1964: En c'mîn pour l'Australie! (3)

 En c'mîn pour l'Australie!

(Siète)

 

Ouaithe qué ch'est un pays hardi caud, y'a tréjous eune bouanne brise à Aden, et v'la tch'en a fait un port dé conmèrce important à travèrs des siècl'yes, viyant qué dans l'temps des navithes à vailes, les vents 'taient tréjous forts assez - même pour les p'tits navithes chèrgis d'pieaux d'animaux et d'ivouaithe dé La Somalie, ou des produits d'Asie en r'vénant - dé navidgi dans les deux directions en propre saison sans lofer. Dé nouos jours, lé port est acouo pus important, étant dans l'conmèrce d'huile dé pétrole tchi veint d'Kuweit et tch'est fait sèrvi pour remplyi les rêsèrvoirs d'huile des grands batchieaux. L'huile est pompée à bord directement à travèrs dé tchuyieaux tchi condîsent des raffin'nies jusqu'au bord dé la cauchie, et continuent souos l'ieau dans l'fond du havre jusqu'ès stations d'pompes en d'ssus d'l'ieau et à côté des navithes.

 

Dans la ville, nou trouve lé mêlange dé races qué nou vait dans quâsi toutes les villes dé l'Orient. Dans la population dé 140,000 pèrsonnes à Aden, y'a d's Arabes, d's Indgiens, des Juis et des Somalis.

 

Y'a un aëroport dé La Forche Armée Aërienne Rouoyale Britannique, et l's avions civils sont pèrmîns dé l'faithe sèrvi. La colonie a eune grandeu dé 75 acres carrées. Lé Protectorat d'Aden c'menche à Sheikh Saïd, en fache dé l'Île Périm, et continnue dans la direction est en nord-est, et couvre eune êtente dé 112,000 milles carrées. I' fut otchupé par l's Angliais en 1839 et est souos la juridiction du Gouvèrneux d'la colonie.

 

Ouaithe qué la grand' rue d'la ville est belle et modèrne, et qu'y a pus d'proprété par les c'mîns qu'ailleurs, quand nou vait les rues d'drièthe nou créthait qué ch'n'est qu'pauvrété partout, mais y'en a probabl'yement mains ichîn qu'à d'aut' bords. L's Angliais sont en trains d'bâti un tas d'grand' maisons d'tchiques êtages pour louogi la populace. V'la tchi donne du travas es ouvrièrs et l'espéthance dé milyeu louogement en même temps, mais i' n'faut pon oublyiyer qu'ches gens-là multiplyient à grands pas et qu'l'hygiène imposée par l's Angliais a réduit la mortalité des nouvieaux-nés et p'tits êfants. V'la tch'aîgue à aggrandi la population et la nécessité d'bâti acouo pus d'maisons à m'suthe qué l'temps va!

 

Nouos v'là au preunmyi d'dézembre et nouot' deuxième dînmanche à bord. J'laissînmes Aden driéthe hiér au sé, et j'tions dans la Mé Arabe dans les huit heuthes à matîn. Lé temps est bé et la mé calme. I' faut s'habilyi ligièthement, car i' fait grand caud. J'allons beintôt c'menchi à vaie des paissons volants. I' pathaissent voler comme d's ouaisieaux, mais n'ayant pon d'ailes i' n'peuvent pon rêéllement voler. I' s'avolent raide en nageant souos l'ieau, souô-disant à eune vitesse dé 15 à 20 milles à l'heuthe, et quand i' tchittent la surface i' passent dans l'air à eune vitesse d'eune quarantaine dé mille à l'heuthe pour eune bouanne distance dévant s'èrmett' à l'ieau.

 

Aniet, mêcrédi, l'quat' dézembre, 1963, j'avons 'té à bein près quat' jours dans la Mé Arabe. Lé temps s'caillit dînmanche la niet. I' pathaît qu'y'avait eune dgêle dé vent v'nant d'la direction du Ceylan, et pour un coupl'ye d'jours la mé 'tait mouvementée. Dans un pus p'tit baté éthait p't êt ieu des pèrsonnes malades, mais nou n's'en appèrche pon fort à bord d'un grand navithe comme ch't'ichîn. La tempéthatuthe a resté dans les 80 dégrés. J'avons arrivé à Colombo d'bouanne heuthe à matîn dans eune avèrse d'plyie. Ou' n'pathaîssait pon molli fort par lé temps d'nouot' arrivée dans la ville, et l's avèrses ont continnué tout l'jour! V'la tch'i' n'nouos a pon quand-même empêchis d'visiter la ville et la campangne. L'ile du Ceylan est ieune des pus belles du monde. Les Portudgais et les Hollandais l'avaient otchupée tou à tou pour 150 ans jusqu'à sa contchête par l's Angliais en 1795. Sén îndépendance lî fut accordée par l'Angliétèrre en févri, 1948.

 

La population est un mêlange dé Cingalais, Tamouls et Maures. La pus grand' partie est Cingalaise. En viyant l's annonces sus la porte d'eune Églyise Anglicane (St Étienne) à Negombo, ville dé pêtcheurs lé long d'la côte, j'ai r'mèrtchi qué La Sainte Cène est célébrée la en langue Cingalaise à certaine heuthe, en Tamil (langue des Tamouls) à eune autre heuthe, et en Angliais étout! Ch'est un Angliais tch'est Minnistre.

 

J'tais dans l'ile en 1950, deux ans auprès qué l's Angliais avaient tchitté l'pays. L's appathences ont hardi empliéthi d'pis chu temps-là. Nou vait l'mouaïsi partout. Bâtisses et maisons ont grand bésouain d'peintuthe et d'èrpathâtion. L's emplyiyés d'La Douane sont en grève pour lé moment, et la gâzette dé l'ile, dans s'n articl'ye d'fonds, avèrtis l'peupl'ye du dangi tch'existe aujourd'aniet à cause du mauvais sang et manque d'accord parmi les grosses têtes des sèrvices publ'yics.

 

(À sièthe)

 

George d'La Forge.

 

En Améthique,

Lé 14 août, 1964