1981: Mémouaithes

 Mémouaithes

 

Trenton,

Michigan, U.S.A.

 

Lé 16 dé mai, 1981.

 

Moussieu l'Rédacteu,

 

Comme lé temps s'pâssé! J'ai d'la peine à craithe tch'i' y'a trente-chînq ans dépis qué j'tchittis à travailli ichîn en Améthique - ch'tait en mil neu chent quarante-six - pour aller r'vaie Jèrri auprès eune absence dé quâsi vîngt ans. J'tais prêt à l'faithe chînq ans d'vant, mais la deuxième grand' dgèrre, s'était dêcliathée justément dans l'temps qué j'voulais m'èrtither d'affaithes, et comme j'avais un poste assez împortant dans un chantchi dans l'temps, et qué j'tions en train d'bâti des navithes pour lé gouvèrnément, j'mé décidis d'rester en travas pour faithe man p'tit mio “pour la patrie” en temps d'bésoin.

 

Ouaithe qué j'avais ieu d'l'expéthience en l'air, ayant acaté un p'tit avion et l'aver piloté mé-même, j'n'avais janmais crouaîsi la mé dans iun, et j'eus la chance dé faithe lé viage du Cannada à Prestwick, en Êcosse, dans un “Lancaster bomber”. La câle des bombes avait 'té aménagie pour acc'moder des pliaiches pour huit pérsonnes. Un mangnifique avion “bombardier” à quatre engîns, lé Lancaster. I' nouos prînt quatre heuthes à voler à Gander Bay en Tèrre-Neuve, huit heuthes dé là en d'ssus d'la mé à Prestwick, et deux heuthes dé là à Londres - 14 heuthes en tout. J'm'èrsouveins qué ch'tait eune belle niet et au cliai d'la leune en d'ssus d'l'Atlantique et qué j'en 'tais èmèrveilli. Ch'tait à Croydon tch'était l'aéroport dé Londres dans l'temps.

 

Arrivé en Jèrri, i' m'sembliait qu' les rues d'St. Hélyi 'taient hardi êtraites. Ma marraine 'tait acouo en vie, et j'restis siez lyi dans “Phillips Street”. Ieune des préunmié choses qué j'fis 'tait d'aller à ma vielle églyise dé St. Simon, mais j'trouvis la congrégâtion hardi mains nombreuse qu' ou n'tait dans man janne temps. J'eus l'honneu d'faithe la connaîssance du Douoyen L'Mathinné, nouot' drein Douoyen Jèrriais, et comme les sèrvices à l'Églyise Parouaîssiale dé St. Hélyi 'taient comme jé l's avais connus à St. Simon, j'y allais souvent.

 

Ieune des mes preunmié visites dans la campangne fut à St. Ouën, ma pâraisse natale. J'allis par beusse à Portinfer pour vaie eune vielle couôsinne et anmie, la Tante Vîne, veuve dé Ph'lippe Hamon, née Alvina L'Feuvre, dé la fanmil'ye dé Gros Nez, eune anmie charmante et fidèle à tout l'monde tchi la connaîssaient.

 

J'avions tréjous admithé La Route dé Vinchelez justément pâssé les deux mangnièrs, auve sén arche dé bouais (tchi y'avait donné l'mênom dé “Vinchelez Lane” par les Angliais), Papa et mé, quand j'allions à La Grève dé Lé au Vendrédi Saint, et j'avais monté sus l'haut d'la beusse pour êt' seux d'la vaie comme i' faut, mais à ma grand' surprînse j'n'en vis rein, et mé v'là arrivé à Portînfer sans l'saver. Le Tante Vîne m'explyitchit qué ch'tait viyant qué l's Allemands avaient copé touos les bouais.

 

Ch'tait dans chu temps-là qu' j'eus l'bonheu d'faithe la connaîssance dé mes bouans anmîns, l'Docteu et Madanme Fraînque Le Maistre, tchi d'meuthaient à La Fèrme, près d'Portinfer, dans chu temps-là. Il 'taient touos jannes quand j'm'en allis à la dgèrre dé 1914-18 et jé n'les avais pon connus comme mousses ouaithe qué j'connaîssais lus pathents. D's anmîns solides, fidèles et Jèrriais dans l'âme tch'ont aîdgi à faithe un bieau rêve dé mes visites annuelles en Jèrri. Et j'lus en sis r'connaîssant.

 

Portînfer 'tait un point central dé réunion auve lé pâssé pour mé. Douard Hamon (fis Francis) et sa femme Mary, dé Le Petit Hurel, Francis Le Boutilyi (Connêtabl'ye, êt pus tard Juge) et sa danme, née Eunice de Caën, tch'étaient en plieine santé à “Highfield” s'entr'visitaient souvent et j'avais l'privilège d'êt' invité ès bouans r'pas et mangnifiques séthées siez ieux. D's anmîns d'man janne temps, lé Sieur Reuben Thatcher et l'Avocat John Fleury L'Cornu, 'taient souvent învités étout.

 

Dans L'Assembliée au Dînmanche au sé, les Sieurs Douard Le Feuvre, dé Gros Nez (lé fréthe à la Tante Vîne), Fred de Caën (tchèrpentchi), et deux ou trais aut' anciens lus trouvaient en compangnie d'la Tante Vîne, à distchuter l's êvènements du jour. Et quand Fred de Caën s'décidait d's'en aller, i' sé l'vait d'sa tchaise et s'en allait tout drait à la porte sans dithe un mot ni r'garder d'un bord ou d'l'autre, et Douard Le Feuvre disait: “J'dithais bonsouair, mé!” Lé Sieur de Caën s'arrêtait tout court et disait “Bonsouair!” secquement et sans emoué, et contînnuait san c'mîn.

 

I' sont tous au r'pos êtèrnel, ches bouans vièrs anmîns, et nou n'vait pus d'vièrs types Jèrriais d'même. Lé Sieur de Caën 'tait îndépendant et philosophique, trantchil, mais d'caractéthe dêtèrminné. Eune séthée dans L'Assembliée, j'lî dis: “Pourtchi qu' ou chèrgez l'même prix pour lé travas d'un apprenti comme pour un tchèrpentchi d'vocâtion?” En r'gardant tout drait d'vant li, i' m'rêponnait sévéthement “Mêl'-ous d'vouos affaithes, vous!” Et j'tions bouans anmîns.

 

Hélas! Où'est tch'i' sont hors ches bouans vièrs jours!

 

George d'La Forge.