1982: L's êlections

 L's êlections

 

Trenton,

Michigan, USA.

 

Lé 30 dé janvyi, 1982.

 

Moussieu l'Rédacteu,

 

J'viens d'aver l'pliaîsi d'èrchéver la gâzette dé Jèrri du vîngt-trais d'dézembre et vaie l'rêsultat d's êlections pour député dans L's Êtats. Ch'est d's anmîns tchi d'meuthent à Califournie tchi m'l'ont env'yée. Ch'est întérêssant d'vaie chu resultat et êtonnant dé r'mèrtchi lé p'tit nombre d'êlecteurs tchi prannent la peine d'aller voter. Rein qu' vîngt-chînq à trente-neu pour chent à St. Hélyi et 27 à 54 pour chent à St. Brélade.

 

Mais chein tchi m'întéresse hardi comme vièr Jèrriais et consérvateu est qué sus dgiex-huit candidats êlus i' n'y'en a qu' huit tch'ont des vièrs noms Jèrriais-p't-êt' qué nou peut dithe neuf si nou-s-accepte lé nom d'Farley comme étant Jèrriais à cause d'un tas d'généthations nées dans l'Île. L's anciens éthaient prononcé chu nom-là “Fèrlé.”

 

Ch'tait l'même cas dans l'êlection pour Sénateurs. Comme jé l'disais dans ma lettre du seize dé chu mais, i' n'y'avait qu' deux candidats gangnants sus chînq hommes, et Madanme Baal, tch'avaient des vrais noms Jèrriais. V'là tchi montre qué nouos Êtats sont en harmonie auve l'annonce dans eune gâzette èrchue dreinement tchi nouos dit qué la Maintchi d'la populâtion actuelle dé l'Île est pro'nue d'hors-pays.

 

J'vai qué L'Sieur Maurice Buesnel a 'té êlu pour St. Hélyi nunmétho deux. Ch'est eune bouanne rêcompense pout san couothage et sa pèrsistance.

 

Comme jé l'ai souvent dit, i' faut sŷmpathiser auve les pèrdants, prîncipalement auve les cheins comme lé Sieur Clarence Dupré tch'a 'té si longtemps dans la Chambre Législative. Mais comme y'a tréjous des gângnants i' faut tch'i' y'aie des pèrdants. Et i' n'faut pon oublier qu' nouos anciens nouos ont laîssi un vièr diton tchi nouos dit qué “Tchi sèrt lé publyi sèrt un îngrat". I' m'vient à l'idée qué ch'est p't-êt' viyant qu' un tas d'gens sont dév'nus enn'yés du tourisme qué l'Sieur Dupré en a finnalement pèrdu. Et j'ai r'gret qué jé n'vèrrai pus les discours dé deux illustres membres à l'occâsion des futures séances dans la Chambre - Messire Robert Mathet, dé mémouaithe respectée, et Moussieu d'La Trinneté.

 

Eh bein, né v'la don Les Vaux des Moulîns (mênommés “Queen's Valley”) condâmnés acouo eune fais par seulement deux vouaix. Nou peut penser qué ch'est pour soulagi la sé touristique qué les membres d's Êtats veulent înnonder. Pourtant, l'tourisme pathaît en pèrdre. J'mé d'mande tchi rêsultat qu' un “plebiscite” ou “referendum” dé tout l'peupl'ye d'l'Île nouos apportéthait comme décision, et quand les vouaix des membres montrent si p'tit d'difféthence entre lé pour et l'contre, nou créthait qué l'peupl'ye dé toute l'Île dév'thait aver l'drouet d'en décider. Les Députés sont supposés èrprésenter lus constituants, mai i' pathaîssent voter à lus gré. I' s'en va êt' întérêssant d'vaie si lé “National Trust” et la pâraisse dé Grouville, tchi n'veurt pon laîssi couorre un coupl'ye d'routes, ont autcheune chance d'êviter l'acat oblygatouaithe.

 

Lé pâssage du temps apporte des changements, et j'vai qué l'nombre d'barbus et longs g'veux parmi les nouvieaux mathiés a rap'tchi considéthabliément. J'èrgarde tréjous lus portraits dans la gâzette, et y'a tchiques années y'avait tant d'barbus qué j'mé d'mandais comment qu' lus femmes pouvaient les r'connaître d'avec les marmoûsets quand il' allaient au zoo. Et les longs g'veux 'taient la mode étout.

 

À ch't heu, les portraits des mathiés montrent bein mains d'barbus. Ichîn, en Améthique, la mode pour un homme est en faveur des g'veux tchi couvrent l's ouothelles, et eune londgieu dé deux-s'trais pouces dans l'co, mais les g'veux longs jusqué sus l's êpaules dispathaîssent.

 

V'la tchi m'fait penser ès vièrs temps quand l'homme mettait les braies et la femme les cotillons. Ch'tait rare dé vaie eune femme atout des courts chéveux comme un homme quand j'tais mousse. Ch'tait même si rare qué ch'tait eune tchuthiôsité d'en vaie ieune. Et quand l's hommes avaient eune cèrtaine âge, disons en d'ssus d'chînquante ans, i' gardaient lus barbes. Un homme 'tait considéthé vyi à ch't'âge-là, et ch'tait considéthé èrmèrquabl'ye s'i' vivait pâssé l'âge dé septante ans.

 

Pour mé, lé temps a changi du bouan bord, affaithe d'âge!

 

George d'La Forge.