L'ASSEMBLIÉE D'JÈRRIAIS
Visite du
Professeux Lechanteur
D'vant c'menchi l's affaithes pour la séthée, mécrédi, l'18
d'avri, dans la Salle dé St. Marc, l'Président, l'Sieur H. M. Gibaut, d'mandit
ès membres dé lus l'ver eune minute en silence en mémouaithe du Bailli,
Moussieu C. S. Harrison, C.M.G., O.B.E.
Lé rapport du dêbat fit liu et accepté, la correspondance
fut liue et chînq nouvieaux membres fudrent êlus, et auprès l'Président fit la
beinv'nue au Professeux Fernand Lechanteur.
Ch'tait un grand honneu pour les membres dé L'Assembliée
d'aver un savant si distindgi comme lé Professeux Lechanteur à les adressi. Lé
Professeux, qui paslait en Normand et un mio en Français, c'menchi par dithe qu'i'
'tait bein content d'être parmi dé vraies Jèrriais. Ch'fut hardi intérêssant d'ouï
comment, qu'les difféthentes contrées varyissent la prononciation dé bein des
mots: par exemplye, dans la haute Normandie, les gens disent “Prêchi” à la
pliaiche dé “pasler”. À l'entou d'Coutances, dé iou qué l'Professeux est prov'nu,
i' y'a des mots qui sont fais servi là et seul'ment dans les Iles dé la Manche
autrément - “siez” en est iun. Lé patouais dans l's environs d'Caën est bein
aîsi à comprendre, car il est pus comme lé Français, et tant pus ouest qué nou'
va, tant pus qu'les mots sont copés d'court. Comme dit l'Professeux ça change
“À tout pas d'bréques”. Dans l'but d'la Normandie, lé “th” pour lé “r” est bein
connu étout.
Auprès aver liu plusieurs poésies pour montrer les autres
dialectes, lé Professeux félicitit l'Sieur F. Le Maistre sus sa magnifique
collection d'mots et sus la maniéthe qu'il est à faithe san dictionnaithe, et
dit qu'L'Assembliée est à faithe dé bouan travas pour préserver l'patouais en
Jèrri. Eune aut' ermerque fut qué y'a des Jèrriais d'êparfénés partout l'monde,
et un tas d'ches gens 'chîn qui lus 'taient bein déhallés, n'ont pas oubliyer
la langue dé lus pays.
Ermerciements
Mme. P. Green (Député), en r'merciant l'Professeux pour
san magnifique discours, dit qué la prospérité d'Jèrri v'nait d'Anglyéterre,
mais qu'la tchultuthe v'nait d'la Normandie, et qu' tandis qu'i'y avait d's
“Etudiants d'Langues” les dialectes né lus perdéthaient pas.
Lé Film
À la fin du discours, lé Sieur P. P. Luce ermontrit l'film
du nièr beurre pour les siens qui n'l'avaient pon veu; ch'tait damage qué l'
“son” dêroutit, mais l'Sieur G. Perchard explyitchit chein qu'i' s'passait à m'suthe
qué les portraits v'naient.
Annonces
Lé Président annoncit la préchaine réunion pour lé 25 dé
mai, quand nou-s-itha visiter l'office du Conmité d'Tourisme, Rue des Trais
Pigeons.
Les membres sont învités à un service en Français par lé
Rev. H. Bernard, dans la Chappelle d'Ebenhézer, dînmanche, lé 20 d'mai, à 3
heuthes. Lé service annuel dé L'Assembliée (en Jèrriais et Français) s'sa dans
la Chapelle dé St. Martîn, dînmanche, lé 17 dé juin, à 3 heuthes étout.
Raffraichiss'ments
Acouo une fais, lé Conmité Social avait arrangi des
raffraichiss'ments pour touos les membres qui l's apprécyitent hardi, et les
membres du Conmité méthitent tous bein les r'merciements qué l'Président lus
accordit à la fin d'la séthée.
1962
No comments:
Post a Comment