1981: Les Jèrriais à La Côte

 Les Jèrriais à La Côte

 

Trenton,

Michigan, U.S.A.

 

Lé 27 dé juin, 1981.

 

Moussieu l'Rédacteu,

 

I' y'a si longtemps qué j'n'ai pon visité La Côte dé Gaspé qué dans des temps j'ai quâsi envie d'y r'pâsser un êté. J'crai bein qu' jé s'sais d's'appointé viyant qué quâsi touos l's anmîns qué j'connaissais là sont au r'pos étèrnel. Né v'là chein tchi s'arrive quand l'pâssage du temps donne raîson au vièr diton Jèrriais tchi nouos dit tch'i' faut vivre vyi ou mouothi janne!

 

Eune lettre èrchue à ches drein dé m'n anmîn Joseph Le Floch tch'a nénante ans - beintôt nénant'tch'ieune - et tch'a pâssé la grand' partie d'sa vie à La Côte pour les Robins, mais tch'i' d'meuthe à Montréal à ch't heu, m'dit: “La Côte n'est pus la même comme j'l'ai connue dans man temps. Comme la grand' partie du monde qué j'avons connu n'sont pus du rang des vivants, j'sommes des êtrangièrs à la jannèche d'à ch't heu. Des neuves maisons ont 'té bâties tout l'long des routes et La Côte pathaît prospéthe - ès frais du gouvèrnément - et v'là tchi veurt dithe ès frais du contribuabl'ye sans doute.

 

“La grand' partie des vîngt-deux (ou pus) 'Pâssages à niveau' du train dé Métapédie à Gaspé ont 'té modèrnisés, et un système dé veues sîngnaleuses et avertis automatiques ont 'té instaillés.”

 

L'anmîn Le Floch mentionne les noms des Jèrriais acouo en vie. I' m'dit qué George Camiot est acouo à L'Anne au Beaufils. Né à La Côte, il est fils du bouanhomme Camiot, né à Ste. Mathie ou St. Jean, tchi s'en fut là-bas quand j'tais mousse. Arthur Ollivier du Ouaisné à St. Brélade aut' fais, et Hedley Miché, sont acouo du rang des vivants à Paspédgia. Ch'est seux tch'i' sont avanchis dans lus huiptantaines. Fraînque Le Gresley, fréthe dé Madanme Le Bro des Châtaingniers à St. Ouën, et Bert Manning sont acouo gentiment bein allants à New Carlisle. Et Douglas Barette est en bouanne santé à Bonaventure, où'est tch'i' mênagit la boutique des Robîns pour bein d's années et pus tard sus san compte.

 

Ch'tait l'six d'mai, 1907, qué Joseph Le Floch et d'aut' jannes Jèrriais tchittîdrent Jèrri à bord de la Fanny Breslauer pour La Côte, et i' n'y'a qu' li et Douglas Barette vivants à ch't heu dé chutte cartchaîson-là, septante-quatre ans pus tard.

 

J'm'èrsouveins bein d'la Fanny, comme nou-s-appelait l'navithe Fanny Breslauer pour court. J'l'ai veue bein des fais comme mousse dans la caûchie quand j'allais en ville auve Papa. Ayant 'té naviguant li-même, il aimait les navithes. J'tions souvent învités à bord par les Cap'taines tch'i' connaîssait.

 

Mais r'vénant à La Côte. À ch't heu tch'i' y'a si p'tit d'Jèrriais d'restant là-bas, j'mé d'mande s'i' y'en a assez d'lus d'scendants pour garder l's églyises Anglyicannes, bâties par lus anchêtres, en allant. Pour les r'corder, et pour tch'i' n'saient pon oubliées, n'en v'chîn la liste. À Gaspé, l'Églyise St. Paul; à Sandy Beach, l'Églyise dé St. John; à P'tit Gaspé et Grande Grève (j'pense qué chutte contrée est un par national à ch't heu) l'Églyise dé St. Peter; à Péninsule, l'Eglyise dé St. Matthew; à L'Anse à Brillant, l'Églyise dé St. Peter; à Barachois West, l'Églyise dé St. Paul, au Coin du Banc, l'Églyise dé St. Luke, à Percé, l'Églyise dé St. Paul; à L'Anse du Cap, l'Églyise dé St. James; à Chandler, l'Églyise dé St. George; à Newport, l'Églyise dé St. Peter; à L'Anse au Gascons, l'Églyise dé St. Philip; à Port Daniel, l'Églyise dé St. James; à Shigawake; l'Églyise dé St. Paul; à Hope Town, l'Églyise dé St. James; à Paspédgia, l'Églyise dé St. Peter; et à New Carlisle, l'Églyise dé St. Andrew.

 

J'vouos ai donné les noms Angliais des saints à tchi l's églyises sont dédiées, car ch'est d'même tch'i' sont connues à La Côte. Les Jèrriais prannaient grand soin d'prêsèrver l'fait tch'il' 'taient Britanniques. J'ai 'tait dans toutes ches églyises, et j'ai r'cordé les noms des Jèrriais entèrrés dans lus chînm'tchiéthes dans man livre “Jèrri Jadis”. I' y'en a tant d'entèrrés à La Côte, dé Jèrriais, tch'i' dev'thait êt' aîsi d'y craître des patates!

 

À m'suthe qué les d'scendants d'Jèrriais mathyissent des Françaises-Cannadgiennes, l's înfluences Jèrriaises et Britanniques dispathaîssent, et ches belles pétites églyises, bâties auve tant d'êffort et d'dévouement par les Jèrriais pour l'Églyise Anglyicanne, s'en vont dispathaître étout, par manque dé support.

 

George d'La Forge.