1954: La grande reunion

 La grande reunion

Ph'lip était là.

 

Moussieu l'Editeu,

 

  Comme un bouon Saint-Ouennais, j'm'en fut à l'Hotel de Ville Mardi au sé pour ouï tchèsque not' Jack, ch'est-à-dithe le Sénateur Le Méquand, avait à nos dithe au sujet d'l'Asseuthance Sociale. Je r'vint sûs l'tard, et la bouonnefemme ne dit pas un mot jusqu'à l'préchain matin comme ou tait en train d'bouoillyi une demié-doûzaine d'œux pour notre déjeuné.

 

  J'n'avais pas grand faim, pour dithe vrai, mais je n'voulais pas l'dithe, car j'viyais bein qu'la Merrienne s'en allait bétôt m'attatchi. J'n'eut pas longtemps à attendre.

 

  “Une belle heuthe à r'venin,” ou s'fit sèquement. “Prèsque une heuthe du matin, et assez d'brit en ramontant le d'grès pour rêvillyi l'vaisiné. To dév'thais avé honte, Ph'lip, à l'âge qut tu'as.”

 

  “P't'être bein, Merrienne, sûs un sens,” j'l'y dit, “mais la reunion duthit pûs longtemps que je m'attendais. Epis, faut pensé qu'y'a un but à r'venin jusque ichin d'la ville.”

 

  “Jamais tu n'me dithas,” ou s'fit, “qu'un homme réspectablye comme le Jack Le Mérquand restit à baillyi d'sa béque jusqu'à miniet. Quant à la distance de la ville, peux-tu m'dithe comment qu'tu r'vint?”

 

  Ou me d'mandit par tchy, mais, Moussieu, je n'put pas l'y dithe, car j'avais totalement oublié.

 

  “Je n'm'en êtonne pas,” ou dit, “mais enfin, j'espèthe que tu n'as pas oublié tchèsqu'y s'arrivit au meeting. A qu'menchi, tchésqu'y tait dans la tchaise?”

 

  “Ch'tait l'Douar Le Tchèsne,” j'l'y dit, “et y fit un excellent président, car y n'dit prèsque rain; après tchiques patholes en qu'menchant.”

 

  “Mais,” ou dit, “comment tch'y vint à être là comme président? J'avais tréjous ouï que dans l's Etats y taient comme cat et tchian. Nou m'avait même dit que yunne ou deux bordées, en comité, l'Sieur Le Tchèsne avait tait sûs l'point d'happé not' Jack par la pé du co pour le fichi d'hors. Ach'teu tu dis tch'y sont bouons amins!”

 

  “Y lûs entre aiment tant,” j'l'y dit, “que pûs d'une fais j'contais tch'ils allaient s'entre embréchi, et quand l'Sieur Le Tchèsne r'veindra dans l's' Etats - “

 

  “Tchèsque-tu dis là?” Oulle interrompit. “Crais-tu vraiement tch'il a chutte idée-là?”

 

  “Seux et certain,” j'l'y dit, “et il a dêja san propôsant et s'condant pour la preumié vacance pour Sénateur. Nou m'dit au meeting que ch'tait l'Sénateur Krichefski et l'Deputé Cyril Le Mérquand, mais je n'sais pas si ch'est vrai.”

 

  “Eh bein, eh bein!” ou s'fit, “après chonna j'ne s'sais pas êtonnée d'vais la lune touôné bliue. Mais, dis-mé, paslit-y bein, not' Jack?”

 

  “Hardi bein,” j'l'y dit. “Jamais je n'l'avais ouï s'explitchi si bein et si cliathement. J'tait un vrai pliaisi d'être là à l'êcouté.”

 

  “Et tchèsqu'y propose?”

 

  “ Y propose de laissi les contributions comme y sont, mais d'hauchi chein qu'nou r'chév'tha”

 

  “Ch'est tréjous tchiquechose,” ou dit, “mais ch'est grand dommage que nou n'peut pas envié chutte fichue louai complietement dans les fonds perdus. Mais, dis-mé, y'avait-y du monde au meeting?”

 

  “La salle tait pliène,” j'l'y dit, “et ch'tait d's'applaudissements à toute minute. Mais, Merrienne, y n'faut pas oublié que ch'n'est pas la fin. Y'a ocquo l's Etats à considéthé, car ch'est yeu tchi décident. Et y'en a une dgaingue-là tch'y n'voudront rain de chein tch'est proposé. Le Jack veur des reunions dans toutes les pâraisses, et dit qu'autchun r'présentant, r'fûsant d'obéi à ses constituants dévthait être fichi à la porte, mais nous a ouï chonna d'vant et rain n'a tait fait. Enfin, ch'est l's'êlections à la fin d'l'année, et y'étha une chance de faithe tchiquechose.”

 

  “Tu'as raison, Ph'lip,” ou dit. “Y n'faudra pas oublié quand l'temps veindra.”

 

Ph'lip

1954