Tuesday 1 April 2014

1917: du travas d'dgèrre - war work (3)

La fîn dé ch't' articl'ye dé 1917. Et j'ajouôtons étout eune poésie par Elie entouor la nouvelle du cat tchi boulit du lief:

The conclusion of this article from 1917. We also add a poem by EJ Luce about the news of the cat which fell off the roof:

(siette et fîn)
Dépis que j'sis par ichin, j'n'ai pus quâsi d'communicâtion avec les gens du bureau au bas du Vièr Marchi. Notr' bu d'gal'tas est bein barrè et notr' butin souos bouanne garde, chein qui fait que je n'nos dérangeons pas d'rein. Mais Jerry est si p'tit que n'ou n'peut pon s'empêchi d'savair ch'qui s'passe dans ses vièrs hants et toute la famille des Caouains a apprins le triste accident que la "Post" rapporti Mêcredi, comment qu'le ca' à Mess Bisson, les vièr ca' qui faisait sa ronde au Chimtchèthe touos les sièrs, a tchulbuttè du haut d'la maison jusqu'à bas.

J'me d'mande coumment qu'il est v'nu à tchaie Je counnais les lieux assez bein ach'teu et jamais n'yai veu l'moindre dangi, ni autchune chose qui me f'thai craithe que j'pouorrais tchaie d'même en plien jour, mais p't'être que nou n'vait pon l'dangi quand nou sait voler coumme i' faut.

En tout cas, chu ca' là et mai, je n'tions pas trop bouans amins. L'affaithe n'avait jamais 'tè coumme sus rouolettes entre nous dépis que j'nos counnaissions et pus d'une fais y'a yeu du hèrtchin là haut, au cliai d's'êtelles.

Eh! bein, criyiz-mai s'ou vouleuz, mais je n'peux pon m'empêchi d'avait du r'grè pour la pouorre bête. Il est vrai qu'un ca' n'est qu'un ca' mais i' m'sembl'ye, mai, que les p'tites animosités d'la vie daiv'thaient dispathaithe devant les malheurs. S'ou voulez êcouter la morale d'un pouorre ouaisé coumme mai, j'vos dithai que trop souvent les humains portent lus rantchumes trop loin et que quand la malchance et la minzèthe arrivent faudrait tâchi d'oublier nos hèrtchinn'nies et nos haines. Opprès tout 'êche que la vie n'est pon trop courte pour être tréjous à s'cherchi chicane?

Si j'peux trouver une souothie tendre, grasse, et bein en chai, ches jours, j'm'en vais l'y'envier par la bus (c/o Mess Bisson) pour montrer ma sympathie d'une maniéthe pratique.

Caouain


Bulletin

Mess Bisson a, coumme ou' savez,
Un nièr ca' qu'il aime assez bein,
Nou l'a veu souvent sus l'compteux
A se r'poser d'n'avair fait rein.

L'autr' jour chu pouorre ca' là bouli
Du haut d'la maison jusqu'à bas
Nou le r'levi pus qu'à mié mort
Oprès sen affreux pataflias!

Mais i' se r'fait! Grâce ès p'tits soins
Qu'san maître l'y'a dounnè tout l'temps,
Il est quâsiment rètabl'yi
Et vos fait bain ses compliments.

Elie
1917

No comments: