Bouonne Venue a La Tchênelle

 Bouonne Venue a La Tchênelle

par Charlot

 

Normallement, j'allons a la ville chaque vendredi matin pour cherchi les essentiels d'épicyies et d'ledgeunmes pour la fin d'la s'maine, et ch'tait une telle matinée quand j't'aimes siez l'bouochi a acater des saucciches que j'avisis nos anmins Clem et Nancy Dupays qu'appraichais nôt direction. Le pouorre Clem avait l'air de marchi a p'tits pas auve l'aigue d'un bâton.

 

“Et comment qu'tu'ais mon Clem” j'lis dit, tandis que Mélie saluit Nancy en l'embraichant.

“Mon chier Charlot”, y'm reponnit. “J'ai ieu une tchulbute, et j'me sis causer mal au dos. J'vais a l'hôpita deux fais la s'm'naine pour du traitement, et les nosses me dithes tchi faudra trais mais d'traitement pour me r'dgéthi.”

“J'espéthe que tu garde un yi d'ssus”, s'fit Mélie, “nou s'entend assez d'histouaithes envers les vieillards et les nosses”.

Le pouorre Clem tait en pensée, y'n criyait pas qu'sés souffrances methitaits une riselée.

J'les inviti d'nos joindre pour une tassée d'café par-ce-que j'viyais qu'el pouorre Clem cherchait un appias.

“Eh bein, comment que tu t'pliaits parmi les gens d'l'Est achteu que tu'as r'muer de St. Ouen. J'vos viyons sus l'television a jouer l'croquet et d'autres amusements. Manque tu la vieille paraisse.”

“Bein seux, j'manque l'amiétchi des paraissiens d'St. Ouen. J'avons passé dgieux-neuf années d'jouaie parmi bein d's'anmins, et ch'tait pas sans aver bein érfliéchi que j'prinmes la decision d'ermuer a St. Sauveux,” j'reponni. “Heutheusement, je sommes entouthées d'jerriais et l'atmosphéthe est bein aimablye. J'avons l'chouaix si j'voulons a etre independent iun d'l'autre, mais en cas d'besoin j'avons à l'assûthance d'aigue. Y faut qu'je dit, je sommes hardi heutheux les deux d'nous. Oui, j'sommes a rejoui d'la bouonne vie du Mangni d'Oaklands.”

“J'crai tch'il est grand temps d'vos joindre”, s'fit Nancy. Clem ne peut pus s'otchuper du gardin, la maithon a grand besoin d'peinthûthe et j'me d'mande combein d'temps que j'pouvons continuer.”

"Che sethait un grand pliaisi d'vos aver comme vaisins, et j'pense que j'passeraimes de bouon temps ensemblye”, s'fit Mélie.

 

L'heuthe s'avanchait, et j'navaits pas idée d'erchever une amende pour le stationement du moto, et comme j'avaimes acquo plusieurs commissions, j'décidimes tch'il tait temps d'bouogi, et auprés aver souhaiter l'bonjour a nos anmins, j'partimes chatchun d'nôt côté.

 

J'n'avaimes pas viaigi liain d'vant rencontrer d'autres anmins. Tous avaits l'air de poser la meme tchestchion. Est-ous installers dans vot nouvelle residence.

 

Eh bein, la seule response que j'pouvons offrit est. “V'nins vaie pour vous-meme. J'crai qu'ou sethez bein impressif du resûltat.”

 

La Bein-v'nue d'La Forge a 'tait transferée à La Tchênelle.

 

Clifford Laisney