jour de l'année. Couomme
tchi qu'el l'temps s'passe. Dans parichin, j'avons rejoui d'un autonme doux et calme, pas
d'grands tempêtes, mais une écarcite plyie, resûltant en deficit d'ieau dans les reservoirs
necessitant l'engagement de la station tchi convertie ieau d'mé a ieau fraiche.

 

Accordant es autorités d'établiassement d'ieau, le couôtement de l'entreprinse de converti a ieau fraiche est envers £4000.00 par jour. Chais grand dommage tchi'ils peuvent pas utilisé chutte faculté dans les pays tchi souffre manque d'ieau fraiche.

 

J'aime hardi la saison d'l'autonme. Ch'est la termination d'une vie t'cha c'mmenchi au r'nouvé auve un bourgeonnant d'boutons d'flieurs, les nouvieaux herbages et l'eppannisage de jeunes fielles de bouaissies. Ch'ést vraiment pittoresque de vaie comme tchi qu'les bouais déffieillisse de lus fielles si coulouthantes en prepathation d'trais mais d'erpos devant ercommenchi un nouvieau cycloide de re_generathion.

 

Quand j'tais jeune nous attendait l'mais d'Novembre et ses longues sethées car ch'tait la
saison d'carnavals, les pus anciens d'vous lus rappell'thons du revillion sus l's'éxhibits
d'tchetheytes décorés d'lampions et normalement halées par un j'va ou deux. I'n 'tait pas
nécessaithe d'aver des artistes proffessionel pour amuser les foules de gens tchi comptées
l'carnaval ieune des grandes fêtes de l'année. I'avait toutes sortes d'amusements, des bandes de musique, des jeux d'chance, une fouaie d'jouaie, tente a bouaisson et raffraichements, et trejous une vannée d'confetti patchies en pôuques a pâpi. Ch'tait une bouonne occasion pour les jeunes de lus entre pelter. Ch'tait rare tchi i'avait d'troublyea chés sethées. Les gens, la majorité etants compagnards joignaits dans une cordialité d'jouaie. Ah! Les bouons viers temps.

 

Et achteu, suivant siez s'm'naines de manôeuvres éléctorales, les élécteurs ont finnalement
chouasi les candidats tchi sont vont servi lus terme comme erpresentants d'lus paraisse,
ou district. Dépis les nominations, les candidats, que'je fusse l'office de Senateur, Deputé, o
Connétablyes onts participer d'harangui l's'assembliées electorales decliathants lus differents points d'veue et présentants lus manifestos sus lus manniethe de gouverner. Souvent, la majorité d'candidats 'taits d'une animme en reponnant es tchestchions d'l'audience pour l'electeur ch'tait pas trejous aisi d'faithe jugement sus lus reponses. Enfin, tout est passé, et j'avons une nouvelle assembliée a nos guider pour les prechâine trais années. Et pis etout, j'avons un nouvieau premier ministre pour guider l'Assembliée Generale. Comme d'autes jurisdictions l'tou du monde, Jerri a ses problêmes, et souhaittons le nouvieau gouvernement bouonne chance dans lus deliberations.

 

J'ai d'la peine a crâithe que dans quatre semaines hier, je sethons a celebrer le Jour de Noué.
I'a deja tchique semaines que les boutiques onts c'mmenchi d'ettaler lus marchandises en
effort d'attither lus clients d'acater. Pour les fanmillyes ouaiq' q'ua plusieurs énfants, ch'est un temps d'ébouisement car les mousses lus attendent d'erchever des presents cououteux, pas couomme ma genethathion quand un patchet d'cartes ou une bouêttée d'dominos nos donner tant d'satisfaction. Ennfin j'vivons dans un different temps et ch'est nécessaithe pour nous d'nos acc'moder a ches temps moderne.

 

J'ai erchu une nôte de la secretaithe du Conmité Dramatique de L'Assembliée d'Jèrriais vos
avisant que Le Service Annuelle des Cantiques de Noué autha lieu dans l'Eglyise de St André Samedi l'10 d'Décembre a 6 heuthes et d'mie, suivi par souper dans la Salle. Titchets pour le souper couotants £10. peuvent etre obteins de Tony et Barbara Le Geyt Tel 862861.

 

Merci pour vôt compagnie, j'vos souhaite une bouonne semaine et bouonne santé comme trejous. A LA PRECHAINE.

 

Clifford Laisney